Purihin ang Diyos, nitong kalangitan,
    kayo sa itaas siya'y papurihan.
² Ang lahat ng anghel, magpuri't magdiwang,
    kasama ang hukbo roong karamihan!

³ Ang araw at buwan, siya ay purihin,
    purihin din siya ng mga bituin,
⁴ mataas na langit, siya ay purihin,
    tubig sa itaas, gayon din ang gawin!

⁵ Siya ang may utos na kayo'y likhain,
    kaya ang ngalan niya ay dapat purihin.
⁶ Kanyang itinatag, kanilang kinalagyan,
    hindi magbabago magpakailanpaman.^[a]

⁷ Purihin n'yo si Yahweh, buong sanlibutan,
    maging dambuhala nitong karagatan.
⁸ Ulan na may yelo, kidlat pati ulap,
    malakas na hangin, sumunod na lahat!

⁹ Pagpupuri kay Yahweh lahat ay mag-ukol.
Mga kabundukan, mataas na burol,
    malawak na gubat, mabubungang kahoy;
¹⁰ hayop na maamo't mailap na naroon,
    maging hayop na gumagapang at mga ibon.

¹¹ Pupurihin siya ng lahat ng tao,
    hari at prinsipe, lahat ng pangulo;
¹² babae't lalaki, mga kabataan,
    matatandang tao't kaliit-liitan.

¹³ Sa ngalan ni Yahweh, magpuri ang lahat,
ang kanyang pangala'y pinakamataas;
    sa langit at lupa'y maluwalhating ganap.
¹⁴ Siya'ng nagpalakas sa sariling bansa,
    kaya pinupuri ng piniling madla,
    ang bayang Israel, mahal niyang lubha!

Purihin si Yahweh!