Revised Common Lectionary (Semicontinuous)

¹ जब याकूब क घराना
    बिदेसियन क रास्ट्र मिस्र क तजेस।
² उ समइ यहूदा परमेस्सर क खास मनई बना,
    इस्राएल ओकर राज्ज बन गवा।
³ लाल सागर ऍका लखेस, उ पराइ गवा।
    यरदन नदी उलटिके बह चली।
⁴ पर्वत मेमनन क नाई नाच गएन।
    पहाड़ी भ़ेड़न क नाई नाचि गइन।

⁵ हे लाल सागर, तू काहे पराइ गया?
    हे यरदन नदी, तू काहे उलटी बहिउ?
⁶ हे पहाड़ो, काहे तू पचे भ़ेडन क नाई नाच्या?
    हे पहाड़ियो, तू पचे काहे मेमनन जइसी नाचिउ?

⁷ हे धरती, यहोवा याकूब क परमेस्सर,
    सुआमी क समन्वा काँप।
⁸ परमेस्सर ही चट्टानन क चीरिके जल क बाहेर बहाएस।
    परमेस्सर पक्की चट्टान स जल क झरना बहाए रहा।

³ “तू मोका समुद्दरे मँ लोकॉइ दिहे रह्या।
    तोहार ताकतवर लहरियन मोका थपेड़ा मारेन,
मइँ समुद्दरे क बीच मँ मइँ गहिरा स गहिरा उतरन चला गएउँ।
    मोरे चारिहुँ कइँती सिरिफ पानी ही पानी रहा।
⁴ फुन मइँ सोचेउँ, ‘अब मइँ, जाइ क मजबूर हउँ, जहाँ तोहार दृस्टि मोका देख नाहीं पाइ।’
    मुला मइँ सहायता पावइ क तोहरे पवित्तर मन्दिर कइँती निहारत रहब।

⁵ “समुद्दर क जल मोका लील लिहेस ह।
    पानी मोर मुँह बंद कइ दिहस,
    अउर मोर साँस घुटि गइ।
मइँ गहिर समुद्दरे क बीच उतरत चला गएउँ
    मोरे मूँड़े क चारिहुँ ओर खरपतवार लपट गएन ह।
⁶ मइँ समुद्दरे क तलहटी पइ पड़ा रहेउँ,
    जहाँ पर्वत जन्म लेत हीं।
मोका अइसा लाग, जइसे इ बन्दीघरे क बीच सदा सर्वदा बरे मोह पइ ताला जड़ा अहइँ।
    मुला हे मोर परमेस्सर यहोवा, तू मोका मोर इ कब्र स निकारि लिहा।
हे परमेस्सर, तू मोका जिन्नगी दिहा।

⁷ “जब मइँ बेहोस होत रहेउँ।
    तब मइँ यहोवा क सुमरन किहेउँ हे यहोवा,
मइँ तोहसे बिनती किहेउँ
    अउर तू मोर पराथनन आपन पवित्तर मन्दिर मँ सुन्या।

⁸ “लोग जउन बेकार मूरतियन क पूजा करत हीं
    यहोवा क छोड़ दिहेस जउन कि ओन लोगन बरे दयालु रहेन।
⁹ मुक्ति तउ बस सिरिफ यहोवा स आवत ह!
    हे यहोवा, मइँ तोहका सबइ बलि देब,
अउर तोहार गुन गाउब।
    मइँ तोहार धन्यवाद करब।
मइँ तोहार मन्नतन माँगब अउर आपन मन्नतन क पूरा करब।”