A A A A A
Bible Book List

2 Korinto 3Ne Bibliaj Tik Nawat (NBTN)

Anka tipewat titaneshtiat senpa ka tiyejyek? Anka timunekit, ken sejseuk, ajamat ne metzinhilwiat ka tiyejyek, o ma anmejemet shikijkwilukan sejse ijkiuni tupal? Anmejemetsan ne tuamaw, ne muijkwilujtuk ijtik ne tuyujyulu pal muchi kishmatit wan kitat; anmuneshtijtiwit ken iamaw ne Mawaltijtuk iwan ne tutekitilis, ijkwilujtuk tesu tik tintaj sute tik ne Iijiutzin ne Teut yultuk, wan tesu ijpak pajpatznaj tet sute ijpak ne tejtepatznaj ipal nakat tik ne tuyujyulu.

Tikpiat tayulmatilis ijkiuni ipanpa ne Mawaltijtuk iishpan ne Teut, tesu ika tikpiat tupatiw tusel pal tiyultaketzat tatka ken su tupal, sute ne tupatiw ne Teut techmaka, wan nusan yajaya ne techmakatuk tupatiw pal titekitit ipal ne yankwik sentaketzat: tesu tik amat sute tik Ijiutzin, ika ne amat tamiktia, ne Ijiutzin tayulkwepa.

Su tzitzinakak ne tekitilis ipal mikilis ijkwilujtuk ijtik tejtet hasta te weliket nakat tachiat ne ipilawan Israel iishpan ne iishkalyu Moshe ipanpa ne itawilyu ne iishkalyu, ne puliwi, ken te yawi tzitzinaka sujsul mas ne tekitilis ipal ne Ijiutzin? Ika su tzitzinaka ne tekitilis ne ina ka se teyek, sujsul mas tzitzinaka ne tekitilis ipal tamelakchiwalis. 10 Ika hasta ne tay tzitzinakatuk tea tzitzinakatuk kwak muita inawak tay ne tzitzinaka mas; 11 wan su tzitzinaka ne tay puliwi, sujsul mas tzitzinaka ne tay naka.

12 Tejemet tikpiat ini tejchialis wan yajika titanutzat melaknaj, 13 wan tesu ken Moshe kitalia se ikwenyu ijpak ne iishkalyu pal ma te tachiakan ne Israeltakamet ka yawi tami tay ne puliwi, 14 wan takwawayatiwit ne intamatilis, ika hasta ne tunal pal ashan uni ikwenyu kwak amataketzat ne sentaketzat palikman naka wan te muishtia (ika tik ne Mawaltijtuk tami). 15 Wan hasta ashan, kwak amataketzat tay ipal Moshe, naka se ikwenyu ijpak ne inyulu. 16 Melka uni, kwak muishkwepa itech ne Tajtzin, ne ikwenyu muishtis. 17 Ne Tajtzin ne Ijiutzin. Kan ne iijiutzin ne Tajtzin, tamakishtilis. 18 Ijtik muchi tejemet ká te tiktzaktiwit tuishkalyu, muita ken tik se vidrioj ne itawilyu ne Tajtzin, wan timupatat wan timukwepat ken sanse tutachialis tzitzinaka mas wan mas ken su kisa itech Tajtzin Ijiutzin.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes