Revised Common Lectionary (Semicontinuous)

Dee 75 Psalm

To dän Haupt Musikaunt. Doo nijch fenijchte. En Psalm von Asaf, en Leet.

¹ Wie ha die Dank jejäft, O Gott; wie ha die jepreist; dan dien Nome is dijchtbie; diene wundafolle Woakje sent fonn jerät worde.

² Wan ekj dee rajchte Tiet näme woa, dan woa ekj enn Jerajchtijchkjeit rejchte.

³ De Ead, un aul dee, dee doabenne wone, sent feschmolte; ekj ha dee Stendasch faust jesalt. Selah

⁴ Ekj säd to dee Stollte: "Siet nijch stollt;" un to dee Gottloose: "doot jun Huarn nijch opphäwe."

⁵ Doot jun Huarn nijch huach opphäwe, un doot nijch met en stiewet Jnekj räde.

⁶ Dan Huaget kjemt nijch fomm Ooste, oda fomm Waste, uck nijch fonn dee Wiltnes;

⁷ Oba Gott es dee Rejchta, hee deit disen rauf steete, un daem näakjsta nehejcht häwe.

⁸ Dan doa es en Kuffel enn däm Herr Gott siene Haunt, un dee Wien deit Schume, daut es em folle ennjereat; un hee deit daut utjeete doafonn; sejchalijch motte aul dee Gottloose doafonn drinkje bottet aules wajch es.

⁹ Oba ekj woa fa emma zeije, ekj woa Preis sinje to Joakopp sien Gott.

¹⁰ En ekj woa aul fonn dee Gottloose äare Heanna aufschniede, oba dee Jerajchte äare Heanna woare oppjehowe woare.

6 Doaromm wel wie nu daut Aunfank fonn dee Lea fonn Christus lote, en wel wie ferwauts gone, en nich wada en Grunt laje fonn Buesse fonn doodje Woakje, en fonn Gloowe Gott jaeajenaewa,

² fonn dee Lea fonn dee Taufe, en fonn Henj opplaje, en daut dee Doodes oppstone, en fonn daut eewjet Jerecht.

³ En dit woa wie doone, wan Gott daut werklich toolat.

⁴ Dan daut es nich maeajlich daen, dee tom Licht jekome sent en ha de himlische Gow jeschmakjt, en ha aundeel jehaut aun daem Heilje Jeist,

⁵ en ha daut goodet Gotteswuat jeschmakjt, en dee Krauft fonn dee komende Welt,

⁶ wan see wajch faule, an wada to Buesse to brinje, wiel see daem Gottes Saen fa sikj sellfst fom fresche kjrietsje, en am toom opnet Spott moake.

⁷ Dan dee Ead, dee so foaken daen Raeajen drinkjt dee doanopp felt, en goodet Fooda brinkjt fa daen dee daut be-oabeide, woat fonn Gott jesaeajent.

⁸ oba daut waut Dorne en Distle brinjt, woat auntsied jesat, en es bottem fefluche, en aum Enj woatet febrennt.

⁹ Oba wie sent baetret aewazeicht fonn junt, Breeda, wan wie uk soo raede, en soont daut Seelichkjei aunjeheat.

¹⁰ Dan Gott es nich Onnjerajcht june goode Oabeit to fejaete, en dee Leew dee jie fa sien Nome jewaese ha, en daem daut jie dee Heilje jedeent ha, uk noch deene.

¹¹ En wie welle jearen seene daut en jieda eena de naemlije Earnst bewiese woat omm dee folle Hopninj Sechaheit to ha bottem Enj,

¹² daut jie nich Stomp woare, oba daen nofolje dee derch Gloowe en Jedult daut oawe waut fesproake es.