Revised Common Lectionary (Semicontinuous)

⁹ Èmi yóò kọ orin tuntun sí ọ
    Ọlọ́run; lára ohun èlò orin
olókùn mẹ́wàá èmi yóò
    kọ orin sí ọ
¹⁰ Òun ni ó fi ìgbàlà fún àwọn ọba,
    ẹni tí ó gba Dafidi ìránṣẹ́ rẹ̀ lọ́wọ́ idà ìpanilára.

Lọ́wọ́ pípanirun. ¹¹ Gbà mí kí o sì yọ mí nínú ewu
    kúrò lọ́wọ́ àwọn ọmọ àjèjì
tí ẹnu wọn kún fún èké,
    tí ọwọ́ ọ̀tún wọn jẹ́ ọwọ́ ọ̀tún èké.

¹² Kí àwọn ọmọkùnrin wa
    kí ó dàbí igi gbígbìn tí ó dàgbà ni ìgbà èwe wọn,
àti ọmọbìnrin wa yóò dàbí òpó ilé
    tí a ṣe ọ̀nà sí bí àfarawé ààfin.
¹³ Àká wa yóò kún
    pẹ̀lú gbogbo onírúurú oúnjẹ
àgùntàn wa yóò pọ̀ si ní ẹgbẹ̀rún,
    ní ẹgbẹ̀rún mẹ́wàá ní oko wa:
¹⁴ Àwọn màlúù wa yóò ru ẹrù wúwo
    kí ó má sí ìkọlù,
kí ó má sí ìkólọ sí ìgbèkùn,
    kí ó má sí i igbe ìpọ́njú ní ìgboro wa.
¹⁵ Ìbùkún ni fún àwọn ènìyàn náà tí ó wà ní irú ipò bẹ́ẹ̀,
    Ìbùkún ni fún àwọn ènìyàn náà,
    tí ẹni tí Ọlọ́run Olúwa ń ṣe.

⁶ Ta ni ẹni tí ń ti ijù jáde wá
    bí ọ̀wọ̀n èéfín
tí a ti fi òjìá àti tùràrí kùn lára
    pẹ̀lú gbogbo ìpara olóòórùn oníṣòwò?
⁷ Wò ó! Àkéte rẹ̀ tí í ṣe ti Solomoni,
    àwọn akọni ọgọ́ta ni ó wà yí i ká,
    àwọn akọni Israẹli,
⁸ Gbogbo wọn ni ó mú idà lọ́wọ́,
    gbogbo wọn ní ìmọ̀ nínú ogun,
idà oníkálùkù wà ní ẹ̀gbẹ́ rẹ̀,
    wọ́n múra sílẹ̀ fún ìdágìrì òru
⁹ Solomoni ọba ṣe àkéte fún ara rẹ̀;
    o fi igi Lebanoni ṣe é.
¹⁰ Ó fi fàdákà ṣe òpó rẹ̀
    o fi wúrà ṣe ibi ẹ̀yìn rẹ̀
Ó fi elése àlùkò ṣe ibùjókòó rẹ̀,
    inú rẹ̀ ni ó ko àwọn ọ̀rọ̀ ìfẹ́ wọ̀nyí sí
    “Pẹ̀lú ìfẹ́ láti ọ̀dọ̀ àwọn ọmọbìnrin Jerusalẹmu.”
¹¹ Ẹ jáde wá, ẹ̀yin ọmọbìnrin Sioni,
    kí ẹ sì wo ọba Solomoni tí ó dé adé,
    adé tí ìyá rẹ̀ fi dé e
ní ọjọ́ ìgbéyàwó rẹ̀,
    ní ọjọ́ ayọ̀ ọkàn rẹ̀.