Revised Common Lectionary (Semicontinuous)

¹ मोर मनवइयो, तू पचे मोरे उपदेसन क सुना।
    ओन बातन पइ कान द्या जेनका मइँ बतावत हउँ।
² मइँ तू पचन्क इ कथा सुनाउब।
    मइँ तू पचन्क पुरान कथा सुनाउब।
³ हम पचे इ कहानी सुना ह, अउर ऍका अच्छी तरह जानित ह।
    हम लोगन क पुरखन इ कहानी कहेन ह।
⁴ हम लोग ऍन बातन क आपन सन्तानन स नाहीं छुपाउब।
    हम लोग ऍन बातन क आपन अगवा पीढ़ी क बताउब।
हम लोग ओनसे यहोवा क सक्ति अउर ओकरे अद्भुत कामन क बारे मँ बताउब।
    हम पचे ओनका ओन कामन बरे जेनका उ किहस ह बखान करब।

¹² परमेस्सर ओनकर पुरखन क
    मिस्र क भुइयाँ सोअन मँ निज महासक्ति देखाँइस।
¹³ परमेस्सर लाल सागर क चीरिके दुइ भाग कइके लोगन क पार उतार दिहस।
    उ पानी क मजबूत देवार क तरह दुइनउँ कइँती खड़ा कइ दिहस रहा।
¹⁴ परमेस्सर ओन लोगन क दिन क समइ मँ महा बादर स अगुवाई किहस।
    अउर रात क समइ मँ चमकत भवा आगी स राह देखाँएस।
¹⁵ उ चट्टान क फारेस अउर पानी तेजी स बाहर निकर आवा
    वइसे ही जइसे झड़ना स निकरत ह।
¹⁶ परमेस्सर चट्टान स पानी क धारा
    नदी क नाईं निकारे रहा।

“मइँ तोहार यहोवा परमेस्सर अहउँ।
    मइँ तोहका सिखावत हउँ कि का हितकर अहइ।
    मइँ तोहका राहे पइ लिये चलत हउँ जइसे तोहका चलइ चाही।
¹⁸ अगर तू मानत अहा
    तउ तोहका ओतनी सान्ति मिल जात
    जेतनी नदी भरिके बहत ह।
तोह पइ उत्तिम चिजियन अइसी छाइ जात
    जइसे समुद्र क तरंग होइँ।
¹⁹ जदि तू मानत्या तउ
    तोर सन्तानन बहोत बहोत होतिन, तोहार सन्तानन वइसे अनगिनत होइ जातिन जइसे रेत क असंख्य कण होत हीं।
जदि तू मोर मानत्या तउ तउ तू नस्ट नाहीं होत्य।
    तू भी मोर संग बना होत्य।”