Revised Common Lectionary (Semicontinuous)

³ तू आपन जल मुक्ती क झरना स ग्रहण करा।
    तबहिं तू खुस होब्या।
⁴ फुन तू कहब्या,
    “यहोवा क स्तुति करा! ओकरे नाउँ क तू उपासना किया करा।
उ जउन कार्य किहेन ह ओकर लोगन स बखान करा।
    तू ओनका बतावा कि उ केतना महान अहइ।”
⁵ तू यहोवा क स्तुति गावा।
    काहेकि उ महान कार्य किहेस ह।
इ सुभ समाचार क जउन परमेस्सर क अहइ, सारी दुनियाँ फइलावा
    ताकि सबहिं लोग इ सबइ बातन जान जाएँ।
⁶ हे सिय्योन क लोगो, आनन्द क साथ खुस रहा,
    काहेकि इस्राएल क पवित्तर चीज तोहरे बीच एक सक्तिसाली
    मारग क रूप मँ अहइ।

¹⁵ उ जउन ऊँच अहइ अउर जेहका ऊपर उठावा गवा ह,
    उ जउन अमर अहइ,
    उ जेकर नाउँ पवित्तर अहइ,
उ इ कहत ह: “मइँ एक ऊँच अउर पवित्तर जगह पइ रहा करत हउँ
    किन्तु मइँ ओन लोगन क बीच रहा करत हउँ जउन दुःखी अउर विनम्र अहइँ।
अइसे ओन लोगन क मइँ नई जिन्नगी देब जउन मने स विनम्र अहइँ।
    अइसे ओन लोगन का मइँ नई जिन्नगी देब जउन हिरदय स दुःखी अहइँ।
¹⁶ मइँ सदा-सदा ही मुकद्दमा लड़त रहब।
    सदा-सदा ही मइँ तउ किरोधित नाहीं रहब।
जदि मइँ कोहान ही रहउँ
    तउ मनई क आतिमा यानी उ जिन्नगी जेका मइँ ओनका दिहेउँ ह, मोरे समन्वा ही मरि जाई।
¹⁷ उ पचे लालच स हिंसा स भरा स्वारथ साधे रहेन
    अउर मोका किरोधित कइ दिहे रहेन।
मइँ इस्राएल क दण्ड दिहेउँ।
    मइँ ओका निकार दिहेउँ
काहेकि मइँ ओह पइ कोहान रहेउँ अउर इस्राएल मोका तजि दिहस।
    जहाँ कहूँ इस्राएल चाहत रहा, चला गवा।
¹⁸ मइँ इस्राएल क राहन लखि लिहे रहेउँ।
    किन्तु मइँ ओका छिमा करब।
मइँ ओका चैन देब अउर अइसे बचन बोलब जेहसे ओका आराम मिलइ अउर मइँ ओका राह देखाउब।
    फुन ओका अउर ओकरे लोगन क दुःख नाहीं छुइ पाई।
¹⁹ ओन लोगन्क मइँ एक नवा सब्द सान्ति सिखाउब।
    अउर मइँ ओन सबहिं लोगन क आसीर्बाद देब जउन सान्ति क साथ मोरे पास या दूर अहइँ।”
यहोवा इ सब कहेस,
    “मइँ ओन सबहिं लोगन क छिमा करब!”

²⁰ किन्तु दुट्ठ लोग किरोधित सागरे क जइसे होत हीं।
    उ पचे चुप या सान्त नाहीं रहि सकतेन।
उ पचे किरोधित रहत हीं
    अउर समुद्र क तरह कींचा उछारत रहत हीं।
²¹ मोर परमेस्सर क कहब अहइ:
    “दुट्ठ लोगन बरे कहूँ कउनो सान्ति नाहीं अहइ।”