Revised Common Lectionary (Semicontinuous)

पाँचवा भाग

(भजन 107–150)

इस्राएल क बैभब इस्राएल स मूरति पूजा करवाएस

यहोवा इस्राएलियन क राज्ज लइ लेब

³ अब इस्राएल क लोग कहा करत हीं, “न तउ हमार कउनो राजा अहइ अउर न ही हम यहोवा क मान करित ह। अउर ओकर राजा हमार कछू बिगारि नाहीं सकत ह।”

⁴ ओकर बचन सिरिफ एक सब्दन अहइँ। उ आपन प्रतिग्या क पूरा नाहीं किहेस अउर करार क तोड़ दिहेस। हिआँ बहोत स अदालत क मुकद्दमा अहइँ जइसा खेत मँ उगा भवा खरपतवार।

⁵ सोमरोन क लोग बेतावेन मँ बछवन क पूजा करत हीं अइसे लोग क असलियत मँ विलाप करिहीं। ओन याजक लोग असलियत मँ विलाप करिहीं काहेकि ओकर सुन्नर मूरति खो गइ अहइ। काहेकि ओकर महिमामय मूरतियन क लइ लीन्ह जाब। ⁶ उ पचे अस्सूर राजा क लगे उपहार क रूप लइ लेइ जाब्य जउन हमेसा ओकर संग जुद्ध करत हीं। एप्रैम लज्जित होइहीं, अउर इस्राएल आपन मूरतियन पइ लजाइ। ⁷ सोमरोन क लबार देवतन क बर्बाद कइ दीन्ह जाइ। उ पानी पइ उतरात भए कउनो काठे क टूका जइसा होइ जाइ।

⁸ जउन ठउरन पइ इस्राएल पाप किहेस नस्ट कीन्ह जाब्या। ओनकर वेदियन पइ काँटन अउ घास-फूस उगिहीं। उ पचे पहाड़न स कइहीं, “हमका ढाँपि ल्या” अउर पहाड़िन स कइहीं, “हम पइ भहराइ पड़ा।”

इस्राएल क आपन पापे क भुगतान करइ होइ

⁹ “हे इस्राएल, तू गिबा क समइ स ही पाप करत आया, अउर तू पचे वइसा ही हुआँ भी सुरु कइ दिहेस ह। का गिबा क जउन लोगन बुरा काम किहे रहेन फुरइ जुद्ध क चपेटे मँ नाहीं आहइँ? ¹⁰ मइँ आउब अउर ओनका सज़ा देब। मइँ जातियन क ओनके खिलाफ बटोरब अउर ओनका ओकरे दुई ठू पापन कारण जंजीर स बाँधिहीं।

¹¹ “एप्रैम एक ठू जवान प्रसिच्छत गइया क नाई अहइ जउन खरिहाने मँ अनाज माँड़इ पसन्द करत अहइँ। मइँ ओकरे गटइ पइ जुआ राखब। किन्तु अब मइँ ओका खेत जोताई मँ जियादा कठिन काम देब। मइँ ओह पइ लसुरी लगाउब। यहूदा भुइँया जोतब अउर याकूब कठोर धरती क फोड़ब।”

¹² तोहका आपन प्रतिग्या क पूरा कइके नीक करम बोइ चाही, तउ तू सच्चा पिरेम क फसल काटब्या। इ तोहार बरे नई बात होब्या। इ अइसे धरती क जोतइ क जइसा होइ जेका तू फसल बरे कबहूँ उपयोग नाहीं किहेस। यहोवा क आसीर्बाद लेइ क समइ अहइ जब तक कि उ तोह पइ बर्खा क रूप मँ नीक चिजियन नाहीं देइ।

¹³ मुला तू तउ बदी क एक बिआ बोया ह; तू पचे आपन झूठ क फल भोग्या ह। अइसा एह बरे भवा कि तू आपन रथन पइ निर्भर रह्या अउर आपन फउजियन पइ बिस्सास किहा। ¹⁴ जुद्ध क सोर तोहार लोगन क खिलाफ जियादा स जियादा बढ़िहीं। तोहार सारे गढ़ियन वइसी भहराइ जइसे बेतअरबेल सहर क जुद्ध क समइ सल्मन बर्बाद कइ दीन्ह ग रहा। दुइनउँ महतारी अउर गदेलन क टूका कीन्ह ग रहा। ¹⁵ हे बेतेल, इ तोहार संग होइ काहेकि तू बहोत स कुकर्म किहा ह! भिंसारे ही इस्राएल क राजा क पूरी तरह विनास कीन्ह जाब्या।

ईसू स धनी मनई क सवाल

(मत्ती 19:16-30; लूका 18:18-30)

¹⁷ जइसे उ जात्रा प जाइ क रहा, एक मनई ओकरे लगे आइ अउर घुटुनवा टेकिके बोला अउ ओसे पूछेस, “उत्तम गुरु! अनन्त जीवन पावइ क हक बरे ओका का करइ क चाही?”

¹⁸ ईसू ओसे कहेस, “तू मोका उत्तम काहे कहत ह? सिरिफ परमेस्सर क छोड़िके कउनो उत्तम नाहीं। ¹⁹ तू आदेस क जानत ह। ‘जीउ जिन मारा, व्यभिचार जिन करा, चोरी जिन करा, झूठी गवाही जिन द्या, ठगी जिन करा, आपन महतारी बाप क इज्जत करा।’”

²⁰ उ मनई ओसे कहेस, “गुरु मइँ आपन लरिकइँ स इन सब बातन पर चलत आवत हउँ।”

²¹ ईसू ओका निहारेस। ओकरे बरे पिरेम भाउ रखेस अउर ओसे कहेस, “तोहमाँ ऍक बात क कमी अहइ जा अउर बेंचि आवा जउन तू धरे अहा। तब एक गरीबे क द्या। ओकरे बाद तू सरगे मँ खजाना रखब्या। तब्बई तू आवा अउर मोरे पाछे चला।”

²² अइसे बयान पर ओकर मुँह उतर गवा अउर निरास होइ के चला गवा। इ नाते कि उ धनवान रहा।