1 Tesalonika 1

Ne Bibliaj Tik Nawat

1 Tejemet, Pawlo wan Silvanus wan Timoteo, tiktuktiat ini tajkwilul itech ne sennemit ipal ne Tesalonika chanejket ijtik tuteku Teut wan tajtzin Yeshu Mawaltijtuk.

Ma shikpiakan tetasujtalis wan nejmachnemilis.

² Tikilwiat padiush ne Teut senpa ka anmumaku wan senpa timetzinhelnamikit muchi tik tuteujteutajtanilis. ³ Tikelnamikit ne anmutekiw ipal tayulmatilis, wan keski antekitket ipal tetasujtalis, wan ne anmutanejmachselilis ipanpa tejchialis ipal ne tutajtzin Yeshu Mawaltijtuk iishpan ne Teut wan Tuteku.

⁴ Tikmatit, nukniwan, ka ne Teut metzintasujta wan metzinhishpejpen, ⁵ ika ne tuyeknawatilis te ajsituk anmutech sema tik pajpalabraj sute nusan tik itajpal, wan iwan Ijiutzin, wan sujsul anmumatket ka tejkia; ijkiuni, ankimatit ken tejemet katka kwak tinemiket itzalan anmejemet ka anmumaku. ⁶ Wan anmejemet muchijket sejse ken tejemet wan ken ne Tajtzin. Ankikwijket ne palabraj, tik wey uijkayu, iwan pajpakilis ipanpa ne Ijiutzin, ⁷ ken anmuchijket se figuraj ipal muchi ne tayulmatit tik ne Macedonia wan ne Akaia. ⁸ Ika anmutech tzalanik ne ipalabraj ne Tajtzin te semaya tik Macedonia wan Akaia, sute nujme mukakik ne anmutayulmatilis ipal ne Teut, ken te timunekit tinat tatka, ⁹ ika yejemetsan taneshtiat insel ken tejemet tiajsiket anmutech wan ken anmuishkweptiwit itech ne Teut wan ankiajkawtiwit ne teujteutzin pal antekitit ipal ne Teut yultuk wan yekkaya, ¹⁰ wan ankichiat ne ikunew ne yawi kisa tik ne ilwikak, ne kiketzki kwak miktuk, Yeshu, ká techmakishtijtuk itech ne kwalan witz.