Revised Common Lectionary (Semicontinuous)

Dee 60 Psalm

To dän Haupt Musikaunt, opp dee Lelje fon Zeijchnes. En jeheeme Schats fonn Doft, tom unjarejchte; aus hee met Aram-naharaim street, en met Aram fonn Zoba, aus Joab trigj kjeem en schluach twalfdusent enn Eedom enn dän Sollt Tol.

¹ O Gott, du hast onns auntsied jeschmäte en jebroake, du, dee du oajalijch weascht; nu nem onns trigj.

² Du moakst dee Ead scheddre; du deetst dee feriete; doo daut ferätnet heele, dan daut deit scheddre.

³ Du hast dien Folkj schwoare Dinje jewäse, du hast onns moakt dän tsettrija Wien drinkje.

⁴ Du hast ne Flag to dän jejäft dee die ferjchte, opp to häwe wäajen dee Woarheit. Selah.

⁵ Doo rade met diene rajchte Haunt, daut dien Leefsta mucht jerat woare.

⁶ Gott haft jerät enn siene Heilijchkjeit, doaromm woa ekj mie freihe; ekj woa Schechem deele, un dee Sukot Tol utmäte.

⁷ Gilead jeheat mie, un Manasse es mient; Efraim es dee Macht fonn mien Kopp; Juda es mien Jesatsjäwa;

⁸ Moab es miene Wauschkomm; äwa Eedom woa ekj miene Schoo rut schmiete; wäajen mie, Filista, jubel enn Siejch.

⁹ Wäa woat mie enn dee stoakje Staut enenn brinje: Wäa woat mie enn Eedom enenn leide?

¹⁰ Best du daut nijch dee onns auntsied jeschmäte haft, O Gott? En woascht du nijch met onnse Armeeha rut gone, O Gott?

¹¹ Jeff onns Help jäajen onns Fient, dan Mensche Help es nutsloos.

¹² Wie woare groote Dinje doone derjch onns Gott, dan hee woat opp onnse Fiend klunje.

²² En hee saed to siene Jinje: "Doaromm saj ekj ju, bekjemmat junt nich aewa jun Laewe, waut jie aete woare, uk nich fa jun Kjarpa, waut jie auntrakje selle.

²² Dan daut Laewe es meeha aus aete, en dee Kjarpa meeha aus Kjleede.

²⁴ Betracht dee Krauje, dee seihe nich, arnte uk nich, en ha nich Spikjasch oda Stalinj, en doch deit Gott an foodre; woo fael meeha se jie weat aus dee?

²⁵ Oda waea fonn ju kaun derch sorje sikj en poa Zoll jrata moake?

²⁶ Doaromm wan jie nich daut weinichste kjenne doone, wuaromm bekjemma jie junt dan omm daut aundre?

²⁷ Betracht dee Lilje, dee spenne nich, waewe uk nich, oba ekj saj ju daut Salomo enn aul siene Harlichkjeit nichemol so straum jekjleet wea aus eena fonn dee.

²⁸ En wan Gott daut Graus em Flek so kjleede deit daut fonn doag wausst en Morje em Owe jeschmaete woat, woo fael meeha woat hee junt kjeede, jie Kjleenjleewje!

²⁹ Aulso seakjt nich no waut jie aete selle, oda waut jie drinkje selle, en siet nich emm Twiewel.

³⁰ Dan dit es no waut dee Weltmensche seakje; en jun Foda weet daut junt daut aules faelt.

³¹ Oba tracht leewa no Gott sien Rikj, en aul dise Dinje woare junt toojelajcht woare.