A A A A A
Bible Book List

1 Korinto 6Ne Bibliaj Tik Nawat (NBTN)

Maka shumet itech ne te tayulmatit pal metzinchiwat juzgar

Su se anmejemet kipia se pal muchiwa juzgar iwan seuk, ankinekit ma metzinchiwakan juzgar ne ká te yejyek mas yek que ne tayulmatit? Anka te ankimatit ka ne tayulmatit yawit kichiwat juzgar ne taltikpak? Wan su ijtik anmejemet yawi muchiwa juzgar ne taltikpak, anka anhinat ka te anyejyek pal inat ká yek tik chijchikitik tajtanilis? Anka te ankimatit ka tiawit tikchiwat juzgar hasta tanawatianimet? Su ijkiuni, taika te welit inat ipanpa ne tay muneki pal timutekipanuat?

Su ankipiat tajtajtanilis ipanpa tay muneki pal mutekipanuat, ken ka ankintaliat sejse ká ijtik ne sennemit te kipiat inpatiw? Nina ka yaja pal anhishpinawat! Kiane, anhinat ka te kanaj anmutzalan nian se kimati wey pal weli kichiwa juzgar ijtik ne ikniwan, sute se tuiknew kitenewa ukse iiknew, wan te semaya uni, mutaliat ishpan ne te tayulmatit? Kineki ina ka sujsul anpulijtiwita ika anmunekit muchiwat juzgar se iwan seuk. Mas yek taika te ankiajkawat ma metzinchiwilikan? Mas yek ma shimuajkawakan ma metzinshijshikukan! Anmejemet tachiwiliat wan tashijshikuat, wan ankichiwat uni iwan anmukniwan.

Anka te ankimatit ka ne te yejyek te yawit kipiat ne itatekimakalis ne Teut? Maka shimushijshikukan: nian ne tatzinhejenchiwat, nian ne kitennamikit teutzitzinmet, nian mawiltianimet, nian yajyamanik, nian ne senkuchit iwan se ukich, 10 nian techtekinimet, nian ne kielewiat tay tepal, nian tawananimet, nian teijilwianimet, nian taitzkianimet kipiasket ne itatekimakalis ne Teut, 11 wan sejse anmejemet muchi uni katka. Melka uni, anmuishpaktiwit, anmuteuchijtiwit, anmuchijtiwit yejyek tik itukay ne tajtzin Yeshu Mawaltijtuk, wan tik ne iijiutzin ne tuTeut.

Shichulukan wejka ne tatzinhejenchiwalis

12 Niweli muchi; melka uni, te muchi yek. Niweli muchi; melka uni, te weli nechtuktia aka.

13 Ne takwal nemi ipal ne tuijti wan ne tuijti ipal ne takwal. Ne Teut yawi kipulua ne se wan ne seuk. Ne tuweyka te pal titatzinhejenchiwat sute ipal ne Tajtzin, wan ne Tajtzin ipal ne tuweyka. 14 Ne Teut kiskalij ne Tajtzin wan tejemet yawi techiskalia iwan ne itajpal.

15 Te ankimatit ka ne anmuwejweyka tajtakutun ipal ne Mawaltijtuk? Anka niaw nikwi ne tajtakutun ipal ne Mawaltijtuk wan niaw nikwepa tajtakutun ipal se siwapala? Tesu kiane! 16 Te ankimatit ka ká ne musalua itech se siwapala muchiwa sanse iweyka iwan? Ika ina: "ne ujume mukwepasket sanse innakayu". 17 Ká ne musalua itech ne Tajtzin muchiwa sanse iijiu. 18 Shichulukan wejka ne tatzinhejenchiwalis! Muchi tay weli tateyekchiwa se nemi tatenpan ne iweyka, wan ne tatzinhejenchiwalis te, yaja kichiwilia teyek ne tuweyka. 19 Anka te ankimatit ka ne anmuweyka iteupantzin ne Ijiutzin ijtik anmejemet, ne ankipiat ika ne Teut metzinmakak wan te anmupal? 20 Ika metzinkujket ipatka anmupatiw: yajika, shikilwitikan ka wey ne Teut tik ne anmuweyka.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes