Revised Common Lectionary (Semicontinuous)
संगीत निर्देसक बरे कोरह क पूतन बरे एक ठु भजन।
1 हे यहोवा, तू आपन देस पइ कृपालु भवा।
तू विदेस भुइँया मँ स याकूब क सन्तानन वापिस लिआवा।
2 हे यहोवा, तू आपन लोगन क पापन्क छिमा करा।
तू ओनकर सबइ पाप मेट द्या। (सेला)
3 हे यहोवा, कोहाइ जाब क तजि द्या।
अउर तू आपन गुस्सा क लइ लिहा।
4 परमेस्सर, हमार मुक्तिदाता, कृपा कइके हम पचन पइ कोहाइ जाब तजि द्या
अउर हम लोगन क फुन हमार भुइयाँ पइ वापिस लइ आवा।
5 का तू हमेसा हमेसा कोहान रहब्या?
का तू सदा आपन कोहान जारी रखब्या?
6 कृपा कइके हमका फुन जिआइ द्या
ताकि तोहार लोग तोहसे फुन स खुस होइ सकइँ।
7 हे यहोवा, तू हमका आपन बिस्सासनीय पिरेम देखावा।
हमार रच्छा करा।
8 जउन परमेस्सर कहत ह, मइँ ओह पइ कान दिहेउँ।
उ अपने लोगन अउर अपने बिस्सासी चेलों से सान्ति क वाचा करत ह
उ नाहीं चाहत ह कि उ पचे बेवकूफी क राहे पइ लउटि जाइँ।
9 फुरइ, ओकर उद्धार ओन लोगन क निचके बाटइ जउन ओहसे डेरात ह,
एह बरे ओकर महिमा तोहार देस मँ निवास करी।
10 पिरेम अउर सच्चाई एक साथ मिलब।
धर्मता अउ सान्ति एक दूसर क चुम्मा क संग स्वागत करिहीं।
11 सच्चाई धरती स अंकुरित होइहीं,
अउर धार्मिकता अकासे स बसिर्हीं।
12 यहोवा बहोत स उत्तिम वस्तुअन क देइहीं।
अउर हमार धरती प्रचुर मात्रा मँ फसल उपजिहीं।
13 परमेस्सर क अगवा अगवा नेकी चली,
अउर उ ओकरे बरे राह बनाई।
इस्राएल पइ यहोवा क किरोध
4 हे इस्राएल क लोगो, यहोवा क सँदेस क सुना। यहोवा इ देस मँ रहइवालन क अदालत लइ जात हीं काहेकि उ पचे परमेस्सर संग कीन्ह भवा करार क प्रति विस्सासी अउ वफ़ादार नाहीं रहेस ह। वास्तव मँ इ देस क लोगन परमेस्सर क जानतेन ही नाहीं। 2 उ पचे सराप, झूठ, चोरी, बिभिचारी, अहिंसा अउर रक्तपात मँ मसगूल अहइँ। 3 परिणाम, भुइँया विलाप करब्या, अउर एकरे सबहिं निवासियन नस्ट कीन्ह जाब्या। जंगल क जनावरन, आकास क पंछियन अउर सागर क मछरियन तलक भी नस्ट कीन्ह जाब्या। पापी याजकता क खिलाफ यहोवा क बिरोध 4 मइँ कउनो दूसर पइ आरोप जिन लगावत हउँ! हे याजकन, मइँ इ सबइ बातन बरे तोह पइ आरोप लगात हउँ। इहइ कारण मोर मुकद्दमा तोहार खिलाफ अहइ।[a] 5 हे याजकन, तू दिना मँ ठोकर खाउब्या, किन्तू तू अउर नबी दुइनउँ रात क समइ मँ ठोकर खाउब्या। तू आपन लोगन क ही बर्बाद कइ दिहेस ह।[b]
6 “मोर प्रजा क बिनास भवा काहेकि ओन लोग मोका यहोवा क रूप मँ स्वीकार नाहीं किहेस, कारण याजक मोका स्वीकार करइ स इन्कार किहेस। यह बरे मइँ तोहका आपन याजक क रूप मँ स्वीकार नाहीं करब। तू आपन परमेस्सर क बिसरि दिहा ह एह बरे मइँ तोहरी संतानन क बिसरि जाब। 7 उ पचे मोर खिलाफ जेतॅना पाप किहेस ओतॅना ही घमण्डी होइ गएन। यह बरे मइँ ओनकर महिमा क लज्जा मँ बदल देब।
8 “याजक क रूप मँ, उ पचन्क लोगन क पाप भेंटन क खाएस ह। उ पचे चाहेस कि लोग जियादा स जियादा पाप करी। 9 याजकन अउर लोगन क संग एक ही तरह क बेउहार कीन्ह जाब्या। मइँ ओनका ओकरे पाप क कारण सजा देबउँ। मइँ ओनसे ओनकर बुरे करमन क बदला लेबउँ। 10 उ पचे खइहीं मुला उ पचे संतुट्ठ न होइ। उ पचे रण्डीबाजी करिहीं, मुला ओनकइ आबादी न बढ़िहीं। काहेकि उ पचे यहोवा क तजेन ह, अउर उ पचे अबिस्सासी होइके आपन क दूसर देवतन क समर्पित कइ दिहेस ह।
11 “नई दाखरस अउर पूराना दाखरस ओन लोगन स ओनकर तर्क-सक्ति क लइ लेत ह। 12 मोर लोग काठे क मूरती स राय माँगत हीं। ओकर बिस्सास अहइँ कि जादूई छड़ी ओकरे भविस्य क बारे मँ बताई सकत ह। ओन देवतन क संग ओकरे बिभिचारी ओनका भटकइ दिहस ह। उ पचे रण्डी क रहइ बरे उ पचे आपन परमेस्सर क तजि दिहेन। 13 उ पचे पहाड़न क चोटियन पइ बलि चढ़वत ह। उ पचे बलूत, चिनार अउ दूसर लम्बा बृच्छन क तरे धूप बारत ह। ओन बृच्छन क तरखाले क छाया नीक दॅखाँत रही। एह बरे तोहार बिटियन ओन बृच्छन क तरे खूद रण्डीबाजी करइ बरे सोअत ह अउर तोहार बहुअन हुआँ पापे स भरा यौनाचार करत हीं।
14 “मइँ तोहार बिटियन अउ बहुअन क एह बरे सज़ा नाहीं देब कि उ पचे रण्डी क जइसा रहइ के बिभिचारी क काम किहेन ह। काहेकि मनइयन खुद ही रण्डियन क संग यौन सम्बंध बनाएस ह अउर मंदिर क रण्डियन दुआरा बलि चढ़ावत हीं। यह बरे इ कहावत सच अहइ: उ रास्ट्र जउन समझ नाहीं राखत ह ओका बर्बाद कइ दीन्ह जाब्या।
इस्राएल क लज्जा स भरा भवा पाप
15 “हे इस्राएल, तउ प भी तू एक ठु रण्डी क नाई रहत अहा, मोका आसा अहइ कि यहूदा कसूरवार भि नाहीं होइ। यहूदा, तू गिलगाल मँ दाखिल जिन भवा अउर बेतावेन तलक जिन जा। यहोवा क नाउँ पइ किरिया जिन खा इ जिन कहा: ‘यहोवा क जिन्नगी क किरिया, मइँ प्रतिग्या करत हउँ।’ 16 इस्राएल एक ठु जवान हट्टी गाय क नाईं बिद्रोह किहेन ह। हाली ही यहोवा ओनका चरागाह मँ गरेड़िया क नाईं लेइ जाइहीं आपन मेमना क बिसाल घास क मइदान मँ चरइ देत ह।
17 “एप्रैम भी ओकर मूरतियन मँ ओकर संगी बन गवा। तउ ओका अकेल्ले तजि द्या। 18 जब उ पचे दाखरस पिअइ खतम कइ देब, उ पचे आपन रण्डीपन क प्रथा जारी राखब; उ पचे आपन लज्जावाला कामन स बहोत खुस होब। 19 एक बवण्डर इस्राएल क आपन पाखन मँ उड़ाइ लेइ जाब, अउर ओका लेइ जाब काहेकि उ मूर्तियन क भेंट किहेस ह।
15 फिन इ दिनन मँ पतरस भाई-बन्द क बीच खड़ा होइके, जेकर गनती कउनो एक सउ बीस रही, कहेस, 16-17 “मोरे भाइयो, ईसू क गिरफतार करावइ वाले मनइयन क अगुआ यहूदा क बारे मँ, पवित्तर सास्तर कउ लेख जेका दाऊद आपन मुँहे स पवित्तर आतिमा बहोत पहिले ही कहे रही, ओकर पूर होब जरूरी रहा। उ हम पचन मँ गना गवा रहा अउर इ सेवा मँ ओकर हाथ रहा।”
18 (इ मनई जउन धन ओका ओकरे नीचपना क कामे बरे मिला रहा, उ धने स एक ठु खेत मोल लिहेस मुला उ पहिले तउ मूँड़े क बल भहरान अउर फिन बदन फाटि गवा अउर ओकर अँतड़ी बाहेर निकरि आइ। 19 अउर सबइ यरूसलेम क बसइयन क एकर पता लग गवा। य़ह बरे ओनकइ भाखा मँ उ खेत क हक्लदमा कहा गवा जेकर अरथ अहइ “लहू क खेत।”)
20 पतरस कहेस, “काहेकि भजन संहिता मँ इ लिखा बा,
‘ओकर घर उजरि जाइ
अउर ओहमाँ रहइ क कउनो नाँ बचइ।’ (A)
अउर,
‘ओकर, मुखियई कउनो दूसर मनई लइ लेइ।’ (B)
Awadhi Bible: Easy-to-Read Version. Copyright © 2005 Bible League International.