2 Nukukunetzitzin, nikijkwilua ini anmupal pal kiane inte anyawit kichiwat tay inte yek, wan asu aka tateyekchiwa tikpiat se walnutztuk itech ne tuteku yek Yeshu Mawaltijtuk, ² wan yaja se pal mutapupulwia tay ne titateyekchijtiwit: intesu sema tejemet asunte nusan muchi.

³ Wan ijkini tiwelit tikmatit ka tikishmattiwit: asu titajpiat ne tay tatuktijtuk. ⁴ Ne ká ina: "Nikishmati", wan te tajpia tay tatuktijtuk, yaja sankataketza, wan ne tejkia inte kanaj ijtik yajane. ⁵ Ká ne ijkia tajpia ne ipalabraj, ijtik yajini nemi ne itetasujtalis ne Teut. Ijkiuni tiwelit tikmatit ka tinemit ijtik yaja. ⁶ Ne ká ina ka naka ijtik yaja, nemi pal muwika kenha ken muwikak yajasan.

⁷ Tajtasujtatuk, ne tatuktilis ne nikijkwilua anmupal inte se yankwik asunte se tatuktilis palikman ne ankipishketa kwak pejki. Ne tatuktilis palikman ne palabraj ne antakaktiwita. ⁸ Nusan se yankwik tatuktilis nikijkwilua anmupal, tay tejkia ijtik yajasan wan ijtik anmejemet, ika panu ne kunyua wan ne yekkaya tawil muitaya.

⁹ Ne ká ina ka nemi tik ne tawil wan kishijia ne iiknew nemi tik ne kunyua kenhayuk. ¹⁰ Ne ká kitasujta ne iiknew naka tik ne tawil wan te kanaj tatzunchaluas ijtik yajane. ¹¹ Ne kishijia ne iiknew tik ne kunyua nemi wan tik ne kunyua nejnemi, wan te kimati kanka yawi, ika ne kunyua kikwepa ishpupuyut.

¹² Anmupal nitajkwilua, kukunetzitzin, ika mutapupulwijtuk tay ankichijtiwit tay inteyek ka imaku ne itukay.

¹³ Anmupal nitajkwilua, tejteteku, ika ankishmattiwit yajane ká nemituya kwak pejki muchi.

Anmupal nitajkwilua, pipilmet, ika anwelitiwit ijpak ne inteyek.

¹⁴ Anmupal nitajkwilujtuk, kukunet, ika ankishmattiwit ne teteku.

Anmupal nitajkwilujtuk, tejteteku, ika ankishmattiwit yajane ká nemituya kwak pejki muchi.

Anmupal nitajkwilujtuk, pipilmet, ika ankipiat anmutajpal wan ne ipalabraj ne Teut naka ijtik anmejemet wan anwelitiwit ijpak ne inteyek.

¹⁵ Maka shiktasujtakan ne taltikpak nian ne tay nemi ijtik ne taltikpak. Asu aka kitasujta ne taltikpak, inte nemi ijtik yaja ne itetasujtalis ne teteku, ¹⁶ ika muchi tay nemi ijtik ne taltikpak, ne tay kielewia ne tunakayu wan ne tay kielewia ne tujtuish wan ne tay ne yujyultuk timuweytenewat, inte kisa itech ne teteku asunte itech ne taltikpak, ¹⁷ wan panu ne taltikpak wan ne itaelewilis, wan naka pal senpa ne ká kichiwa tay kineki ne Teut.

¹⁸ Kukunetzitzin, tinemit ne tipan horaj, wan ijkiunisan ken antakakket ka witz se sankamawaltijtuk, ashkan nusan muchijtiwit miak sankamawaltijtuk, yajika tikmatit ka tinemit ne tipan horaj. ¹⁹ Melka kisket tutech, yejemet inte tupal, ika asu tupal, naktuskiat tuwan; yaja pal muneshtia ka muchi yejemet inte kistiwit tutech. ²⁰ Wan anmejemet ankipiat tamawaltilis itech ne Wey, wan muchi anmejemet tamatit.

²¹ Inte nitajkwilujtuk anmupal ika inte ankimatit asunte ika kia ankimatit, wan ika muchi tay sanka inte kisa tik ne tejkia.

²² Ká ne tashijshikuani? Yaja ne ká ina ka Yeshu inte ne Mawaltijtuk. Yajuni ne sankamawaltijtuk, ká inte kikwi ne Teteku wan ne Kunet. ²³ Muchi ká inte kikwit ne Kunet, nusan inte kipiat ne Teteku. Ká ne kikwi ne Kunet nusan kipia ne Teteku.

²⁴ Tay ne anmejemet takaktiwit kwak pejki muchi, ma naka ijtik anmejemet. Asu naka ijtik anmejemet ne tay takaktiwit kwak pejki, anmejemet nusan yawit nakat ijtik ne Kunet wan ijtik ne Teteku. ²⁵ Wan ini ne promesaj ne techchiwilij prometer pal tiyujyultuk senpa.

²⁶ Nikijkwilua ini anmupal inpanpa ne metzinshijshikuskiat; ²⁷ wan anmejemet, ne tamawaltilis ne itech ankikwijtiwit naka ijtik anmejemet wan te anmunekit ma metzinmachti aka. Mas yek, ken ne itamawaltilis metzinmachtia muchi, wan yaja tejkia wan inte sanka, ijkiunisan ken metzinmachtijtuk shinakakan ijtik yajane.

²⁸ Wan ashkan, kukunetzitzin, shinakakan ijtik yaja pal kiane, asu walmuneshtia, inte tiawit timajmawit nian tiawit tishpinawat iishpan kwak witz. ²⁹ Asu ankimatit ka yaja yek, ankimatit ka nusan itech nestiwit muchi ká kichiwat tay yek.