Revised Common Lectionary (Semicontinuous)

¹ मइँ यहोवा क धन्यवाद देत हउँ, काहेकि उ नीक अहइ।
    ओकर पिरेम सदा ही रहत ह।
² इस्राएल इ कहइ द्या,
    “ओकर बिस्ससनीय पिरेम सदा ही रहत ह।”

¹⁷ मइँ जिअत रहब, मइँ मरब नाहीं,
    अउर जउन करम यहोवा किहस ह, मइँ ओन लोगन क गनती फुन स करब।
¹⁸ यहोवा मोका दण्ड दिहस,
    मुला उ मोका मरइ नाहीं दिहस।
¹⁹ सच्चाई क दुआरन क खोला,
    ताकि मइँ भीतर आइ पाउँ अउर यहोवा क आराधना करउँ।
²⁰ यहोवा क मौजूदगी मँ जाइ क दुआर हिआँ अहइ।
    बस सिरिफ धर्मी लोग ही ओन दुआरन स होइके जाइ सकत हीं।
²¹ हे यहोवा, मोर पराथना क जवाब देइ बरे
    अउर मोका रच्छा करइ बरे तोहका धन्यवाद देत अहउँ।

²² जउन पाथार क राज मिस्त्रियन नकार दिहे रहेन
    उहइ पाथर क प्रयोग कोना क पाथर क रूप मँ कीन्ह गवा।
²³ यहोवा इ घटना क होइ दिहस।
    अउर हम सबइ एहमाँ अद्भूत महसूस कीन्ह।
²⁴ इ उहइ दिना अहइ जेका यहोवा बनाएस ह।
    आवा हम खुसी क अनुभव करी अउर आजु आनन्दित होइ जाइ।

⁶ “आप क दाहिन बाँह गजब क सक्ती स भरी अहइ।
    यहोवा आप क दाहिन बाँह दुस्मनन क छिटकाइ बिटकाइ दिहस।
⁷ आप आपन सक्ती अउ बड़की परताप म नसाइ दिहा
    ओन पचेन क जउन खिलाफ खड़ा होइ गएन।
आपक किरोध ओनका उ तरह नास कइ दिहस
    जइसे आगी तिनका क बारि डावत ह।
⁸ आप आपन किरोध मँ जउन तेज हवा क चलाया,
    उ जले क उँचके उछारि दिहेस।
उ जोर स बहत पानी पोढ़ दिवार बनि गवा।
    समुद्दर आपन गहिर स गहिर तले तक ठोस होइ गवा।

⁹ “दुस्मन कहेस,
    ‘मइँ ओनका खदेरब अउ धइ लेब।
मइँ ओनकइ धन दौलत लइ लेब।
    मइँ आपन तरवारि क भांजब अउ ओनकइ हर एक चीज छीन लेब।
    मइँ आपन खातिर सब कछू लइ लेब।’
¹⁰ मुला आप ओनपइ फूँकि दिहन
    अउ सगरे स ओन पचन्क ढाँकि दिहा
उ पचे गहिर सागर मँ सीसा क नाई बूड़ि गएन।

¹¹ “का कउनो देवता यहोवा क समान अहइ? नाहीं,
    आप क बराबरी क कउनो देवता नाहीं,
    तू आपन पवित्तर होइ मँ अजूबा अहा
    तोहरे मँ अचरजवाली सक्ती बाटइ
    आप अजूबा चमत्कार करत हीं।
¹² आप आपन दाहिन हाथ क पसारेस
    अउर धरती ओनका निगल लिहेस।
¹³ आप मेहरबानी कइके लोगन क लइ चलइँ
    जेका आप बचाइन ह।
आप आपन सक्ती स इन लोगन क आपन पवित्तर
    अउ सुहावना भुइँया मँ लइ जाइँ।

¹⁴ “दूसर देस जब इ कथा क सुनिहीं
    अउर उ सबइ डेराइ जइहीं।
पलिस्तीन क मनई डर स कँपिहीं।
¹⁵ तबहिं एदोम क नेतन डर स कँपिहीं
    मोआब क नेतन डर स कँपिहीं,
    कनान क मनई आपन हिम्मत छोड़ि देइहीं।
¹⁶ ओनमाँ डर समाइ जाइ जबहिं उ पचे
    तोहार सक्ती देखिहीं।
इ सबइ चट्टाने क नाई सान्त रइहीं जब तलक यहोवा क लोग निकरि न जाइँ,
    जब तलक उ लोग निकरि न जाइँ जेका आप बनाइन ह।
¹⁷ यहोवा तू आपन पहाड़े ताई आपन लोगन क लइ जा।
    ओनका उ जगहिया मँ रहइ द्या जेका तू आपन सिंहासन बरे बनाएस ह,
    तोहार आपन यहोवा क मन्दिर क बगलमँ, जेका तू आपन हथवा स बनाएस ह।

¹⁸ “यहोवा हमेसा हमेसा राज्ज करत रइहीं।”