Revised Common Lectionary (Semicontinuous)

Dee 139 Psalm

To dän Haupt Musikaunt, een Psalm fonn Doft.

¹ O Herr Gott, Du hast mie unjasocht un mie jekjant.

² Du weetst mien Dolsette, un mien oppstone; Du festeist miene Jedanke fonn wiet auf.

³ Du deist mien Stijch derjch säwe, un mien dol laje, un best bekaunt met aul miene Wäaj.

⁴ Dan doa es nijch en Wuat opp miene Tunj, O Herr Gott, du weetst daut aules.

⁵ Du hast mie enn jeschlote hinje un uk fäare, un diene Haunt es opp mie jelajcht.

⁶ Soone Wissenschoft es to wundaboa fa mie, daut es soo huach, ekj kaun daut nijch erlange.

¹³ Dan Du hast mien Ennaschtet bejräpe; du deetst mie enn miene Mutta äa Muttalief toop wäwe.

¹⁴ Ekj woa die danke, dan ekj sie wundaboa met furchtboare Dinje; Diene Woakje sent wundaboa, un miene Seel weet daut seeha goot.

¹⁵ Miene Knoakes weare nijch fonn die festoakje aus ekj emm Jeheeme jemoakt wort, aus mie jewäft wort enn daut deepet fonne Ead.

¹⁶ Diene Uage sage mien Emfange; un aul miene Jlieda weare enn dien Buak dol jeschräwe aus dee jeformt weare, un doa noch kjeene mank an wea.

¹⁷ Un woo kjestlijch sent diene Jedanke to mie, O Gott! Woo groot es dee Somm doafonn!

¹⁸ Wan ekj dee talle sull, sent dee meeha aus daut Saunt; wan ekj oppwakj sie ekj noch bie die.

⁷ Tiechikus, dee en leefsta Brooda en truehe Deena es, uk en Metsklow em Herr, woat junt aules bekaunt moake woo daut met mie steit,

⁸ daem ekj jrod doawaeajen no junt jeschekjt ha, daut jie weete muchte woo daut met mie steit, en daut hee june Hoate treeste mucht;

⁹ uk Onesimus, dee truhe en leefsta Brooda, dee eena fonn junt es. Dee woare junt aules bekaunt moake waut hia paseat.

¹⁰ Aristarkus, dee meet mie em Jefenknes es, jreest junt; uk Markus, Barnabas sien Fada, (fonn daem je aul befael jekjraeaje ha, aulsoo wan hee kjemt, naemt am opp),

¹¹ en Jesus, dee uk Justus heet, dee fonn dee Beschniedinj sent; dise sent de eenstje dee miene Metoabeide sent enn Gott sien Rikj, dee sent fa mie en groote Troost.

¹² En Epafras, eena fonn ju, Jesus Christus sien Sklow, kjamft emma fa junt enn siene Jebaed, daut jie muchte follstendich en gauns aewazeicht enn Gott sien Wele stone.

¹³ Dan ekj jaew am Zeichnes daut hee sikj seeha bemeajt omm junt, uk omm daen dee enn Laoditsaea sent, en dee enn Hierapolis.

¹⁴ Lukas, onns leefsta Dokta Frint, en Deemas lote junt jreese.

¹⁵ Jreest dee Breeda enn Laoditsaea, en Nimfas, uk dee Jemeent enn aea Hus.

¹⁶ En wan dis Breef junt faea jelaest woat, dan sorcht doafaea daut dee uk to dee Jemeent enn Laoditsaea jelaest woat, en daut jie daen Breef aun Laoditsaea uk laese.

¹⁷ Sajcht to Archipus: "Jef Acht opp daen Deenst daen du fom Herr jekjraeaje hast, daut du daen erfele deist".