Revised Common Lectionary (Semicontinuous)

Dee 81 Psalm

To dän Haupt Musikaunt opp Gittit. Von Asaf.

¹ Sinjt äawalud to Gott onnse Macht; moakt en frooet Jelud to Joakopp sien Gott.

¹⁰ Ekj sie dee Herr Gott jun Gott, dee junt ut Iejipte rut brocht; moakt jun Mul groot op, un ekj woa daut felle.

¹¹ Oba mien Folkj deed nijch no miene Stem horjche; un Iesrael jeef nijch Jehuarsaum to mie.

¹² Un soo äwajeef ekj an to daut hoatnakjet fonn äa Hoat; dee waundle enn äa eajne Stolltheit.

¹³ O wan mien Folkj bloos no miene Stem wudd jehorjcht habe! Wan Iesrael wudd enn miene Wäaj jewaundelt habe,

¹⁴ dan wudd ekj äare Fiend boolt jebandijcht habe; un ekj wudd miene Haunt jäajen äare Fiend jedreit habe-

¹⁵ dee däem Herr Gott hause, sele fer am ut Ferjcht trigj trakje; äare Tiet es fa emma-

¹⁶ jo, Hee wudd an met daut Fattet fonn dän Weit jefoodat habe; un ekj wudd junt tofräd jemoakt habe met Honnijch ut dän Steen.

13 Blieft enn dee Breedaleew.

² Fejaet nich gaustfrie to senne, dan doaderch ha eenje oonbewust Enjel oppjenome.

³ Denkt aun daen dee em Jefenknes sent, so aus wan jie uk met an jefange weare; en daen, dee schlajcht behaundelt woare, so aus jie uk selfst em Lief sent.

⁴ Lot daut befriede laewe eaboa senne en aulem, en daut Eehebad rein bliewe; dan Eehebraeakje en Huare woat Gott rechte.

⁵ Jun Laeweswaundel saul oone Jiets senne, en siet tofraed met waut jie ha, wiel Gott haft jesajcht: "Ekj woa junt opp kjeen wajch felote, en opp kjeen wajch woa ekj junt fesieme".

⁶ Soo daut wie enn follet Toofetruehe kjene saje: "De Herr es mien Halpa, ekj woa mie nich ferchte; waut kjene Menshe mie aundoone?"

⁷ Denkjt aun june Leara, dee junt Gott sien Wuat jesajcht ha, en kjikjt opp daen Uetfaul fonn aea Waundel, en folcht aea Gloowe no.

⁸ Jesus Christus es daut selwje Jistre, Fonndoag, uk bott aule Eeweichkjeit.

¹⁵ Doarom dan wel wie nu derch am emma en Opfa brinje am to lowe, daut es onnse Leppefrucht, sien Nome to bekjane.

¹⁶ Oba fejaet nich Goodet to doone, en met to deele, dan soone Opfa jefaule Gott seeha.

14 Nu pasead daut aus hee enn eena fonn dee Faeaschte fonn dee Farisaea sien Hus enenn jinkj tom aete, daut dee am be-oobachte.

⁷ Hee raed enn Jlikjnesse to daen dee jekroagt weare aus hee sajch woo see de baste Sette waelde, en saed to an:

⁸ "Wan irjentwaea die to ne Kjast enlode deit, sat die nich opp de baste Staed dol, dan wan eena ennjelode es dee meeha Ea haft aus du,

⁹ en dee, dee ju beid enjelode haft no die kjemt en sajcht: 'Jeff dis Maun dien Plauts, dan wusscht du die schaeme motte en daen jeringste Plauts naeme.

¹⁰ Oba, wan du enjelode best, go sat die dol em jeringste Plauts, dan, wan dee kjemt dee die enjelode haft, woat hee to die saje: 'Frint, komm no en hechra Plauts. Dan woascht du Ea habe bie daen, dee met die sette.

¹¹ Dan waeaemma sikj selfst erhaewe deit, woat jedeemuetijcht woare, en waea sikj selfst deemuetijcht, woat erhaeft woare."

¹² Hee saed uk to daem dee am enjelode haud: "Wan du en Medach oda en Owenkost moakst, lod nich diene Frind oda Breeda oda dien Frintschoft oda diene rikje Nobasch enn, wiel dan wudde dee die ne Belooninj senne.

¹³ Oba wan du ne Moltiet utreetst, dan lod dee Oame, Jelaemde, Lome, en Blinje enn.

¹⁴ Dan woascht du jesaeajent senne, dan dee kjenne die nich ne Belooninj trig jaewe; die woat daut oba beloont woare wan dee Jerachte woare fom Doot oppstone."