13 Ini kichiwa yey wipta ka niajsi anmutech. Su ume o yey inat, ma naka muchi ijkiunisan. ² Kenha ken kwak ninemik né ukse wipta, nusan ashan kwak te ninemi né, nikinhilwijtuya wan nikinhilwia ne tateyekchijtiwit achtu wan muchi ne sejseuk, ka kwak niaw niajsi senpa, te niaw niktapupulwia aka, ³ ika ankitemuat se pal ankimatit ka ne Mawaltijtuk tanutza nutech, wan yaja tesu yamania sute anmujpak yaja weli; ⁴ melka mucruzpiluj ipanpa yamanikayu, yultuk ipanpa itajpal Teut; melka tejemet tikujkutiat ijtik yaja, tiawit tiyujyultuk iwan ipanpa itajpal Teut ijtik anmejemet.

⁵ Shimuejekukan pal ankimatit su antayulmatit. Shitachiakan anmejemetsan. Anka te anmuishmatit, wan te kimatit ka Yeshu Mawaltijtuk nemi ijtik anmejemet; semaya su te anyejyek, tesu. ⁶ Nitejchia ma te shimuajsikan te yejyek. ⁷ Niktajtani ne Teut ma te metzinchiwili tatka teyek, tesu pal ma timuitakan yek sute pal anmejemet kichiwat tay yek, melka tejemet timuitat ken te tiyejyek. ⁸ Ika te tiwelit tatka su te tinemit iwan ne tejkia, sema ka imaku ne tejkia; ⁹ ika tipakit kwak tejemet tikujkutiat, anmejemet chikawayat; nusan tiktajtanit uni, ne anmuyekawilis. ¹⁰ Neka niktuktia se tajkwilul anmutech kwak teuk niajsi ka né, pal kiane ma te niaw nikwalani ninemi kwak niajsi iwan ne tatuktilis ne nechmakatuk ne Tajtzin pal nitiskalia wan tesu pal nitetajkali.

¹¹ Pal tami, nukniwan: ma shipajpakikan; ma shiyekawikan; shimupalewikan; shikishkejketzakan muchi kenha. Shinejmachnemikan, wan ne Teut ipal tetasujtalis wan nejmachnemilis nemis anmuwan.

¹² Shimutajpalukan wan shimutennamikikan ken tayulmatinimet. Metzintajpaluat muchi ne tayulmatit

¹³ Ma nemi ne teutasujtalis ipal ne tajtzin Yeshu Mawaltijtuk wan ne itetasujtalis ne Teut wan ne tasentepewalis ipal ne Ijiutzin iwan muchi anmejemet.