Revised Common Lectionary (Semicontinuous)

Dee 58 Psalm

To dän Haupt Musikaunt. Doo nijch fenijchte. En jeheemet Schats, fonn Doft.

¹ Woa jie werkjlijch Jerajchtijchkjeit räde em Stelle? Doo jie rajcht rejchte, O Menschesäns?

² Jo, em Hoat doo jie june Henj äare Jewault eewe em Launt.

³ Dee Beese sent framd jemoakt fonn daut Muttalief; dee sent febiestat wan see jebuare sent, un räde Läajes.

⁴ Äa Jeft es soo aus daut Jeft fonn ne Schlanj; soo aus dee doowe Schlanj dee siene Uare toostoppt.

⁵ Dee sien Meista siene Stem nijch heat, wan dee uk seeha goot späle kaun.

⁶ O Gott, bräakj äare Täne enn äa Mul; bräakj dee june Leiw äare groote Täne, O Herr Gott.

⁷ Lot dän wajch schmelte soo aus dee Wotasch dee wajch rane; hee bijcht siene Fiele, oba lot daut soo senne aus wan dee aufjeschnäde sent,

⁸ Soo aus ne Schnigj dee wajch schmelt wan dee delengd jeit, so aus ne Fru äa Misjeburt, dee seene nijch dee Sonn.

⁹ Fer däm daut dee Grope daut Fia fonn dee Dorne feele kaun, auf jreen oda jleajent, woat hee dee wajch fäaje.

¹⁰ Dee Jerajchte woat sikj freihe wan hee Rach sit; hee woat siene Feet wausche enn dee Gottloose äa Bloot.

¹¹ Soo daut en Maun saje woat: "Sejchalijch doa es Loon fa dee Jerajchte; sejchalijch doa es en Gott dee opp dise Ead rejchte deit."

⁷ Denkjt aun june Leara, dee junt Gott sien Wuat jesajcht ha, en kjikjt opp daen Uetfaul fonn aea Waundel, en folcht aea Gloowe no.

⁸ Jesus Christus es daut selwje Jistre, Fonndoag, uk bott aule Eeweichkjeit.

⁹ Lot junt nich wajchleide fonn feschiedenste en framde Lea; dan daut es Goot daut daut Hoat derch Jnod bestaedicht woat, nich derch Aete, daut daen nich waut jenutst haft dee doarenn waundelde.

¹⁰ Wie ha en Aultoa fon daem dee nicht en Racht ha to aete dee daen Tempel deene.

¹¹ Dan dee Kjarpa fonn dee Tiere daen aea Bloot dee Huagapriesta enn daut heilichste enenn drajcht fa sind, woare bute daut Loag febrent.

¹² Aulso haft uk Jesus, omm daut hee daut Follkj derch sien eajnet Bloot heilje kunn, buta dee Puat jelaede.

¹³ Aulso wel wie nu uk rut gone buta dee Loag, siene Schaund met-to-liede;

¹⁴ dan wie ha hia kjeene bliewende Staed, oba seakje daen dee noch kjemt.

¹⁵ Doarom dan wel wie nu derch am emma en Opfa brinje am to lowe, daut es onnse Leppefrucht, sien Nome to bekjane.

¹⁶ Oba fejaet nich Goodet to doone, en met to deele, dan soone Opfa jefaule Gott seeha.

¹⁷ Jehorcht daen, dee junt leide, en siet an unjadon; dan see woake aewa june Seele aus soone dee en Berecht jaewe motte, daut see daut met Freid doone kjene, en nich met staene, dan daut wudd fa junt nich fedeenstlich senne.

¹⁸ Baet fa onns; dan wie sent aewazeicht daut wie en goodet Jewesse ha, enn aule Waeaj onns racht opptofeare.

¹⁹ En ekj pracha junt so fael meeha daut jie daut doone, daut ekj so fael eeha no ju kaun kome.

²⁰ Nu mucht dee Fraedensgott, dee daen groote Schophoad fom Doot rut jeleit haft, onns Herr Jesus Christ, junt derch daut eewjet Bundesbloot

²¹ follstendich hanstale enn aulet Goodet, sien Wele to doone, enn oons daut to follbrinje daut am goot jefelt, derch Jesus Christus, daem aule Ea jeheat enn aule Eewichkjeit; Amen.