Revised Common Lectionary (Semicontinuous)

¹⁶ Oba to dee Gottloose sajcht Gott: "Waut fonn Rajcht ha jie fonn miene Jerejchte to räde, oda mien Bunnt enn jun Mul näme,

¹⁷ sentamol jie Unjarejchtunj hausse, un miene Wead hinje junt schmiete?"

¹⁸ Wan jie en Deef sage, dan rand jie met am, un jie sent fe-eenijcht met Huare.

¹⁹ Jie äwajäwe jun Mul to Beeset, un june Tunje räde Lest.

²⁰ Du setst un rätst jäajen dien Brooda; du deist diene eajne Mutta äa Sän schlajchtet noräde.

²¹ Dit hast du jedone, un ekj wea stell doawäajen – du dochst sejchalijch wudd ekj soo senne aus du; oba ekj woa die dodle, un woat daut enne Reaj fer die stale.

²² Nu denkj aun dit, jie, dee jie fonn Gott fejäte, sest woat ekj entwei riete, un doa kjeena woat senne tom rade.

²³ Wäaemma Dank opfat deit mie feharlijche, un ekj woa däm Gott siene Radunk wiese dee sien Wajch rajcht moakt.

²⁷ En jie sent Christus sien Lief, en een jieda es en Jliet doaraun.

²⁸ En Gott haft enne Jemeente aunjestalt, easchtens Apostel, tweedens Profeete, dreddens Leara, dan Wunndawirkja, dan Gow tom heele, tom halpe, Rejeara, feschiedenste Sproake.

²⁹ Sent aula Apostel? sent aula Profeete? sent aula Leara? sent aula Wunndawirkja?

³⁰ Ha aula dee Gow tom heele? Raede aula met aundre Sproake? kjenne aula Sproake utlaje?

³¹ Oba felangt opp earenst dee jratre Gow. En doch wies ekj junt en Wach dee fael fetraflicha es.