Revised Common Lectionary (Semicontinuous)

Dee 113 Psalm

¹ Preis däm Herr Gott! Preis, O jie däm Herr Gott siene Deene, preis däm Herr Gott sien Nome.

² Jesäajent es däm Herr Gott sien Nome fonn nu aun un wieda fa emma.

³ Fonn Sonn Oppgank bott sien Unjagank saul däm Herr Gott sien Nome jepreist woare.

⁴ Dee Herr Gott es huach äwa aule Nazione, siene Harlijchkejit bowe dee Himmels.

⁵ Wäa es soo aus dee Herr Gott onns Gott, dee huach bowe set doa to wone;

⁶ Dee sikj selfst deemietijcht aules enn dee gaunse Welt un dee Himmels to bedenkje!

⁷ Hee häft dee Oame opp utem Stoff; un Hee häft dee Bederftje ut däm Mesthuppe,

⁸ soo daut dee met Helte sette doone, met dee Helte fonn sien Folkj.

⁹ Hee moakt dee Fru oone Kjinje emm Hus to wone soo aus ne froohe Mutta fonn Säns. Preis däm Herr Gott.!

¹⁶ En hee kjeem no Natsaret wua hee oppjewosse wea, en soo aus siene Jewanheit wea, jinkj hee aum Saubat enne Sienagoog enenn, en stunnt opp to laese.

¹⁷ En am wort daut Buuk Jesaja jejeaft. En hee muak daut Buuk op en funk wua daut jeschraewe steit:

¹⁸ "Daem Herr sien Jeist es opp mie, en haft mie ennjesaeajent dee Oame daut Evanjeelium to preadje; hee haft mie jeschekjt dee Jefangne to saje daut see loos jelote sent; en daut dee Blinje seene sele, dee frie to moake dee unjadrekjt sent,

¹⁹ en bekaunt to moake daut dit Gott sien aunjenaemet Yoa es."

²⁰ En aus hee daut Buuk haud toojemoakt en trig jejaeft aun daen Deena, sad hee sikj dol; en aulamaun enne Sienagoog haud siene Uage opp am en kjikjt am niel aun.

²¹ En hee funk aun an to saje: "Fonndoag es dise Schreft erfelt en jun jehea."

²² En aule jeewe am Zeichnes en wunndade sikj aewa dee Jnodje Wead dee hee raed, en saede: "Es dit nich Joosaf sien Saen?"

²³ En hee saed to an: "Jie woare mie secha dit Schprechwuat faeahoole: Dokta, heel dieselfst! Waut wie jeheat ha daut du enn Kapernaum deetst, doo uk hia wua du Tus best!"

²⁴ En hee saed: "Enn Woarheit saj ekj ju: en Profeet es enn siene eajne Staut nich aunjenaem.

²⁵ Enn Woarheit saj ekj ju, doa weare fael Waetfruhes enn Iesrael enn Elia siene Tiet, aus dee Himel fa dree Yoa en sas Moonat feschlote wea en doa ne groote Hungaschnoot aewa daut gaunse Launt kjeem,

²⁶ en doch wort Elia no kjeene jeschekjt buta no Sarepta enn Siedoon no ne Fru dee ne Waetfru wea.

²⁷ En doa weare fael utsautsje in Iesrael to daem Profeet Eliesa siene Tiet, en doch nich eena fonn dee wea rein jemoakt buta Naheeman fonn Sierean."

²⁸ Aul dee enne Sienagoog, aus see daut heade, weare foll Oaja,

²⁹ en stunnde opp en schmeete am ut dee Staut erut, en leide am no en steile Aufgrunt fom Boaj opp daen dee Staut jebuet wea, omm daut see am rauf schmiete wudde.

³⁰ Oba hee jinkj medenderch an en jinkj wajch.