Revised Common Lectionary (Semicontinuous)

Dee 52 Psalm

To dän Haupt Musikaunt: en Nodenkje: en Psalm fonn Doft- aus Doeg dee Eedomieta kjeem en fetald Saul, en säd to am: "Doft es no däm Ahimilech sien Hus jekome."

¹ Wuaromm deist du die enn Beeset puche, O majchtja Maun? Gott sien Erboarme es eewijch!

² Diene Tunj deit Fenijchte utjrebble soo aus en schoapet Putsmassa, un deit Lest wirkje.

³ Du hast Beeset meeha leef aus Goodet; Leaje meeha aus Jerajchtijchkjeit to räde. Selah.

⁴ Du hast aule Wead leef dee oppschlucke, O lestje Tunj!

⁵ Gott woat die jrod soo fenijchte fa emma; Hee woat die wajch näme, soogoa wajch plekje fonn dien Tselt; un erut riete fonn daut Launt wua dee Läwendje sent. Selah.

⁶ Un dee Jerajchte sele seene un ferjchte, un äwa am lache, en saje:

⁷ Hia es dee Maun dee Gott nijch siene Tooflucht muak, hee fetrued sikj enn sien Rikjdom; hee wea stoakj enn sien Fenijchte.

⁸ Oba ekj sie soo aus en jreena Oliewaboom enn Gott sien Hus; ekj doo enn Gott sien Erboarme fetruehe fa emma un emma.

⁹ Ekj wel die fa emma danke, wiels du daut jedone hast, un ekj doo enn dien Nome hope, wiels daut es Goot enn dee Heilje äa Doasenne.

¹⁵ Dee es Gott, daem wie nich seene kjenne, sien Bilt, en es dee Easchtjebuarne fonn aula Kjreatua,

¹⁶ wiel derch am es aules jeschaufe, enne Himels en oppe Ead, daut to seene es, oda nich to seene es, auf daut Troone sent, oda Jewaultje, Rejearunga, oda Harschoffte; aules es derch am, en fa am jeschaufe.

¹⁷ Hee wea eeha aus aules, en aules besteit enn am.

¹⁸ Hee es daut Haupt fonn daem Kjarpa, dee Jemeent, dee de Aunfank es, dee Easchtjebuarna fonn dee Doodes, soo daut hee aewa aules daen easchta Plauts hoole saul.

¹⁹ Dan daut jefoll Gott daut enn am sull de folle Gottheit wone,

²⁰ en daut derch am aules to sikj selfst sull fereen jemoakt woare derch daut Bloot fonn sien Kjriets, derch am, auf daut nu Dinje oppe Ead sent, oda Dinje enne Himels.

²¹ En jie, dee jie donn Framde en Fiend weare enn jun Senn derch beese Woakje,

²² haft hee nu toop jebrocht enn daem Kjarpa fonn sien Doot, daut hee junt mucht Heilich en oone Schult en oone Strof fer am hanstale,

²³ wan jie enn jun Gloowe aunhoole, jejrint en faust stone, en junt nich wajch leide lote fonn dee Hopninj em Evanjeelium duat jie heade, daut enn dee gaunse Kjreatua jepraedijt es unja daem Himel, wuato ekj, Paul, en Deena jemoakt sie.

²⁴ Ekj frei mie enn mien liede omm junethaulwe, en fel opp enn mien Fleesch waut noch faelt aun Christus sien Triebsaul waeajen sien Kjarpa, daut es dee Jemeent,

²⁵ fonn woont ekj en Deena jeworde sie no Gott siene Fewaultinj dee mie jejaeft es fa junt, Gott sien Wuat foadich to brinje;

²⁶ daut es daut Jeheemnes daut fonn Welthaea, en fonn Jeschlachte fewoat wea - oba nu dee Heilje es jeoopenboat worde.

²⁷ Daut wull Gott bekaunt moake, waut daut Rikjdomm fonn dee Harlichkjeit fonn dit Jeheemnes es mank dee Natsjoone, daut es Christus enn junt, dee Hopninj fa dee Harlichkjeit.

²⁸ Am moak wie bekaunt, en woarne aulamaun, en leare aulemaun enn aule Weisheit, so daut wie aulamaun kjenne follkome enn Christus hanstale;

³⁸ Aus see entlengd jinje kjeeme see enn en jewesset Darp enenn, en doa wea ne jewesse Fru dee Marta heet, dee neem am opp enn aea Hus.

³⁹ See haud ne Sesta dee Marie heet, dee saut bie daem Herr siene Feet en horcht no waut hee saed;

⁴⁰ oba Marta wea besorcht omm fael to doone, en kjeem no am en saed: "Herr, jefst du nusscht dromm daut miene Sesta mie haft auleen jelote to deene? Saj aea dan daut see mie halpt."

⁴¹ Oba de Herr auntwuad en saed: "Marta, Marta, du best besorcht en oppjeraeacht aewa fael Dinje, oba doa es weinch daut needich es, aentlich mau eent; en Marie haft daut goodet jewaelt, en daut woat nich fonn aea wajch jenome woare."