Revised Common Lectionary (Semicontinuous)

Charij mosomi Jesushuan parlashca

¹⁸ Chai q'uipami shuj mandajca, Jesustaca:

–Alli Yachachij, huiñai causaita charingapajca, ¿imatataj rurana cani?– nishpa tapurca.

¹⁹ Chashna tapujpi Jesusca, cashnami nirca:

–¿Ima nishpataj Ñucataca alli ningui? Taita Diosllamari allica. ²⁰ Mandashcataca yachanguillatajca: “Ama huainayangui, ama huañuchingui, ama shuhuangui, ama llullangui, yaya mamata c'uyangui” ninmi– nircami.

²¹ Chashna nijpimi, chai runaca:

–Ñucaca huahuapachamantamari, tucui caicunataca pajtachicuni– nirca.

²² Shina nijpimi, Jesusca cashna nirca:

–Chashnapish shuj illanrajmari. Tucui imalla charishcacunata c'atushpa, huajchacunaman cugri. Chashna rurashpaca, jahua pachapi achcata charijyanguimi. Ñucata catilla– nircami.

²³ Shina nijpi chai runaca, achcata charij cashcamanta achcatami llaquirirca. ²⁴ Chaita ricushpami, Jesusca cashna nirca:

–Achcata charijcuna Taita Dios mandacunman yaicunaca, yallitaj sinchimi. ²⁵ Achcata charijcuna Taita Dios mandacunman yaicunaca, auja rinrinta shuj camello yaicusha nicushcatapish yalli sinchimari– nircami.

²⁶ Chaita uyajcunaca:

–Shinashpaca, ¿pitaj quishpiri tucungari?– nircacunami.

²⁷ Chashna nijpi, Jesusca:

–Pi mana rurai tucushcatapish, Taita Diosca ruranllami– nircami.

²⁸ Shina nijpimi, Pedroca:

–Ñucanchijca canta catingaraicumi tucui imalla charishcacunata saquishcanchij– nirca.

²⁹ Chashna nijpi Jesusca, cashnami nirca:

–Dios mandacunpi yaicusha nijca, huasita, yaya mamata, huauquicunata, huarmita, saquishcami. ³⁰ Paica, cai pachapipish ashtahuan charingami, shamuj punllapipish huiñai causaita japingami, chaica chashnatajmi– nircami.