2 Pedro 2

Ne Bibliaj Tik Nawat

2 Nusan nemiket tashijshikuanimet ijtik ne techan, kenha ken ijtik anmejemet nusan yawit muajsit sankatamachtianimet. Yejemet kishtukasket sejsectaj ipal tapululis, wan inasket ka ne tutekuyu ne mutemakak pal kinmakishtia inte yekkaya, wan kalwikasket inhijpak tapululis talul. ² Wan miak yawit kimatit ka tejkia ne insusultailwitilis, wan inpanpa, sejse yawit kukujtaketzat ipanpa ne ujti ipal ne tejkia. ³ Wan ipanpa taelewilis, yawit metzinnamakat iwan sajsanka. Inpal ne juicioj pal ikman inte ishtuna wan ne inpuliwilis inte kuchi.

⁴ Su ne Teut kinwilej ne tanawatianimet ne kichijtiwit tay te yek, wan kintemakak ijilpituk kan kunyua, tik Miktan, ma nakakan ka né hasta ne juicioj; ⁵ su ne Teut kiwilej ne taltikpak palikman, wan semaya kipalewij yajane ká tanawatia katka tay yek, Noa, wan uk chikume, wan kalkwij se tepeat ijpak ne taltikpak ika ne taltikpak inte kitasujta ne Teut; ⁶ su Yaja nusan kinkwepki neshti ne tejtechan ipal Sodom wan Gomora, wan inak ma muishtapachukan ken se tamachtilis ipal muchi ká kinekiskiat kielkawat Teut; ⁷ wan su Yaja kichiwilij tay yek ne yulmelawak Lot, wan kimakishtij itech ne inte yejyek ne muwikat ken inte muneki: ⁸ ika ne yulmelawak muchantia ijtik yejemet wan tachia wan takaki muchi ne tujtunal wan kikukua ialmaj yek iwan muchi tay muchiwa tay te yek; ⁹ su ijkiuni tel, ne Teut kimati ken yawi kinmakishtia ne yejyek itech taejekulis wan ken yawi tajpia ne inte yejyek pal muwitekit tik ne tunal ipal juicioj, ¹⁰ wan keski mas ne nejnemit ipan innakayu ne kielewiat tay susul wan kijilwiat ne Tajtzin.

Yejemet inte ishpinawat, kichiwat muchi tay kinekit, kukujtaketzat ne weymet wan te ijtzilikat: ¹¹ inte ijkiuni ne tanawatianimet, ká inte kinhijilwiat iishpan Tutajwan melka yejemet kipiat mas wey intajpal.

¹² Yejemet ken kojtantekwanimet ne inte yultaketzat, ne nemit pal mupewiat wan muwilewat. Kukujtaketzat ne tay inte kimatit. Yawit wilewit, ¹³ wan yawit kipiat tay inte yek ken inpatiw ika yejemet inte yejyek. Ingustoj ne muyulkwesulis ka tunal. Yejemet takapalamet, tijtilkwijtuk, pajpakit teshijshikuat kwak sennemit anmuwan tik yujyualu. ¹⁴ Senpa kinekit mawiltiat iwan siwatket wan te keman mukawat kichiwat muchi tay te yek. Kipewiat ne ajalmaj ne inte kimatit tay kinekit. Kipiat inyulu tentuk iwan teshijshikulis. Kukunet ipal maldicion!

¹⁵ Kiajkawtiwit ne yek ujti wan pulijtiwit. Yajket tik ne ujti ipal Balaam, ne ikunew Beor, ne kichijki tay teyek ipanpa tumin, ¹⁶ wan kiajajwaket ipanpa uni tay kichijki, hasta se burroj te weli taketza tanutzki ken se takat wan te kiajkaw ma muchiwa ken inatuya ne tzuntet taketzani.

¹⁷ Yejemet ken se ishat waktuk wan se mishti ne muishtupewa tik ne ejekat. Yawit kipiat wey kunyua. ¹⁸ Inat ne tay suluntuk wan te tatka ipatiw, wan kipewiat iwan ne sujsusul taelewilis ipal inweyka sejse ká achka welit chuluat intech yejemet ká muwikat tik mushijshikulis. ¹⁹ Melka inat ka yawit kinmakishtiat, yejemetsan tepaltekitinimet itan puliwilis, ika su aka kitzkia se, se mukwepa ne itekitini.

²⁰ Asu yejemet chulujtiwit itech ne tay susul tik ne taltikpak ika kishmattiwit ne tutajtzin wan tutamakishtiani Yeshu Mawaltijtuk, wan neman mukwelpachujtiwit wan muitzkiat senpa, tipan yawit kipiat mas uij que achtu, ²¹ ika mas yek inpal su te kishmattuskiat ne ujti ipal ne tamelakchiwalis que su kwak tamit kishmatit muishkwepat wan kiajkawat ne tatuktilis ipal Teut ne mutemakak inpal. ²² Inwan panutuk tay ina ne taketza yekkaya, ina: Se pelu muishkwepa itech ne tay yaja misutak, wan ne kuyamet kwak tami mupaka mukwepa muishmimilua ijtik ne kwitat.