Revised Common Lectionary (Semicontinuous)
Setyèm twonpèt la sonnen
15 Setyèm zanj lan sonnen twonpèt la. Yon bann gwo vwa soti nan syèl la. Yo t ap di:
“Kounye a, wayòm mond lan se pou Senyè nou an ansanm ak Mesi li a,
l ap renye sou li pou tout tan gen tan.”
16 Lè sa a, 24 granmoun yo, ki chita devan Bondye yo tonbe fas a tè devan twòn Bondye a, yo t ap adore Bondye. 17 Yo t ap di:
“N ap di w mèsi, Senyè Bondye Toupuisan.
Se ou menm sèl ki egziste epi ki te toujou egziste.
Mèsi paske ou sèvi ak gwo puisans ou genyen
epi ou tabli pouvwa w.
18 Nasyon yo te an kòlè,
men kounye a, kòlè pa w rive.
Kounye a, jou jijman mò yo rive.
Lè a rive pou rekonpanse sèvitè w yo, pwofèt yo,
pou rekonpanse moun ki apa pou ou yo,
ansanm ak sa yo ki gen krentif pou non ou yo,
piti kou gran.
Lè a rive pou ou detwi
moun sa yo ki t ap detwi latè yo!”
19 Lè sa a, tanp Bondye a ki nan syèl la te louvri. Kòf Alyans lan te la, nan tanp lan. Te gen anpil zeklè, anpil bri, anpil kout loray, yon trannmantè ak anpil gwo moso glas ki t ap tonbe a tè.
Copyright © 2017 by Bible League International