Revised Common Lectionary (Semicontinuous)

Dee 19 Psalm

To dän haupt Musikaunt, en Psalm fonn Doft.

¹ Dee Himels behaupte Gott siene Harlijchkjeit, un dee Weltaul behaupt sien Hauntwoakj.

² Dach enn un Dach ut räde dee, Nacht no Nacht brinjt Wissenschoft fäa.

³ Doa es kjeene Räd, un doa sent kjeene Wead wua dän äare Stem nijch to heare es.

⁴ Daen äare Motlien es derjch dee gaunse Welt jegone, un äare Wead bott dee Enje fonne Ead. Enn dän haft hee ne Woninj oppjestalt fa dee Sonn,

⁵ Dee oppkjemt soo aus en Briegaum fonn sien Schorm. Hee freit sikj soo aus en Helt dän Speltstriet to ranne;

⁶ En kjemt fäa fonn daut Enj fonn dee Himels, un sien Krauns es bott daut aundre Enj; un doa es nuscht daut fonn siene Hett festoake es.

⁷ Däm Herr Gott sien Jesats es follkome, un deit dee Seel rade. Däm Herr Gott sien Zeijchnes es Ajcht, un moakt dee Eefeltje Weis.

⁸ Däm Herr Gott siene Fäaschrefte sent rajcht, un moake daut Hoat Froo. Däm Herr Gott siene Aunkommendearunje sent Kloa, dee jäwe Lijcht to dee Uage.

⁹ Däm Herr Gott siene Forjcht es rein, un blift fa emma en emma; däm Herr Gott siene Jerejchte sent Woa, dee sent gaunsentgoa Jerjacht.

¹⁰ Dee ha meeha Weat aus Golt, soogoa ajchtet Golt, un seeta aus Honnijch, un Dreppe fonn Honnijchkorf.

¹¹ Derjch dän es dien Deena jewoarnt; un enn dän jehuarsaum senne es doa grootet Loon.

¹² Wäa kaun aul siene Fäla unjascheede? Rad mie fonn jeheemne Fäla.

¹³ Hool mie uk wajch fonn fäadrenjlijche Sind; lot dän nijch Macht habe äwa mie; dan woa ekj Opprajcht senne, un woa onnschuldijch senne fonn daut grootet Äweträde.

¹⁴ Lot dee Wead ut mien Mul, en daut Bedenkje fonn mien Hoat aunjenäm senne enn dien Aunseene, O Herr Gott, mien Groota Steen un mien Rada.

21 Däm Kjeenijch sien Hoat es enn däm Herr Gott siene Haunt; Hee dreit daut han wuaemma Hee wel.

² Jieda plon dee en Mensch moakt fa sien Wajch es Opprajcht enn siene eajne Uage, oba dee Herr Gott deit daut Hoat mäte.

³ Jerajchtijchkjeit un Jerejcht to doone es leewa to wäle fa däm Herr Gott aus Opfa.

⁴ Stollte Uage un en stolltet Hoat, un dee Gottloose äa Laump es Sind.

⁵ Dee Flietje äare Jedanke brinje Äwafluss; oba Aufbrutsche brinjt blooss Oamoot.

⁶ Rikjdom kjriehe derch ne leajende Tung es soo aus Daump daut jedräwe woat derch dän dee dän Doot seakje.

⁷ Dee Beese äa Jewault es ne Schlenj to an, wiels see nich Jerejcht seakje.

⁸ En Mensch sien Wajch es fedreit un hasslijch, oba fa soone dee Acht es, sien Woakj es rajcht.

⁹ Daut es bäta opp ne Akj fonn en Husdack to wone aus met ne Fru to wone dee eegol zenkisch es.

¹⁰ Dee Gottloose äare Seel jankat Beeset; sien Noba finjt kjeen Gonnst enn siene Uage.

¹¹ Dee eefeltje woat Weis jemoakt wan däm Spetta jestroft woat, un wan däm Weise jeleat woat kjrijcht hee Wissenschoft.

¹² Dee Jerajchta bedenkjt dee Beese äa Hus; Hee deit dee Gottloose enne Grunt brinje fa sien Beeset.

¹³ Wäa siene Uare toostoppt jäajen dee Oame äa schriehe, woat selfst roope, un am woat nich jeauntwuat woare.

¹⁴ Ne jeheeme Gow deit Oaja bandje; jo, Schmäajelt emm Bossem deit groote Wutt stelle.

¹⁵ Daut es dee Opprajchte ne Freid Jerejcht to eewe; oba dee Beese woare Schrakj erfoare.

¹⁶ Dee Maun dee ut dän oppsejchtje Wajch waundat woat enn dee doodes Fesaumlunk ruehe.

¹⁷ En Maun dee Fejneaje jleijcht woat Oam senne; wäa Wien un Eelj leef haft woat nijch rikj senne.

²³ Aus hee em Tempel enenn kjeem en lead, kjeeme Huagaprieste en Elteste fom Follkj no am en fruage am: "Derch waut fonne Follmacht deist du dise Dinje? en waea jeef die dee Follmacht?"

²⁴ En Jesus auntwuad en saed to an: "Ekj woa junt uk ne Froag stale, en wan jie mie daut saje, dan woa ekj junt uk saje derch waut fonne Follmacht ekj dit doo.

²⁵ Daem Jehaun siene Taufe, fonn wua wea dee, fom Himel, oda fonn Mensche?" See raede unja sikj selfst en saede: "Wan wie saje, fom Himel, dan woat hee saje: 'Wuaromm jleewd jie am dan nich?'

²⁶ Oba wan wie saje: fonn Mensche; dan mott wie onns aengste fa daut Follkj,' dan dee hilde aule daut Jehaun en Profeet wea.

²⁷ See auntwuade Jesus en saede: "Wie weete nich." En hee saed to an: "Dan saj ekj junt uk nich derch waut fonne Follmacht ekj dise Dinje doo.

²⁸ Oba waut meen jie? En Maun haud twee Kjinja. He kjeem nom easchta en saed: 'Mien Kjint, go en oabeid fonndoag enn mien Wiengoade.'

²⁹ Hee auntwuad am en saed: "Ekj go, Herr.' Oba hee jinkj nich.

³⁰ Hee kjeem no daem tweeda en saed daut naemlije. En hee auntwuad en saed: 'Ekj wel nich,' oba lota wea am daut leet, en hee jinkj doch.

³¹ Woone fonn dise beid deed sien Foda sien Wele?" See saede: "Dee latsta." Jesus saed to an: Enn WEoarheit saj ekj junt, daut dee Takskollakjta en Huare woare eeha enn Gott sien Rikj enenn gone aus jie.

³² Dan Jehaun kjeem no junt em Jerajchtichkjeits Wajch, en jie jleewde am nich; oba dee Takskollakjte en Hure jleewde am; en aus jie daut sage, deed jie doch nich Buesse am to jleewe.