Revised Common Lectionary (Semicontinuous)

Gimel

¹⁷ Jeff dien Deena daut ekj läwe mucht, un ekj woa dien Wuat hoole

¹⁸ Moak miene Uage op un ekj woa wunndafolle Dinje seene enn dien Jesats.

¹⁹ Ekj sie en Framda opp dise Ead; doo dien Aunkommendeare nijch festäakje fonn mie.

²⁰ Miene Seel brakjt fonn daut Felanje fa diene Jerejchte enn jiede Joarestiede.

²¹ Du hast dee Stollte jedodelt, dee fefluchte dee wajch waundre fonn diene Jeboote.

²² Doo Fäaschmiete un Feachte wajch näme fonn mie; dan ekj ha diene Zeijchnisse jehoole.

²³ Helte saute uk un räde jäajen mie; oba dien Deena deit diene Jesatse derjch denkje.

²⁴ Diene Zeijchnisse sent uk mien Fejneaje, miene Rotjäwasch.

Daleth

²⁵ Miene Seel es faust enn daut Stoff; jeff mie Läwe no dien Wuat no.

²⁶ Ekj ha diene Wäaj bekaunt jemoakt, un du deetst mie auntwuate; unjarejcht mie enn diene Jesatse.

²⁷ Halp mie dän Wajch fonn diene Fäaschrefte to festone, un ekj woa opp diene Wunndasch denkje.

²⁸ Miene Seel felt rauf met Trua; moak mie stoakj no dien Wuat no.

²⁹ Nem dän Wajch fonn Leaje wajch fonn mie, un jeff mie Gonnst enn dien Jesats.

³⁰ Ekj ha dän Woarheits Wajch jewält; ekj ha diene Jerejchte emm Jlikje jehoole.

³¹ Ekj ha mie faust jehoole aun diene Zeijchnisse; O Herr Gott, lot mie nijch to Schaund woare.

³² Ekj woa enn dän Wajch fonn dien Aunkommendeare ranne, dan du woascht mien Hoat groot moake.

²⁷ Daut wull Gott bekaunt moake, waut daut Rikjdomm fonn dee Harlichkjeit fonn dit Jeheemnes es mank dee Natsjoone, daut es Christus enn junt, dee Hopninj fa dee Harlichkjeit.

²⁸ Am moak wie bekaunt, en woarne aulamaun, en leare aulemaun enn aule Weisheit, so daut wie aulamaun kjenne follkome enn Christus hanstale;

²⁹ en fa daut oabeid en straew ekj no sien wirkje dee enn mie wirkjt met Krauft.

2 Ekj wel ha daut jie weete sele woo seeha ekj mie aunstrenj fa junt en dee enn Laoditsaea, en aul dee, dee mie fonn Jesecht noch nich jeseene ha,

² daut aeare Hoate muchte jetreest woare, en enn Leew febunje, en fa aulet rikje enn sechaheit fonn follet Erkjantnes fonn daut Jeheemnes fonn Gott, fonn Christus,

³ enn daem aul daut Schats fonn Weisheit en Erkjantnes bewoat es.

⁴ Dit saj ekj so daut kjeene junt bedudle sull met glaute Wead.

⁵ Dan wan ekj kjarpalich uk nich doa sie, sie ekj doch em Jeist bie junt, en frei mie enn daem daut ekj june Ordninj see, en woo jie soo staunthauft sent em Gloowe enn Christus.

⁶ Soo aus jie Jesus Christus, de Herr, aunjenome ha, soo waundelt uk enn am,

⁷ jewartelt en oppjebut enn am, en bestaedicht emm Gloowe soo aus jie jeleat sent, en rikjlich dankboa.