Revised Common Lectionary (Semicontinuous)

¹⁶ Oba to dee Gottloose sajcht Gott: "Waut fonn Rajcht ha jie fonn miene Jerejchte to räde, oda mien Bunnt enn jun Mul näme,

¹⁷ sentamol jie Unjarejchtunj hausse, un miene Wead hinje junt schmiete?"

¹⁸ Wan jie en Deef sage, dan rand jie met am, un jie sent fe-eenijcht met Huare.

¹⁹ Jie äwajäwe jun Mul to Beeset, un june Tunje räde Lest.

²⁰ Du setst un rätst jäajen dien Brooda; du deist diene eajne Mutta äa Sän schlajchtet noräde.

²¹ Dit hast du jedone, un ekj wea stell doawäajen – du dochst sejchalijch wudd ekj soo senne aus du; oba ekj woa die dodle, un woat daut enne Reaj fer die stale.

²² Nu denkj aun dit, jie, dee jie fonn Gott fejäte, sest woat ekj entwei riete, un doa kjeena woat senne tom rade.

²³ Wäaemma Dank opfat deit mie feharlijche, un ekj woa däm Gott siene Radunk wiese dee sien Wajch rajcht moakt.

8 Enn dee Doag weare doa en groot deel Mensche toop jekome, en haude nusscht to aete, en hee roopt siene Jinja no sikj en saed to an:

² "Mie jaumat daut aewa dit Follkj, dan dee sent hia nu aul dree Doag bie mie, en ha nusscht to aete;

³ en wan ekj an soo oone Aete nohuess gone lot, woare see hinjawaeajes feschmachte;" en walkje weare fonn en langet Enj auf.

⁴ Siene Jinja saede to am: "Fonn wua wudd irjent waea hia enne Wiltnes fa dise jenuach Broot kjriehe daut dee kunne Saut woare?"

⁵ Hee fruach an: "Woo fael Brood ha jie?" En see saede: "Saewen."

⁶ Hee befool daut daut Follkj sikj sull dol sate oppe Ead; en hee neem dee saewen Brood, dankt doafaea, bruak dee twei en jeef dee Jinje dee, daut see dee sulle utedeele, en see jeewe daut Follkj dee Brood.

⁷ See haude uk en poa Fesch, en hee saeajend dee, en saed dee sulle de Mensche uk jejaeft woare.

⁸ En aule aute, en worde saut, en see hoowe dee Broke opp dee aewajeblaewe weare, en kjreaje saewen Kjarw foll.

⁹ Doa weare bie feeha Dusent Mensche. Donn leet hee daen gone.

¹⁰ Fuats steach hee enn daut Schepp enenn met siene Jinja, en see kjeeme no dee Ommjaeajent bie Dalmanuta.