Revised Common Lectionary (Semicontinuous)

Dee 63 Psalm

En Psalm fonn Doft aus hee enn dee Judah Wiltnes wea.

¹ O Gott, du best mien Gott; earnstlijch seakj ekj die; miene Seel darscht fa die; mien Fleesch sänt sikj no die soo aus enn en dreajet un meedet Launt un oone Wota,

² Doaromm ha ekj die jeseene enn dee heilje Staed, un sach diene Macht un diene Harlijchkjeit.

³ Dan diene Leeftolijchkjeit es bäta aus daut Läwe; miene Leppe jäwe Preis to die.

⁴ Doaromm woa ekj die säajne soo lang aus ekj laew; ekj woa miene Henj opphäwe enn dien Nome.

⁵ Miene Seel saul tofräd senne, soo aus met Moajch un Fattet; un mien Mul saul die preise met froohe Leppe,

⁶ Wan ekj die behoole doo opp mien Bad, dan woa ekj aun die denkje enn dee Nachtwoacke.

⁷ Dan du best en Help jewast to mie, en ekj woa mie freihe unja dee Schaute fonn diene Flijchte.

⁸ Miene Seel es dijcht met die febunje – diene rajchte Haunt deit mie opprajcht hoole.

⁹ En soone dee seakje mien Läwe to fenijchte sele rauf gone no daut Deepet enne Ead.

¹⁰ Dee sele utjegote woare met daut Schweat; dee sele jejäft woare to dee Hunj.

¹¹ Oba dee Kjeenijch woat sikj enn Gott freihe; jieda eena dee bie Gott schweare deit saul feharlijche, wiels dee Läajna äare Miela sele toojestoppt woare.

11 Donn wort mie en Rua soo aus ne Stang jejaeft, en mie wort jesajcht: "Sto opp, go en doo daem Temepl maete, uk daem Aultoa, en dee, dee doabenne aunbaede.

² Oba lot daen Hoff dee butarem Tempel es ut, en doo daen nich maete, dan dee, en dee heilje Staut es dee Natsjoone fa tweeafeatich Moonat aewajaeft.

³ En ekj woa miene twee Zeij, aunjekjleet met Sakjleeda, Follmacht jaewe, en dee woare dusent twee hundat en tsastich Doag profitseihe.

⁴ Dit sent dee twee Eeljbeem, en dee twee Laumpahoola dee fer daem Herr aewa dee Ead stone."

⁵ En wan irjentwaea daen wel Schode doone, dan kjemt Fia ut aea Mul, en brinjt aeare Fiend omm; en wan irjentwaea daen wel Schode doone, dan mott dee soo doot jemoakt woare.

⁶ Dise ha dee Follmacht daen Himel too to moake dautet nich raeajne woat enn dee Doag wan see profitseiehe, en ha Follmacht Wota to Bloot to moake, en dee Ead met aulahaunt Ploag to schlone, soo foaken aus see wele.

⁷ En wan aea Zeichnes foadich es, dan woat daut Tia, daut fonne Aufgrunnt kjemt, Kjrich met an moake, en aewa an jewenne, en an doot moake.

⁸ En aeare doodje Kjarpa woare enn dee opne Gaus lige enn dee groote Staut, dee jeistlich Soodom heet, en Iejipte, wua uk aea Herr jekjrietsicht wort.

⁹ En walkje fonn dee Mensche en Stam en Sproake en Natsjoone woare aeare Kjarpa fa dree ene haulf Doag seene, en woare dee Kjarpa nich begrowe lote.

¹⁰ En dee, dee oppe Ead wone woare sikj freihe en froo senne, en woare sikj unjeranaunda Jeschenkje schekje, wiel dise twee haude daen dee oppe Ead wone seeha jekjwaelt.

¹¹ No dree ene haulf Doag, kjeem dee laewendje Jeist fonn Gott enn an ennen, en see stunnde opp aeare Feet, en groote Angst kjeem opp aul daen dee an sage.

¹² En see heade ne lude Stem utem Himel to an saje: "Komt hia enopp!" en see fuare enopp nom Himel enn ne Wolkj, en aul aeare Fiend sage an.

¹³ Enn dee selwje Stund wea doa en grootet Eadbaebe, en daut teande poat fonn dee Staut foll, en saewen dusaent Mensche kjeeme to doot, en dee aewrije haude groote Angst, en jeewe Gott em Himel de Ea.

¹⁴ Daut tweede Wee es febie, en kjikj! daut drede Wee kjemt schwind.