Revised Common Lectionary (Semicontinuous)
64 जदि तू अकास चीरिके धरती पइ खाले उतरि आवा
तउ सब कछू ही बदल जाइ।
तोहरे समन्वा पर्वत टेघर जाइ।
2 पहाड़न मँ लपट उठिहीं। उ सबइ अइसे बरिहीं जइसे झाड़ियन बरत हीं।
पहाड़ अइसे उबलिहीं जइसे उबलत पानी आगी पइ रखा गवा होइ।
तब तोहार दुस्मन तोहरे बारे मँ समुझिहीं।
जब सबहिं जातियन तोहका लखिहीं तब उ पचे भय स थर-थर काँपिहीं।
3 किन्तु हम फुरइ नाहीं चाहित ह
कि तू अइसे कामन क करा कि तोहरे समन्वा पहाड़ पिघल जाइ।
4 फुरइ तोहार ही लोग तोहार कबहुँ नाहीं सुनेन।
जउन कछू तू बातन कहया फुरइ तोहार ही लोग ओनका कबहुँ नाहीं सुनेन।
तोहार जइसा परमेस्सर कउनो भी नाहीं लखेस।
कउनो भी दूसर परमेस्सर नाहीं, बस सिरिफ तू ही अहा।
जदि लोग धीरा धइके तोहरे सहारे क बाट जोहत रहइँ,
तू ओनके बरे बड़े काम कइ देब्या।
5 जेनका अच्छे काम करइ मँ मजा आवत ह, तू ओन लोगन क संग अहा।
उ सबइ लोग तोहरे जिन्नगी क रीति क याद करत हीं।
पर लखा, बीते दिनन मँ हम तोहरे विरूद्ध पाप किहा ह।
एह बरे तू हमके कोहाइ ग रह्या।
अब भला कइसे हमार रच्छा होइ?
6 हम सबहिं पाप स मैला अही।
हमार सब “नेकी” पुरान गन्दे कपड़न स अहइ।
हम झुरान मुरझाए पत्तन स अही।
हमार पाप हमका आँधी स उड़ाये अहइ।
7 हम तोहार उपासना नाहीं करित ह।
हम का तोहरे नाउँ मँ बिस्सास नाहीं अहइ।
हम मँ स कउनो तोहार अनुसरण करइ क उत्साही नाहीं अहइ।
एह बरे तू हमस मुँह मोड़ लिहा ह।
काहेकि हम पाप स भरा अही एह बरे हम तोहरे समन्वा असमर्थ अही।
8 किन्तु, यहोवा तू हमार पिता अहा।
हम माटी क लौंदा अही अउर तू कोमहार अहा।
तोहरे ही हाथन हम सबक रचा ह।
9 हे यहोवा, तू हमेसा कुपित जिन बना रहा।
तू हमरे पापन क सदा ही याद जिन रखा।
कृपा कइके तू हमरी कइँती लखा।
हम तोहार ही लोग अही।
करार क कुमुदिनी धुन पइ संगीत निर्देसक बरे आसाफ क एक ठु स्तुति गीत।
1 हे इस्राएल क चरवाहा, तू हमार सुनि ल्या।
तू जउन यूसुफ क लोगन क अगुवाई करत ह।
तू जउन राजा क तरह करूब सरगदूत पइ विराजत अहा।
तू आपन आप क परगट करा।
2 एप्रैम, बिन्यामीन अउ मनस्से क सामने तू आपन महिमा देखावा,
अउर आपन सक्ति स हमका बचाइ ल्या।
3 हे परमेस्सर, हमका आपन बरे पुन: स्थापित कइ ल्या।
तू हम लोगन पइ कृपा करा ताकि हम लोग बच सकी।
4 हे सर्वसक्तिमान परमेस्सर यहोवा, कब तलक तू कोहान रहब्या
अउर कब तलक तू हमरी पराथना क रद्द करब्या।
5 आपन मनवइयन क तू बस खाइ क आँसू दिहा ह।
तू आपन मनवइयन क पिअइ बरे आँसुअन स लबालब पिआला दिहा।
6 तू हम लोगन क कूछ अइसा बिसय बनइ दिहा जउने पइ हमार पड़ोसियन झगड़त हीं।
हमार दुस्मन हम लोगन क मसखरी उड़ावत हीं।
7 हे परमेस्सर तू हम लोगन क आपन बरे पुनःस्थापित कइ ल्या।
तू हम लोगन पइ कृपा करा ताकि हम बच सकी।
17 हे परमेस्सर, तू आपन हाथ उ मनई पइ धरा जउन तोहरे दाहिन कइँती अहइ।
उ मनई[a] पइ आपन हथवा धरा जेका तू खुद पाल्या।
18 तउ मइँ तोहका नाहीं तजब।
तू हम पचन क नवा जिन्नगी द्या ताकि हम लोग तोहार आराधना करइ सकब।
19 सर्वसक्तिमान यहोवा परमेस्सर, तू आपन बरे पुनःस्थापित कइ ल्या।
तू हम लोगन पइ कृपा करा ताकि हम पचे जी सकी।
3 हमरे परमपिता कइँती स अउर हमरे पर्भू ईसू मसीह कइँती स तोहे सबन क अनुग्रह अउर सान्ति मिलइ।
पौलुस क परमेस्सर क धन्यबाद
4 तोहे मसीह ईसू मँ जउन अनुग्रह कींहीं गइ बा, ओकरे बरे मइँ तोहरे कइँती स परमेस्सर क हमेसा धन्यबाद करत अहउँ। 5 तोहरे पचन क ईसू मसीह मँ रहइ क कारण हर तरफ स अउर सब बानी अउर सब गियान स परिपूर्ण किहा गवा बा। 6 मसीह क बारे मँ हम जउन साच्छी दिहे अही उ तोहरे बीच मँ प्रमाणित भई बा। 7 अउर एनही क कारण तोहरे लगे ओनके कउनउ इनाम क कमी नाहीं बा। तू हमरे पर्भू ईसू मसीह क परगट होइ बरे इन्तजार करत रहा। 8 उ तोहे अन्त तक हमेसा मजबूत बनाए रही जेहसे जब ओहि दिन तोहमाँ कोई गलती न होइ, जब ईसू फिनि स आवइ। हमार पर्भू ईसू मसीह क दिनवा एकदम निहकलंक, खरा बनाए रखीन। 9 परमेस्सर एकदम बिसवासी अहइ। ओनही क कारण तोहे हमरे पर्भू अउर ओकरे बेटवा ईसू मसीह क सत संगति बरे बुलावा गवा बा।
24 “उ दिनन मँ दारून कस्ट क समइ क पाछे:
‘सूरज करिया पड़ि जाई,
चंदा स ओकर चाँदनी न निकसी।
25 अकास स तारे टूटइ लगिहीं,
अउर अकासे मँ बड़वार सक्ती झकाझोरि दीन्ह जइहीं।’ (A)
26 “तब्बइ मनइयन मनई क पूत क महासक्ती अउर महिमा क संग बदरवन मँ निहरिही। 27 फिन उ आपन दूतन क पठइके चारहु दिसा मँ धरती क छोरे स दूसर छोरे तक सब कइँती स आपन चुना भवा मनइयन क जमा करी।
28 “अंजीरे क बिरवा स उपदेस ल्या कि जबहिं ओकर टहनियन नरम अउर हरिअर होइ जात हीं तउ ओह पइ कोंपर फूटइ लागत हीं। तउ तू पचे जान लेत ह्या कि गर्मी क रितु आवइ क अहइ। 29 अइसे ही जबहिं तू पचे इ सब कछू होत लख्या तउ समझ लिहा कि उ समइ नगिचे आइ ग अहइ, मुला ठीक स दरवज्जे प। 30 मइँ तोसे सच-सच कहत हउँ कि इ सब घटना इत मनइयन क जिअते जी होइहीं. 31 धरती अउर अकास बरबाद होइ जइहीं लेकिन मोर बचन कबहुँ न टारे टरी।
32 “उ दिन या उ घड़ी क बारे मँ कउनो कछू गियान नाहीं, न सरग क दूतन अउर न अबहिं मनई क पूत क, सिरिफ परमपिता जानत बाटइ। 33 होसियार! जागत रहा काहेकि तू नाहीं जनत्या कि उ समइया कब आइ जाई।
34 “ई अइसे अहई कि जइसे कउनो मनई कउनो जात्रा प जात जात आपन नउकरन प आपन घरवा छोड़ि जाए अउर हर मनई क ओकर आपन आपन काम बाँटि दे अउर चौकीदार क हुकुम दइ जाए कि तू जागत रहा। 35 एह बरे तू जागत रहा काहेकि घरे क मालिक न जानी कब आइ जाए। चाहे सांझ होई, की आधी रात की मुर्गन क बाँग क समइ की फिन दिन निकरि आवइ। 36 जदि उ अचानक आइ जा तउ अइसा करा कि जेसे उ तोहका सोवत न पावइ। 37 जउन मइँ तोसे कहत हउँ, उहइ सबते कहत हउँ, ‘जानत रहा!’”
Awadhi Bible: Easy-to-Read Version. Copyright © 2005 Bible League International.