1 Yojan 1  Ne Bibliaj Tik Nawat

1 Tejemet titakaktiwit ken pejki wan muchi tay muchijki, wan tikitztiwit iwan ne tujtuish, titachishtiwit, wan ne tujtumey tachijchintiwit, tay ipal ne Palabraj Yultuk. ² Wan ne Yultuk muneshtij wan tikitaket, wan timetzinhilwiat wan timetzinneshtiliat tay ipal ne Senpa Yultuk ne nemik itech ne teteku wan muneshtijtuk tuishpan. ³ Tay ne tikitztiwit wan titakaktiwit nusan timetzinneshtiliat pal kiane anmejemet nusan welit musentepewat tuwan wan pal timusentepewat ken tekniwan iwan ne Tuteku wan iwan ne Itelpuch Yeshu Mawaltijtuk. ⁴ Wan tikijkwiluat ini anmupal pal yekawi ne tupakilisyu.

⁵ Wan ini ne tanawatilis ne itech titakakket wan ne timetzinneshtiliat: ka ne Teut tawil, wan nian se chiupi kunyua inte kanaj ijtik Yaja.

⁶ Asu tinat ka timusentepewat iwan wan asu tinejnemit ijtik ne kunyua, tinat sanka wan te tikchiwat ne tejkia. ⁷ Asu tinejnemit ijtik ne tawil ken yaja nemi ijtik ne tawil, timusentepewat sejse iwan sejse, wan ne iesyu Yeshu, ne ikunew, techpupua wan techishtilia muchi tay tikchijtiwit tay inteyek.

⁸ Asu tinat ka inte titateyekchijtiwit, timushijshikuat wan te kanaj tejkia ijtik tejemet. ⁹ Asu tinat ka titateyekchijtiwit, Yaja muwika yek tuwan wan weli techishtilia tay ne tikchijtiwit wan yawi techpupua wan kishtia muchi ne tay inteyek. ¹⁰ Asu tinat ka inte tikchijtiwit tay inte yek, tikchiwat tashijshikuani wan te nemi ne ipalabraj ijtik tejemet.