Add parallel Print Page Options

Hinirang ni Yahweh si Ciro

45 Ito ang ipinahayag ni Yahweh kay Ciro,
    ang pinunong kanyang pinili,
upang sakupin ang mga bansa
    at alisan ng kapangyarihan ang mga hari.
    Ibubukas ko ang mga pintuang-lunsod para sa kanya habang siya'y pumapasok.
“Ako ang maghahanda ng iyong daraanan,
    mga bundok doo'y aking papatagin.
At sa mga lunsod, mga pintong tanso'y aking wawasakin;
    pati kandadong bakal ay aking tatanggalin.
Ibibigay ko sa iyo ang nakatagong mga kayamanan at alahas;
    sa gayon, malalaman mong ako si Yahweh,
    ang Diyos ng Israel, ang siyang tumawag sa iyo.
Tinawag kita sa iyong pangalan,
    alang-alang sa aking lingkod na si Israel na aking hinirang.
Binigyan kita ng malaking karangalan,
    kahit hindi mo ako nakikilala.
Ako si Yahweh, ako lamang ang Diyos at wala nang iba;
    palalakasin kita, kahit hindi mo ako nakikilala.
Ginawa ko ito upang ako ay makilala
    mula sa silangan hanggang kanluran,
    at makilala nila na ako si Yahweh,
    ako lamang ang Diyos at wala nang iba.
Ako ang lumikha ng dilim at liwanag;
    ako ang nagpapahintulot ng kaginhawahan at kapahamakan.
    Akong si Yahweh ang nagpapasya ng lahat ng ito.
Padadalhan kita ng sunud-sunod na tagumpay,
    parang mga patak ng ulan na bumabagsak sa lupa;
    dahil dito'y maghahari sa daigdig ang kalayaan at katarungan.
Akong si Yahweh ang magsasagawa nito.”

Si Yahweh ng Buong Nilikha at Kasaysayan

Ang(A) palayok ba ay makakatutol sa gumawa sa kanya?
Maitatanong ba ng putik sa magpapalayok kung ano ang ginagawa nito?
    Masasabi ba ng palayok na hindi sanay ang gumawa sa kanya?
10 May anak bang magtatanong sa kanyang ama, “Bakit ikaw ang aking naging ama?”
    At sa kanyang ina, “Bakit mo ako ipinanganak?”
11 Ngunit ipinahayag ni Yahweh, ang Banal na Diyos ng Israel, ang Lumalang sa kanila:
“Wala kayong karapatang magsabi sa akin tungkol sa aking mga anak
    at kung ano ang dapat kong gawin.
12 Ako ang lumikha ng buong daigdig,
    pati mga taong doo'y tumatahan.
Maging ang kalangitan, ako ang nagladlad,
    ako ang may kapangyarihan sa araw, buwan at mga bituin.
13 Ako ang tumawag kay Ciro upang isagawa ang aking layunin at isaayos ang lahat ng bagay.
Aking tutuwirin ang kanyang daraanan;
    muli niyang itatayo ang Jerusalem na aking lunsod,
    at kanyang palalayain ang aking bayan.
Walang sinumang nagbayad o nanuhol sa kanya upang ito'y isagawa.”
Ang Makapangyarihang si Yahweh ang nagsabi nito.

14 Ang sabi ni Yahweh sa Israel,
“Mapapasaiyo ang kayamanan ng Egipto at Etiopia.
    Magiging alipin mo ang matatangkad na lalaki ng Seba;
    sila'y magiging sunud-sunuran sa iyo.
Yuyukuran ka nila at sasabihin:
    ‘Sumasaiyo ang Diyos, siya lamang ang Diyos at wala nang iba pa.’”
15 Ang Diyos ng Israel ang Tagapagligtas ng kanyang bayan;
    mahiwaga siya kaya hindi kayang unawain.
16 Hahamakin at mapapahiya
    ang lahat ng gumagawa ng mga diyus-diyosan.
17 Ngunit ang Israel ay iyong ililigtas,
    ang tagumpay nila ay sa habang panahon
    at kailanma'y hindi mapapahiya.

18 Si Yahweh ang lumikha ng kalangitan,
    siya rin ang lumikha ng daigdig,
ginawa niya itong matatag at nananatili,
    at mainam na tirahan.
Siya ang maysabing, “Ako si Yahweh at wala nang iba pang diyos.
19 Lahat ng salita ko'y sinasabi nang hayagan,
    isa man sa layunin ko'y hindi inililihim.
Hindi ko pinahirapan ang Israel
    sa paghanap sa akin.
Ako si Yahweh, sinasabi kong lahat ang katotohanan,
    at inihahayag ko kung ano ang tama.”

Si Yahweh ng Sanlibutan at ang mga Diyus-diyosan ng Babilonia

20 Sinabi ni Yahweh,
“Halikayong lahat na mga natitirang buháy mula sa lahat ng bansa;
kayong mga mangmang na nagpapasan ng mga imaheng kahoy
at dumadalangin sa mga diyus-diyosan na hindi makakapagligtas.
    Ang mga taong ito'y walang nalalaman.
21 Ipagtanggol ninyo ang inyong panig.
    Magsanggunian kayo.
Sino ang makakapagsabi ng mga bagay na magaganap?
Hindi ba akong si Yahweh, ang Diyos na nagliligtas sa kanyang bayan?
    Walang ibang diyos maliban sa akin.

22 Lumapit kayo sa akin at kayo ay maliligtas,
    kayong mga tao sa buong daigdig.
Walang ibang diyos maliban sa akin.
23 Ako(B) ay tapat sa aking pangako
    at hindi magbabago,
at tutuparin ko ang aking mga pangako:
    ‘Lahat ng tao ay luluhod sa aking harapan,
    at mangangakong sila'y magiging tapat sa akin!’

24 “Sasabihin nila, si Yahweh lamang ang matuwid at malakas;
    at mapapahiya ang sinumang sa kanya'y maghimagsik.
25 Akong si Yahweh ang magliligtas sa lahi ni Israel;
    sila'y magtatagumpay at magpupuri sa akin.”

Ang Paghirang kay Ciro

45 Ganito ang sabi ng Panginoon sa kanyang pinahiran ng langis, kay Ciro,
    na ang kanang kamay ay aking hinawakan,
upang pasukuin ang mga bansa sa harap niya;
    at kalagan ang mga balakang ng mga hari,
upang magbukas ng mga pintuan sa harapan niya,
    upang ang mga pintuan ay hindi masarhan:
“Ako'y magpapauna sa iyo,
    at papatagin ko ang mga baku-bakong dako,
ang mga pintuang tanso ay aking wawasakin,
    at ang mga harang na bakal ay aking puputulin,
at ibibigay ko sa iyo ang mga kayamanan ng kadiliman,
    at ang mga natatagong kayamanan sa mga lihim na dako,
upang inyong malaman na ako ang Panginoon,
    ang Diyos ng Israel na tumatawag sa iyo sa iyong pangalan.
Alang-alang kay Jacob na aking lingkod,
    at sa Israel na aking pinili,
sa iyong pangalan ay tinawag kita,
    aking pinangalanan ka, bagaman hindi mo ako kilala.
Ako ang Panginoon, at walang iba;
    liban sa akin ay walang Diyos.
    Aking binibigkisan ka, bagaman hindi mo ako kilala,
upang malaman ng mga tao mula sa sikatan ng araw,
    at mula sa kanluran, na walang iba liban sa akin;
    ako ang Panginoon, at walang iba.
Aking inilagay ang liwanag at nililikha ko ang kadiliman;
    ako'y gumagawa ng kaginhawahan at lumilikha ako ng kapahamakan;
    ako ang Panginoon, na gumagawa ng lahat ng mga bagay na ito.

Ang Panginoon ang Manlilikha

“Maghulog ka, O mga langit, mula sa itaas,
    at ang kalangitan ay magpaulan ng katuwiran;
bumuka ang lupa, at lumitaw ang kaligtasan,
    at upang ang katuwiran ay lumitaw na kasama nito,
    akong Panginoon ang lumikha nito.

“Kahabag-habag(A) siya na makikipagpunyagi sa Maylalang sa kanya!
    Isang luwad na sisidlan sa isang magpapalayok!
Sinasabi ba ng luwad sa nagbibigay anyo sa kanya, ‘Anong ginagawa mo?’
    o ‘ang iyong gawa ay walang mga kamay?’
10 Kahabag-habag siya na nagsasabi sa ama, ‘Ano ang naging anak mo?’
    o sa babae, ‘Ano ang ipinaghihirap mo?’”
11 Ganito ang sabi ng Panginoon,
    ng Banal ng Israel, at ng Maylalang sa kanya:
“Magtanong ka sa akin tungkol sa mga bagay na darating;
    tungkol sa aking mga anak, at tungkol sa gawa ng aking mga kamay, mag-utos kayo sa akin.
12 Aking ginawa ang lupa,
    at nilikha ko ang tao sa ibabaw nito;
ako, ang aking mga kamay ang nagladlad ng mga langit,
    at inuutusan ko ang lahat ng naroroon.
13 Aking ibinangon siya sa katuwiran,
    at aking tutuwirin ang lahat niyang lakad;
kanyang itatayo ang aking lunsod,
    at kanyang palalayain ang aking mga binihag,
hindi sa halaga o sa gantimpala man,”
    sabi ng Panginoon ng mga hukbo.

Ang Panginoon Lamang ang Tagapagligtas

14 Ganito ang sabi ng Panginoon:

“Ang yari ng Ehipto at ang kalakal ng Etiopia,
    at ang mga Sabeo, mga taong matatangkad,
ay paparito sa iyo, at sila'y magiging iyo;
    sila'y susunod sa iyo.
    Sila'y darating na may tanikala at sila'y magpapatirapa sa iyo.
Sila'y makikiusap sa iyo, na nagsasabi,
    ‘Tunay na ang Diyos lamang ang nasa iyo, at walang iba,
    walang ibang Diyos.’”
15 Katotohanang ikaw ay Diyos na nagkukubli,
    O Diyos ng Israel, ang Tagapagligtas.
16 Silang lahat ay napahiya at nalito,
    ang mga manggagawa ng mga diyus-diyosan ay magkakasamang nalilito.
17 Ngunit ang Israel ay ililigtas ng Panginoon
    ng walang hanggang kaligtasan;
kayo'y hindi mapapahiya o malilito man
    hanggang sa walang hanggan.

18 Sapagkat ganito ang sabi ng Panginoon
na lumikha ng langit
    (siya ay Diyos!),
na nag-anyo ng lupa at gumawa niyon,
    (na kanyang itinatag;
hindi niya ito nilikha na sira,
    ito ay kanyang inanyuan upang tirhan!):
“Ako ang Panginoon, at wala nang iba.
19 Ako'y hindi nagsalita ng lihim,
    sa dako ng lupain ng kadiliman;
hindi ko sinabi sa lahi ni Jacob,
    ‘Hanapin ninyo ako nang walang kabuluhan.’
Akong Panginoon ay nagsasalita ng katuwiran,
    ako'y nagpapahayag ng mga bagay na matuwid.

Ang Diyus-diyosan at ang Panginoon

20 “Kayo'y magtipon at pumarito,
    magsilapit kayong magkakasama, kayong mga nakaligtas sa mga bansa!
Sila'y walang kaalaman
    na nagdadala ng kanilang kahoy na larawang inanyuan,
at nananalangin sa diyos
    na hindi makapagliligtas.
21 Kayo'y magpahayag at maglahad;
    oo, magsanggunian silang magkakasama!
Sinong nagsabi nito nang unang panahon?
    Sinong nagpahayag niyon nang una?
Hindi ba ako, na Panginoon?
    At walang Diyos liban sa akin,

isang matuwid na Diyos at Tagapagligtas;
    walang iba liban sa akin.

22 “Kayo'y bumaling sa akin, at kayo'y maliligtas,
    lahat ng dulo ng lupa!
    Sapagkat ako'y Diyos, at walang iba liban sa akin.
23 Aking(B) isinumpa sa aking sarili,
    mula sa aking bibig ay lumabas sa katuwiran,
    ang isang salita na hindi babalik:
‘Na sa akin ay luluhod ang bawat tuhod,
    bawat dila ay susumpa.’

24 “Kanyang sasabihin sa Panginoon lamang,
    ang katuwiran at kalakasan,
    iyon ang sasabihin tungkol sa akin;
    sa kanya'y magsisiparoon ang mga tao,
    at ang lahat ng nagagalit sa kanya ay mapapahiya.
25 Sa Panginoon ang lahat ng anak ng Israel
    ay aariing-ganap at luluwalhatiin.”

45 Ganito ang sabi ng Panginoon sa kaniyang pinahiran ng langis, kay Ciro, na ang kanang kamay ay aking hinawakan, upang magpasuko ng mga bansa sa harap niya; at aking kakalagan ang mga balakang ng mga hari; upang magbukas ng mga pintuan sa unahan niya, at ang mga pintuang-bayan ay hindi masasarhan;

Ako'y magpapauna sa iyo, at, papatagin ko ang mga bakobakong dako: aking pagwawaraywarayin ang mga pintuang tanso, at aking puputulin ang mga halang na bakal:

At ibibigay ko sa iyo ang mga kayamanang nasa kadiliman, at ang mga natatagong kayamanan sa mga lihim na dako, upang inyong maalaman na ako ang Panginoon na tumatawag sa iyo sa inyong pangalan, sa makatuwid baga'y ang Dios ng Israel.

Dahil sa Jacob na aking lingkod, at sa Israel na aking pinili tinawag kita sa iyong pangalan: aking pinamagatan ka, bagaman hindi mo nakilala ako.

Ako ang Panginoon, at walang iba; liban sa akin ay walang Dios. Aking bibigkisan ka, bagaman hindi mo ako nakilala.

Upang kanilang maalaman mula sa sikatan ng araw, at mula sa kalunuran, na walang iba liban sa akin: ako ang Panginoon, at walang iba.

Aking inilalagay ang liwanag, at nililikha ko ang kadiliman; ako'y gumagawa ng kapayapaan, at lumilikha ako ng kasamaan; ako ang Panginoon, na gumagawa ng lahat na bagay na ito.

Maghulog, oh kayong mga langit mula sa itaas, at ang alapaap ay pumatak ng katuwiran: bumuka ang lupa, upang maglabas siya ng kaligtasan, at ang katuwiran ay lumabas na kasama niyaon; akong Panginoon ang lumikha.

Sa aba niya, na nakikipagpunyagi sa May-lalang sa kaniya! isang bibinga sa gitna ng mga bibinga sa lupa! Magsasabi baga ang putik sa nagbibigay anyo sa kaniya, Anong ginagawa mo? o ang iyong gawa, Siya'y walang mga kamay?

10 Sa aba niya na nagsasabi sa ama, Ano ang naging anak mo? o sa babae, Ano ang ipinagdamdam mo?

11 Ganito ang sabi ng Panginoon, ng Banal ng Israel, at ng May-lalang sa kaniya, Magtanong ka sa akin tungkol sa mga bagay na darating; tungkol sa aking mga anak, at tungkol sa gawa ng aking mga kamay, magutos kayo sa akin.

12 Aking ginawa ang lupa, at nilalang ko ang tao rito: ako, sa makatuwid baga'y ang aking mga kamay, nagladlad ng langit, at sa lahat ng natatanaw roon ay nagutos ako.

13 Aking ibinangon siya sa katuwiran, at aking tutuwirin ang lahat niyang lakad; kaniyang itatayo ang aking bayan, at kaniyang palalayain ang aking mga natapon, hindi sa halaga o sa kagantihan man, sabi ng Panginoon ng mga hukbo.

14 Ganito ang sabi ng Panginoon, Ang yari ng Egipto, at ang kalakal ng Etiopia, at ang mga Sabeo, sa mga taong matatangkad, ay magsisiparito sa iyo, at sila'y magiging iyo; sila'y magsisisunod sa iyo, sila'y magsisidaang may tanikala; at sila'y mangagpapatirapa sa iyo, sila'y magsisipamanhik sa iyo, na mangagsasabi, Tunay na ang Dios ay nasa iyo; at walang ibang Dios.

15 Katotohanang ikaw ay Dios na nagkukubli, Oh Dios ng Israel, na Tagapagligtas.

16 Sila'y mangapapahiya, oo, mangalilito silang lahat; sila'y magsisipasok sa pagkalito na magkakasama na mga manggagawa ng mga diosdiosan.

17 Nguni't ang Israel ay ililigtas ng Panginoon ng walang hanggang kaligtasan: kayo'y hindi mangapapahiya o mangalilito man magpakailan man.

18 Sapagka't ganito ang sabi ng Panginoon na lumikha ng langit, na siyang Dios na nag-anyo sa lupa at gumawa niyaon, na kaniyang itinatag, at hindi niya nilikha na sira, na kaniyang inanyuan upang tahanan: ako ang Panginoon; at wala nang iba.

19 Ako'y hindi nagsalita ng lihim, sa dako ng lupain ng kadiliman; hindi ako nagsabi sa lahi ni Jacob, Hanapin ninyo ako ng walang kabuluhan: akong Panginoon ay nagsasalita ng katuwiran, ako'y nagpapahayag ng mga bagay na matuwid.

20 Kayo'y mangagpipisan at magsiparito; magsilapit kayong magkakasama, kayong mga nakatanan sa mga bansa: sila'y walang kaalaman na nangagdadala ng kahoy ng kanilang larawang inanyuan, at nagsisidalangin sa dios na hindi makapagliligtas.

21 Kayo'y mangagpahayag, at mangagpasapit; oo, magsanggunian silang magkakasama: sinong nagpakilala nito mula nang mga unang panahon? sinong nagpahayag niyaon nang una? hindi baga ang Panginoon? at walang Dios liban sa akin: isang ganap na Dios at Tagapagligtas; walang iba liban sa akin.

22 Kayo'y magsitingin sa akin, at kayo'y mangaligtas, lahat na taga wakas ng lupa: sapagka't ako'y Dios, at walang iba liban sa akin.

23 Ako'y sumumpa ng aking sarili, ang salita ay nakabitaw sa aking bibig sa katuwiran, at hindi babalik, na sa akin ay luluhod ang bawa't tuhod, bawa't dila ay susumpa.

24 Sa Panginoon lamang, sasabihin ng isa tungkol sa akin, ang katuwiran at kalakasan: sa makatuwid baga'y sa kaniya magsisiparoon ang mga tao, at ang lahat na nagiinit laban sa kaniya ay mangapapahiya.

25 Sa Panginoon ay aariing ganap ang buong lahi ng Israel, at luluwalhati.

'Isaias 45 ' not found for the version: Ang Bagong Tipan: Filipino Standard Version.