◀ All Reading Plans / Revised Common Lectionary (Semicontinuous) / Exodus 24:12-18 (Moses enters the cloud of God’s glory); Psalm 2 (The one begotten of God); or Psalm 99 (Worship upon God’s holy hill); 2 Peter 1:16-21 (Shining with the glory of God); Matthew 17:1-9 (Christ revealed as God’s beloved Son) (Awadhi Bible: Easy-to-Read Version)

Prev Day

February 15, 2026

Next Day

Use the calendar to view readings from this devotional.

February 2026
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28

Return to today's reading

Revised Common Lectionary (Semicontinuous)

Daily Bible readings that follow the church liturgical year, with sequential stories told across multiple weeks.

Duration: 1245 days

निर्गमन 24:12-18

मूसा परमेस्सर क नेम पावइ जात ह

¹²यहोवा मूसा स कहेस, “मोरे लगे पहाड़े प आवा। मइँ आपन उपदेसन अउ आदेसन क दुइ ठु समथर पाथरे क पाटी प लिखे अही। इ आदेसन मनई बरे अहइँ। मइँ इ पाथर क समथर पाटी क तोहका देइहउँ।”

¹³ऍह बरे मूसा अउ ओकर मददगार यहोसू यहोवा क पहाड़े ताई गएन। ¹⁴मूसा चुने भए नेतन स कहेस, “हम दुइनउँ क हिअँइ जोहा। हम तोहरे लगे लउटब। जब तलक मइँ गैर हाजिर रहब, हारून अउ हूर तोहार सासकन रइहीं। ओनके लगे जा जदि कउनो क समस्या होइ।”

मूसा क यहोवा स मिलन

¹⁵तब मूसा पहाड़े प चढ़ा। अउर बादर पहाड़ क ढाँपि लिहेस। ¹⁶परमेस्सर क महिमा सीनै पहाड़े प उतरी। बादर छ: दिना तलक पहाड़े क मूँदे रहा। सतएँ दिन यहोवा, बादर मँ, स मूसा स बोला। ¹⁷इस्राएल क लोग यहोवा क महिमा क लख सकत रहेन। इ पहाड़े क चोटी प भरभराइ क बरत आगी क नाई रहा।

¹⁸तबहिं मूसा बदरे मँ थोड़ा ऊपर पहाड़े प चढ़ा। मूसा पहाड़े पर चालीस दिन अउ चालीस रात रहा।

भजन संहिता 2

¹दूसरे देसन क मनइयन काहे ऍतना हुल्लड़ मचावत हीं अउर रोवत ह?
    अउर काहे बियर्थ सड्यन्त्र रचत हीं?
²अइसे देसन क राजा अउर नेता यहोवा अउर ओकरे चुने भएन राजा क खिलाफ
    होइ बरे आपुस मँ एकजुट होइ जात हीं।
³उ सबइ नेता लोग कहेन, “आवा परमेस्सर स अउ उ राजा स जेका उ चुनेस ह, हम पचे एकजुट होइ क विद्रोह करी।
    आवा ओकरे बन्धनन क हम उतारिके फेंकि देइ।”

⁴मुला मोर सुआमी, सरग क राजा,
    ओन लोगन प हँसत ह।
^5-6परमेस्सर कोहान ह अउर उ ओनसे कहत ह,
    “मइँ इ मनई क राजा बनवइ बरे चुनेउँ ह।
उ मोर पवित्तर पहाड़ सिय्योन पइ राज्ज करी
    अउर इहइ ओन नेता लोगन क डेरावत ह।”

⁷अब मइँ यहोवा क फ़रमान क बारे मँ तोहका बतावत हउँ।
यहोवा मोसे कहे रहा, “आजु मइँ तोहार बाप बनत हउँ
    अउर तू आजु मोर पूत बन गवा ह।
⁸अगर तू मोसे मँगब्या, तउ इ सबइ देसन क मइँ तोहका दइ देबउँ
    अउ इ धरती क सबहिं जन तोहार होइ जइहीं।
⁹तोहरे लगे ओनका बर्बाद करइ क वइसे ही सक्ती होइ
    जइसे कउनो माटी क भाँड़ी क कउनो लोहे क डण्डा स चूर चूर कइ देइ।”

¹⁰एह बरे, हे राजा लोगो, तू पचे बुद्धिमान बना।
    हे सासक लोगो, तू पचे इ पाठे क सीख ल्या।
¹¹तू पचे बहोतइ भय स यहोवा क आग्या माना।
¹²खुद क ओकर क पूत क बिस्सासपात्र देखाँवा।
    वरना उ कोहाइ जाइ अउर तू पचन्क नास कइ देइ।
असल मँ उ पहिले ही काफी कोहाइ चुका भवा ह।
    मुला जउन परमेस्सर पइ निर्भर करत अहइँ धन्य होब।

भजन संहिता 99

¹यहोवा सासन करत ह।
    तउ हे रास्ट्रन, भय स काँप उठा।
उ करूब दूतन ऊँपर आपन सिंहासन पइ विराजमान अहा।
    तउ हे संसार भय स काँपि उठा।
²यहोवा सिय्योन मँ महान अहइ।
    सारे रास्ट्रन क उहइ राजा अहइ।
³सबहिं लोगन क तोहरे महान
    अउर भय योग्य नाउँ क गुण गावइ द्या।
    परमेस्सर पवित्तर बा।
⁴सक्तिसाली राजा क निआउ भावत ह।
    तू ही अहा जउन नेकी क स्थापना किहा ह।
    तू ही अहा जउन इस्राएल बरे निआव अउर खरापन क स्थापना किहा ह।
⁵यहोवा हमरे परमेस्सर क गुणगान करा।
    अउर ओकरे चउकी^[a] चरण निहुरिके दण्डवत करा।
    उ पवित्तर अहइ।
⁶मूसा अउ हारून यहोवा क याजकन रहेन।
    समूएल ओन मँ स एक रहा जउन ओकरे नाउँ लेइवाला रहा।
उ सबइ ओकर पराथना किहेन।
    अउर उ ओनका जवाब दिहस।
⁷उ बादर क खम्भा मँ स बातन किहेस।
    उ पचे ओकरे आदेसन क मानेन।
    परमेस्सर ओनका कानूनन क हुकुमन दिहेस।
⁸हे यहोवा हमार परमेस्सर, तू ओनकर पराथना क जवाब दिहा।
    तू ओनका इ देखाया कि छमा करइवाला परमेस्सर अहा,
    अउर तू लोगन क ओनकर बुरा कर्मन बरे सजा देत अहा।
⁹हमार परमेस्सर यहोवा बरे एक ठु गीत गावा।
    ओकरे पवित्तर पहाड़े कइँती निहुरिके ओकर उपासना करा।
    फुरइ यहोवा हमार परमेस्सर पवित्तर अहइ।

2 पतरस 1:16-21

हम मसीह क महिमा क दर्सन किहत

¹⁶जब हम आपन पर्भू ईसू मसीह क सामरथ क बारे मँ बताए अही अउर ओकरे अवाई क बारे मँ भी कहे अही। तउ हम चालाकी स गढ़ी भइन किस्सन क सहारा नाही लीन्ह काहेकि हम तउ ओहकी महानता क खुदइ गवाहदार अही। ¹⁷जब परमपिता परमेस्सर स उ सम्मान अउर महिमा पाइ लिहस तउ दिव्य उपस्थिति सही विसिस्ठ वाणी परगट भइ रही, “इ मोर पिआरा बेटवा अहइ, मइँ एहसे प्रसन्न हउँ।” ¹⁸हम आकास स आई भइ इ वाणी सुने रहेन। तबहिं तउ हम पवित्तर पर्वत पइ ओकरे साथेन रहेन।

¹⁹हमहूँ क भी नबियन क बचन क पुस्टी पइ अउर जियादा आस्था होइ गइ। इ बात प धियान दइके त पचे इ अच्छा करत अहा काहेकि इ तउ एक प्रकास बाटइ जउन अँधियारे ठाँव मँ तबइ तक चमकत रहत ह जब तलक पौ फाटत ह अउर तोह सबन क हिरदइ मँ भोर क तारा उदय होत ह। ²⁰मुला सबसे बड़ी बात इ अहइ कि तू पचन्क जान लेइ चाही कि पवित्तर सास्तरन क कउनउ भविस्सबाणी नबियन क अपने बिचारन क परिणाम न अहइ। ²¹काहेकि कउनउ मनई जउन कहइ चाहत ह ओकरे अनुसार भविस्सबाणी नाही होत बल्कि पवित्तर आतिमा क प्रेरणा स मनई परमेस्सर क बाणी बोलत ह।

मत्ती 17:1-9

तीन ठु चेलन क मूसा अउर एलिय्याह क संग ईसू क दरसन

(मरकुस 9:2-13; लूका 9:28-36)

17 छः दिना पाछे ईसू, पतरस, याकूब अउर ओकर भाई यूहन्ना क संग लइके अकेल्ले मँ उँचके पहाड़े प गवा। ²हुवाँ ओनके समन्वा ओकर रूप बदल गवा। ओकर मुँहना सूरज क नाई चमचमाइ लाग अउर ओढ़ना अइसे दमकइ लागेन जइसे रोसनी। ³फिन एकाएक ओनके समन्वा मूसा अउर एलिय्याह परगट गएन अउर ईसू स बतियाइ लागेन।

⁴इ लखिके पतरस ईसू स बोला, “पर्भू नीक बाटइ कि हम हियाँ अही। अगर तू चाहा तउ मइँ हियाँ तीन तम्बू बनाइ देई एक ठू तोहरे बरे, एक मूसा बरे अउर एक एलिय्याह क।”

⁵पतरस अबहिं बात करत रहा कि चमचमात बादर आइके ओका ढाकि लिहेस अउर बदरे स अकासबाणी भइ, “इ मोर पिआरा पूत अहइ। जैसे मइँ खूब खुस हउँ। एकर सुना!”

⁶जब चेलन इ सुनेन तउ उ सबइ ऍतना ससाइ गएन कि धरती प मुँहना उलटि के गिरि गएन। ⁷तबहिं ईसू ओनके लगे गवा अउर ओनका छुअत भवा बोला, “डेराअ जिन, खड़ा ह्वा।” ⁸जब उ पचे आँखी क ऊपर करेन तउ हुआँ कहूँ अउर का नाहीं बरन ईसू क पाएन।

⁹जब उ सबइ पहाड़े स उतरत रहेन तउ ईसू ओनका हुकुम दिहेस, “जउन कछू तू देख्या ह, तब ताईं कउनो क जिन बतावा जब ताईं मनई क पूत क मरा भवा मँ स फिन जी न जाइ।”

Awadhi Bible: Easy-to-Read Version (ERV-AWA)