Revised Common Lectionary (Semicontinuous)
प्रमुख गायकासाठी कोरहाच्या कुटुंबाचे शोशन्नीमया सुरांवर बसवलेले मास्कील प्रीतीचे स्तोत्र
45 मी राजासाठी या गोष्टी लिहितो
तेव्हा माझे मन सुंदर शब्दांनी भरुन जाते.
एखाद्या कसबी लेखकाच्या लेखणीतून शब्द यावेत
त्याप्रमाणे माझ्या जिभेतून शब्द येतात.
2 तू कोणाही पेक्षा खूप सुंदर आहेस.
तू चांगला वक्ता आहेस,
म्हणून देव तुला सदैव आशीर्वाद देईल.
6 देवा [a] तुझे सिंहासन नेहमी साठी आहे.
चांगुलपणा हा तुझा राजदंड आहे.
7 तुला चांगुलपणा आवडतो
आणि तू वाईटाचा तिरस्कार करतो म्हणून देवा,
तुझ्या देवाने तुलाच तुझ्या मित्रांचा [b] राजा निवडले.
8 तुझ्या वस्त्रांना बोळ, अगरु, ऊद आणि दालचिनी यांचा सुगंध येतो.
हस्तिदंताने अच्छादलेल्या महालातून तुला आनंदीत करण्यासाठी संगित ऐकू येते.
9 राजांच्या मुली करवल्या आहेत.
तुझी वधू तुझ्या उजव्या हाताला शुध्द सोन्याचा मुगुट धारण करुन उभी आहे.
1 शलमोनाचे सर्वांत सुंदर गीत
प्रेयसी आपल्या प्रियकरास:
2 चुंबनांनी मला झाकून टाक कारण
तुझे प्रेम द्राक्षरसापेक्षा चांगले आहे.
3 तुझ्या अत्तराचा खूप चांगला वास येत आहे,
पण तुझे नाव मात्र उत्तम अत्तरापेक्षाही गोड आहे.
त्यामुळेच तरुणी तुझ्यावर प्रेम करतात.
4 मला तुझ्याबरोबर ने.
आपण पळून जाऊ.
राजाने मला त्याच्या खोलीत नेले.
यरुशलेममधील स्त्रिया पुरुषाला
आम्ही आनंदोत्सव करु आणि तुझ्यासाठी आनंदित होऊ.
तुझे प्रेम द्राक्षारसापेक्षा चांगले आहे हे लक्षात ठेव.
तरुणी तुझ्यावर योग्य कारणासाठी प्रेम करतात.
ती स्त्रियांशी बोलते
5 यरुशलेमच्या मुलींनो,
मी काळी आणि सुंदर आहे.
मी तेमान आणि शलमोनाच्या तंबूंसारखी काळी आहे.
6 मी किती काळी आहे,
सूर्याने मला किती काळे केले आहे याकडे बघू नका.
माझे भाऊ माझ्यावर रागावले होते.
त्यांनी माझ्यावर त्यांच्या द्राक्षांच्या मळ्याची काळजी घ्यायची सक्ती केली.
त्यामुळे मला स्वतःची [a] काळजी घेता आली नाही.
ती त्याच्याशी बोलते
7 मी माझ्या आत्म्यासकट तुझ्यावर प्रेम करते.
मला सांग: तू तुझ्या मेंढ्यांना कुठे खायला दिलेस?
तू त्यांना दुपारी कुठे विश्रांती घेऊ दिलीस?
मी तुझ्याबरोबर यायला हवे.
नाही तर मी तुझ्या मित्रांच्या मेंढ्यांची काळजी घेणारी, अशी भाडोत्री स्त्रीसारखी ठरेन
तो तिच्याशी बोलतो
8 तू खूप सुंदर स्त्री आहेस.
काय करायचे ते तुला नक्कीच माहीत आहे.
मेंढ्यांच्या मागे मागे जा.
तुझ्या लहान बकऱ्यांना मेंढपाळाच्या तंबूंजवळ खाऊ घाल.
9 फारोचा रथ ओढणाऱ्या घोड्यांना घोडी [b] जशी उद्दीपित करते त्यापेक्षाही जास्त तू मला उद्दीपित करतेस. [c]
त्या घोड्यांच्या चेहेऱ्यांच्या बाजूंवर आणि गळ्यात सुंदर अलंकार आहेत.
10-11 हे तुझ्यासाठी केलेले अलंकार:
डोक्याभोवतीचा सोन्याचा पट्टा आणि चांदीच्या हार.
तुझे सुंदर गाल सोन्याने अलंकृत केले आहेत.
तुझा गळा चांदीच्या अलंकारांनी सुंदर दिसत आहे.
ती म्हणते
12 माझ्या अत्तराचा वास बिछान्यावर
लवंडलेल्या राजापर्यंत जातो.
13 माझ्या वक्षस्थळांमध्ये रात्रभर विसावलेला माझा प्रियकर माझ्या गळ्यात
असलेल्या सुंगधी द्रव्याच्या पिशवीसारखा आहे
14 माझा प्रियकर एन-गेदीमधील द्राक्षाच्या मळ्याजवळील
मेंदीच्या फुलांच्या गुच्छा सारखा आहे.
तो म्हणतो
15 प्रिये, तू किती सुंदर आहेस!
तू फारच सुंदर आहेस.
तुझे डोळे कबुतरासारखे आहेत.
ती म्हणते
16 प्रियकरा, तू सुध्दा् सुस्वरुप आहेस
आणि मोहक आहेस.
आपला बिछाना किती आल्हाददायक आणि सुखावह आहे.
17 आपल्या घराच्या तुळ्या गंधसरुच्या लाकडाच्या आहेत.
छताचे वासे देवदारुच्या लाकडाचे आहेत.
1 देवाचा आणि प्रभु येशू ख्रिस्ताचा सेवक, याकोब याजकडून,
देवाच्या लोकांचे “बारा वंश” जे जगभर विखुरलेले आहेत त्यांना सलाम!
विश्वास आणि शहाणपण
2 माझ्या बंधूंनो, ज्या ज्या वेळी तुमच्यावर निरनिराळया परीक्षा येतील तेव्हा तुम्ही स्वतःला अत्यंत सुदैवी समजा, 3 कारण तुम्हांला माहीत आहे की, तुमच्या विश्वासाच्या परीक्षेमुळे धीर निर्माण होतो. 4 आणि त्या धीराला परिपूर्ण काम करू द्या. यासाठी की तुम्ही प्रौढ, परिपूर्ण व कोणत्याही बाबतीत कमतरता नसलेले असे व्हावे.
5 म्हणून जर तुमच्यातील कोणी शहाणपणात उणा असेल तर त्याने ते देवाकडे मागावे. जो सर्व लोकांना उदार हस्ते देतो, आणि जो दोष शोधीत नाही, असा देव ते त्याला देईल. 6 पण त्याने विश्वासाने मागितले पाहिजे व संशय धरू नये. कारण जो संशय धरतो तो वाऱ्यामुळे इकडेतिकडे हेलकावणाऱ्या समुद्रातील लाटेसारखा आहे. 7-8 अशा मनुष्यांने असा विचार करू नये की, प्रभूपासून त्याला काही प्राप्त होईल. कारण तो द्विधा आहे आणि तो जे करतो त्या सर्वांत तो अस्थिर आहे.
2006 by World Bible Translation Center