Revised Common Lectionary (Semicontinuous)

^11-12 Toj tkyaqiljo lo, tzˈeltzin kynikyˈa tiˈj tqˈijil jaˈlin, quˈn o qo klet, ex chˈix tul qAjaw qˈilqe te jun majx. Tuˈnpetziˈn, kyqˈonktziˈn tilil, tuˈn kyjaw sakˈpaja toj kynimbˈila. Quˈn tkyaqiljo il chˈix tjapin bˈaj, tzeˈnku jun qnikyˈin, aj ttzaj t‑xe kyaˈj. Tuˈn ikyjo, kytzaqpinkjtzinjiˈy tkyaqil taqˈnbˈin qxopin, a bˈinchj il, ex kyktxunk kyibˈa tukˈa taqˈnil spikyˈin, a tajbˈil qMan, tzeˈnku jun xoˈl qˈaqˈ at xbˈalin ex tkxbˈil te joybˈil qˈoj. ¹³ Qo bˈet‑xix toj tumil ex toj spikyˈin, nya noq tuˈn qloˈn, tuˈn qtxˈujte, tuˈn qkyˈaˈjin, ex jniˈ tzeqbˈil, ex tuˈn qqˈojin, ex tuˈn tloˈchj qkˈuˈj. ¹⁴ Qalaˈ tuˈn tyekˈin qAjaw Jesucrist toj qchwinqil, tzeˈnku jun xbˈalin saq tok qiˈj kywutzxjal. Ex mi txi qqˈoˈn ambˈil tuˈn qbˈinchin a ntqanin ojtxe qteˈn, a nya wen.

³⁶ Me alkye qˈij ex alkye or chin ula, mix aˈl teˈ bˈilte, mixpe aye angel toj kyaˈj, mixpe ayinkuy, a Kˈwalbˈaj te Dios; qalaˈ oˈkx te nMan bˈilte. ³⁷ Quˈn ikytziˈn tzeˈnkuj bˈaj kyojjo qˈij te Noé, ex ikytzin kbˈajiljo, aj wula, ayiˈn Tkˈwal Ichin. ³⁸ Quˈn ikytziˈn tzeˈnqej qˈij, tej naˈmtaq ttzaj qˈaqabˈil; kykyaqil xjal twutz txˈotxˈ nchi bˈaj waˈntaq, ex nchi bˈaj txˈujtetaq, ex nchi bˈaj mejetaq, ex nchi bˈaj xi kyqˈoˈntaq kykˈwal toj mejebˈlin, tzmaxi teˈ kyokx Noé toj ma tij bark. ³⁹ Me ntiˈx bˈiˈn kyuˈn, teˈ ttzaj qˈaqabˈil kyibˈaj, ex bˈeˈx bˈajxi mulqˈaj toj aˈ kykyaqilx. Ikytzin kbˈajiljo, aj wula ayiˈn, a Tkˈwal Ichin. ⁴⁰ Tojjo qˈij anetziˈn, kabˈe ichin nchi aqˈnintaq toj kytxˈotxˈ. Jun teˈ kxel qˈiˈn, ex jun teˈ kyjel. ⁴¹ Ex kabˈe qya nchi cheˈn junx tiˈj kyka. Ex ikyxjo, jun teˈ kxel qˈiˈn, ex jun teˈ kyjel.

⁴² Kyutzˈlinku kyibˈa toj kynimbˈila. Quˈn mi bˈiˈn kyuˈn alkye or kchin ula, a ayiˈn kyAjawiˈy. ⁴³ Tzˈeltzin kynikyˈa te: Noqit bˈiˈn tuˈn jun tajaw ja, jniˈ or tuˈn tkanin ileqˈ qnikyˈin, matla kubˈ tutzˈlin tibˈ, tuˈn mi tzˈokxi ileqˈ elqˈil toj tja. ⁴⁴ Tuˈntzintzjo ikyjo, kybˈinchinku kyibˈa, quˈn ntiˈkux toj kynabˈla aj wula, ayiˈn Tkˈwal Ichin.