Revised Common Lectionary (Semicontinuous)

⁸ నేను పరుగెత్తి పోదును.
    నేను తప్పించుకొని పారిపోదును. ఈ కష్టాల తుఫాను నుండి నేను పారిపోదును.
⁹ నా ప్రభువా, వారి అబద్ధపు మాటలను తారుమారు చేయుము.
    ఈ పట్టణంలో చాలా బలాత్కారం పోట్లాటలను నేను చూస్తున్నాను.
¹⁰ పట్టణం చుట్టూ దాని గోడల మీద రాత్రింబగళ్లు బలాత్కారము, యుద్ధము నడుస్తున్నాయి.
    ఈ పట్టణంలో దారుణమైన సంగతులు జరుగుతున్నాయి.
¹¹ వీధుల్లో చాలా నేరం ప్రబలుతుంది.
    ఎక్కడ చూచినా మనుష్యులు అబద్ధాలాడుతూ ప్రజలను మోసం చేస్తున్నారు.

¹² ఒకవేళ శత్రువు నన్ను అవమానించటమే అయితే
    దానిని నేను భరించగలను.
ఒకవేళ నా శత్రువులు నాపై దాడిచేస్తే
    నేను దాక్కోగలను.
¹³ కాని, అది చేస్తున్నది నీవే.
    నీవు, నాకు తగినవాడవు, నా సహవాసివి, నా దగ్గర స్నేహితుడివి. నీవే నాకు కష్టాలు కలిగిస్తున్నావు.
¹⁴ మనం కలిసి మధుర సంభాషణ చేసేవాళ్లము.
    దేవుని ఆలయంలో మనము కలిసి సహవాసంలో నడిచాము.

¹⁵ నా శత్రువులు వారి సమయం రాకముందే మరణిస్తారనుకొంటాను.
    వారు సజీవంగానే సమాధి చేయబడ్తారని ఆశిస్తాను.
    ఎందుచేతనంటే వారు తమ ఇండ్లలో అలాంటి దారుణ విషయాలకు పథకాలు వేస్తారు.

⁷ “యోబూ! మొట్ట మొదట పుట్టింది నీవే అని తలుస్తున్నావా?
    కొండలు చేయబడక ముందే నీవు జన్మించావా?
⁸ దేవుని రహస్య పథకాలు నీవు విన్నావా?
    నీ మట్టుకు నీవు ఒక్కడవు మాత్రమే జ్ఞానం గలవాడవని తలుస్తున్నావా?
⁹ యోబూ! నీకు తెలిసిన దానికంటే మాకు ఎక్కువ తెలుసు.
    నీవు గ్రహించలేని విషయాలు మేము గ్రహిస్తాం.
¹⁰ తల నెరసిన మనుష్యులు మరియు వృద్ధులు మాతో ఏకీభవిస్తారు.
    అవును, చివరికి నీ తండ్రికంటే పెద్ద వాళ్లు కూడా మా పక్షంగా ఉన్నారు.
¹¹ దేవుడు నిన్ను ఆదరించేందుకు ప్రయత్నిస్తాడు
    కానీ నీకు అది మాత్రమే చాలదు.
సౌమ్యమయిన పద్ధతిలో దేవుని సందేశం మేము నీకు చెప్పాము.
¹² యోబూ! నీవెందుకు అర్థం చేసుకోవు?
    సత్యాన్ని ఎందుకు చూడలేక పోతున్నావు?
¹³ నీవు ఈ కోపపు మాటలు చెప్పినప్పుడు
    నీవు దేవునికి విరోధంగా ఉన్నావు.

¹⁴ “ఒక మనిషి వాస్తవంగా పరిశుద్ధంగా ఉండలేడు.
    స్త్రీ నుంచి జన్మించిన మనిషి, దేవునితో సరిపడి ఉండ జాలడు.
¹⁵ దేవుడు కనీసం తన దూతలను కూడ నమ్మడు.
    దూతలు నివసించే ఆకాశం కూడా పవిత్రమైనది కాదు.
¹⁶ మానవుడు అంతకంటే దౌర్భాగ్యుడు.
    మానవుడు అసహ్యమైనవాడు మరియు పాడైపోయాడు.
    అతడు మంచి నీళ్లు త్రాగినట్టుగా కీడును త్రాగుతాడు.

¹⁷ “యోబూ, నా మాట విను. నేను దానిని నీకు వివరిస్తాను.
    నాకు తెలిసిన దానిని నేను నీతో చెబుతాను.
¹⁸ జ్ఞానం గల మనుష్యులు నాతో చెప్పిన విషయాలు నేను నీతో చెబుతాను.
    ఆ జ్ఞానం గల మనుష్యుల పూర్వీకులు ఈ విషయాలను వారితో చెప్పారు.
    ఆ జ్ఞానులు రహస్యాలేమీ నా దగ్గర దాచిపెట్టలేదు.
¹⁹ వారికే (జ్ఞానులకే) దేశం ఇవ్వబడింది.
    వారిని ఇబ్బంది పెట్టేందుకు పరాయివాళ్లు ఎవరూ ఆ దేశంలో లేరు.
²⁰ దుర్మార్గుడు తన జీవితకాలమంతా బాధతో శ్రమ పడతాడు.
    క్రూరమైన మనిషి తన కోసం దాచ బడిన సంవత్సరాలన్నింటిలో శ్రమపడతాడు,
²¹ భయంకర శబ్దాలు అతని చెవులకు వినిపిస్తాయి
    మరియు అతడు క్షేమంగా ఉన్నానని అనుకొన్నప్పుడు శత్రువు అతని మీద దాడి చేస్తాడు.
²² దుర్మార్గపు వ్యక్తి చాలా విసిగిపోతాడు. చీకటి నుండి తప్పించుకొనే ఆశ అతనికి ఉండదు.
    అతణ్ణి చంపివేసేందుకు ఎక్కడో ఒక ఖడ్గం కనిపెడుతూనే ఉంటుంది.
²³ అతడు అటూ ఇటూ ఆహారం కోసం ‘ఎక్కడ అది’ అంటూ సంచరిస్తూనే ఉంటాడు.
    కాని అతని శరీరం రాబందులకు ఆహారం అవుతుంది. అతనికి చావు మూడిందని అతనికి తెలుసు.
²⁴ చింత, శ్రమ అతణ్ణి భయపెడుతున్నాయి. అతణ్ణి నాశనం చేసేందుకు
    ఒక రాజు సిద్ధంగా ఉన్నట్టు ఈ విషయాలు అతనిపై దాడి చేస్తాయి.
²⁵ ఎందుకంటే దుర్మార్గుడు దేవుని మీద తన పిడికిలి బిగిస్తాడు కనుక దుర్మార్గుడు దేవునికి విధేయుడయ్యేందుకు నిరాకరిస్తాడు.
    సర్వశక్తిమంతుడైన దేవునికి విరోధంగా దుర్మార్గుడు బలవంతునిగా ఉండేందుకు ప్రయత్నిస్తాడు.
²⁶ ఆ మనిషి చాలా మొండివాడు.
    దుర్మార్గుడు తన బలమైన లావుపాటి కేడెముతో దేవుని మీద దాడి చేస్తాడు.
²⁷ దుర్మార్గుడు ధనవంతుడై ముఖం కొవ్వుతో నిండి వుండవచ్చు.
వాని నడుము కొవ్వు పొరలతో బలిసి ఉండవచ్చు.
²⁸     కానీ శిథిలమైన పట్టణాల్లో వాడు నివసిస్తాడు.
    ఎవరూ నివసించని ఇండ్లలో ఆ దుర్మార్గుడు నివసిస్తాడు.
    అవి పడిపోయేట్టు ఉన్న శిథిల గృహాలు.
²⁹ దుర్మార్గుడు ధనికుడుగా ఉండవచ్చు.
    అతని ఐశ్వర్యం ఎక్కువ కాలం ఉండదు.
    అతని పంటలు ఎక్కువగా పండవు.
³⁰ దుర్మార్గుడు చీకటిని తప్పించుకోలేడు.
    అగ్నిచేత కొమ్మలు కాలిపోయిన చెట్టులా అతడు ఉంటాడు.
    దేవుని శ్వాస దుర్మార్గుని తుడిచివేస్తుంది.
³¹ దుర్మార్గుడు పనికిమాలిన వాటిని నమ్ముకొని తనను తానే మోసం చేసుకోకూడదు.
    ఎందుకంటే, వానికి ఏమీ దొరకదు కనుక.
³² దుర్మార్గుని ఆయుష్షు తీరిపోకముందే
    వాడు ముసలివాడై, ఎండిపోతాడు. మళ్లీ ఎన్నటికి పచ్చగా ఉండని ఎండిపోయిన కొమ్మలా అతడు ఉంటాడు.
³³ ద్రాక్షాపండ్లు పక్వానికి రాకముందే రాలిపోతున్న ద్రాక్షావల్లిలా దుర్మార్గుడు ఉంటాడు.
    ఆ వ్యక్తి పూలు రాలిపోయిన ఒలీవ చెట్టులా ఉంటాడు.
³⁴ ఎందుకంటే, దేవుడు లేని ప్రజల పని వ్యర్థము.
    డబ్బును ప్రేమించే మనుష్యుల ఇండ్లు అగ్నిచేత నాశనం చేయబడతాయి.
³⁵ వారు కష్టాలకు పథకం వేసి దుర్మార్గపు పనులు చేస్తారు.
    మనుష్యులను మోసం చేసేందుకు వారు ప్రయత్నం చేస్తారు.”