A A A A A
Bible Book List

1 Pedro 4Ne Bibliaj Tik Nawat (NBTN)

Ne Mawaltijtuk taekuj ijtik iweyka. Anmejemet nusan shimumatikan ken yaja pal anmupalewiat. Ika kwak titaekujtiwit tik tuweyka, tamik ne tateyekchijtuk, pal kiane intea yawi panu ne tujtunal nakat ken kielewiat takamet asunte ken kineki Teut. Ika techajsik ne panutuk pal tikchiwat ne tay ajwiak pal ne tejtechan kwak tinejnentiwit ijtik susultailwitilis, taelewilis, mutawantilis, yujyualu kan antawanket, wan teutzintankwaketzalis teyek, wan yejemet te kimatit taika te anmusenputzuat kan yawit kichiwat muchi tay te yek, wan kukujtaketzat. Yejemet yawit nankiliat iishpan yajane ká nemi pal kichiwa juzgar ne yujyultuk wan ne mijmiktuk, wan yajika nusan muyeknawatilijtiwit ne mijmiktuk, pal yawit muchiwat juzgar ken takamet kipiat inweyka wan pal muwikat ken iijiu Teut.

Muchi yawia tami. Yajika, ma nemi yek anmutzuntekun wan shiktajtanikan Teut nejnejmach. Ne achtu ipal muchi, ma shimutasujtakan sujsul sejse iwan sejseuk ika ne tetasujtalis kitzakwa miak tateyekchijtuk. Shimupalewikan wey wan maka shikikinakakan. 10 Ijkiunisan ken sejse kikwij itetakulisyu, shitekitikan sejse ipal sejse ken yejyek kalpiani ne tajpiat muchi ne tekenha tay techtakulijtuk ne Teut. 11 Asu aka tanutza, ken ipalabraj Teut. Asu aka tekiti, ken ne Teut kimaka itajpal, pal kiane tik muchi yawi mumati ka wey ne Teut itech Yeshu Mawaltijtuk ká ipal ne itzitzinakalis wey wan ne itajpal pal senpa wan senpa amen.

12 Nuyejyektasujtatuk, maka shishpuyawikan ipanpa ne kutit pal metzinhejekua ken su panuskia se tay yankwik, 13 asunte shipakikan ika anmejemet ikunpawan iwan ne Mawaltijtuk tik itajtaekulisyu; shipakikan pal anwelit pajpakit sujsul mas kwak yawi muneshtia ne itzitzinakalis. 14 Su metzinhijilwiat tik itukay ne Mawaltijtuk, suertej ankipiat! Ika ne iijiu ipal tzitzinakalis wan ipal ne Teut anmujpak mukawa. 15 Ma inte taeku aka pal anmejemet ken tamiktiani nian techtekini nian tateyekchiwa nian ken chachalaka; 16 asu ken Cristianoj, ma inte ishpinawa: ma ina ka wey ne Teut ipanpa uni, 17 ika ajsik ne tunal pal pewa ne juicioj tik ne ikal ne Teut: su tejemet tiajachtu, ken yawit tamit ne inte kitakamatit ne iyeknawatilis ne Teut! 18 Wan

    "Asu uij ma mupalewi hasta ne ká yek,

    ne ká inte kitasujta Teut wan kichiwa tay inte yek kan yawi kisa?"

19 Kiane hasta ne taekuat iwan ne itaelewilis ne Teut ma kichiwakan tay yek wan ma temakakan ne inhajalmaj iwan ne yek Taltikpakketzani.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes