Revised Common Lectionary (Semicontinuous)

Efesopimi Pablo huillashca

19 Apolos Corintopi cajpimi, Pabloca jahua llajtacunata purishpa, Efesoman chayarca. Chaipimi huaquin crijcunahuan tuparca. ² Paicunatami:

–Cancuna crij tucushpaca, ¿jucha illaj Espiritutaca chasquircanguichijchu?– nishpa tapurca.

Chashna tapujpica:

–Jucha illaj Espíritu tiyashcataca, mana uyashcanchijllapishchu– nircacunami.

³ Shina nijpi Pabloca:

–¿Shinashpaca, imata crijpitaj cancunataca bautiźarca?– nijpi paicunaca:

–Juan yachachishcata chasquijllapimi bautiźarca– nircacuna.

⁴ Shina nijpimi, Pabloca:

–Juanca paipajman shamujcunataca: “Ñucapaj q'uipa shamujta cringuichij” nircami. Chashna nishpami, Diospajman cutirijcunataca bautiźarca. Jesustaca, Quishpichij Cristo cashcata crichun nishpami chashna nirca– nishpami alli entendichirca.

⁵ Pablo chashna huillajta uyashpaca, Apunchij Jesuspaj shutipimi bautiźarircacuna. ⁶ Chai q'uipa Pablo paicunapaj jahuapi maquita churajpimi, jucha illaj Espíritu paicunata japirca. Chaimantami shujtaj rimaicunata rimarcacuna, Dios ima nishcatapish huillarcacunami. ⁷ Paicunaca, chunga ishqui shinallami carca.

⁸ Pabloca, quimsa quillatami chai pueblopica, Taita Dios mandacunta paicunapish crichun, tandanacuna huasipi, mana manchashpa, alli huillarca. ⁹ Chashna huillajpipish taucacunami rumi shungu tucushpa, manataj crishun nircacuna. Crinapaj randica tucuicunapaj ñaupajpimi, ‘Jesuspaj Ñanta catinaca mana allichu’ nishpa rimarcacuna. Chaimantami Pabloca crijcunapuralla raquirishpa, Tirano shuti runa yachachina huasipi tandanacunata callarirca. Chaipimi, punllanta parlanacushpa yachachij carca. ¹⁰ Chashnami chai Asia llajtapica, Pabloca ishqui huatata causarca. Apunchij Jesusmanta alli huillaita Pablo chai huatacunapi huillashcataca tucui judiocunapish, griegocunapishmi uyarca.