Revised Common Lectionary (Semicontinuous)

Dee 111 Psalm

¹ Preis däm Herr Gott; ekj woa däm Herr Gott danke met mien gaunset Hoat; enn dee festoakne Fesaumlunk fonn dee Opprajchta, un opp daut toop kome.

² Däm Herr Gott siene Woakje sent groot, un woare utjesocht fonn dän dee dee welle habe.

³ Sien Woakj es eaboa en harlich; un siene Jerajchtichkjeit duat fa emma.

⁴ Hee haft en Aunjedenkj fa siene Wundasch; dee Herr Gott es jnädich un foll Metleet.

⁵ Hee haft Noarinj jejäft to dän dee Am ferjchte; Hee woat sien Bunt fa emma behoole.

⁶ Hee haft sien Folkj dee Macht fonn siene Woakje jewäse; dän en Oawgoot to jäwe mank dee Nazione.

⁷ Dee Oabeit fonn siene Henj sent Woarheit un Jerejcht; aul sien Kommandeare es Woa,

⁸ un steit faust fa emma un emma; dee sent jedone enn Woarheit en Opprajchtijchkjeit.

⁹ Hee schekjt Radunk to sien Folkj; Hee haft sien Bunt bestädijcht fa emma; Heilijch en foll Eaforjch es sien Nome..

¹⁰ Dee Aunfank fonn Weisheit es Gottesforjcht; aula dee daut doone ha ne goode Festentnis; sien Preis es opp Eewijch duarhauft.

⁸ En Stefanus, foll Jnod en Krauft, deed groote Wunnda en Teakjens mank dee Mensche.

⁹ Oba walkje fonn dee fonn dee Libertiener Sienagoog, en uk fonn dee Kjiereena en Auelksaundra, en dee fonn Tsilietsean en Asean stunnde opp en streede sikj met Stefanus,

¹⁰ oba kunne nich jaeajen dee Weisheit en Jeist stone met dee hee raed.

¹¹ Donn bekoffte see Mana, dee saede: "Wie ha am jeheat Lastawead raede jaeajen Mooses en jaeajen Gott".

¹² En see raeajde daut Follkj en dee Elteste en dee Schreftjeleade opp, en kjeeme en jreepe am en leide am wajch nom huage Rot;

¹³ en stalde faulsche Zeij opp dee saede: "Dis maun heat nich opp jaeajen dise heilje Staed en daut Jesats to raede:

¹⁴ Dan wie ha am heat saje daut dis Jesus fonn Natsaret woat dise Staed fenichte, en woat dee sitte endre dee Mooses onns jejaeft haft."

¹⁵ En aul dee em Rot saute en kjikjte am aun, en sage daut sien Jesecht soo wea aus en Enjeljesecht.