Revised Common Lectionary (Semicontinuous)

Dee 51 Psalm

To dän Haupt Musikaunt, en Psalm fonn Doft – Aus Natan dee Profeet no am kjeen no däm daut hee Fekjea haud jehaut met Batseeba.

¹ Sie jnädijch to mie O Gott, no dien Erboarme, no diene groote leeftolje Erboarmunje, doo miene Äweträdunje utlasche.

² Wausch mie gausentgoa fonn mien Beeset, un moak mie rein fonn miene Sind.

³ Dan ekj doo miene Äwträdunge bekjane; miene Sind es emma fer mie.

⁴ Jäajen die, un die auleen, ha ekj jesindijcht un Beeset jedone enn diene Uage; daut du muchst jerajchtfoadijcht senne wan du rätst, un kloa senne wan du rejchte deist.

⁵ See, ekj wort enne Sind jebuare, un miene Mutta deed mie enn Sind bejriepe.

⁶ See, du deist Woarheit felange enn daut ennalijchet, un enn daut festoakne deist du mie Weisheit leare.

⁷ Reinj mie met Iesopp, un ekj woa rein senne, wausch mie, un ekj woa witta senne aus Schnee.

⁸ Moak mie foll Freid un froo senne to heare, daut dee Knoakes dee du jebroake hast sikj freihe kjenne.

⁹ Festäakj dien Jesejcht fonn miene Sind, un doo aul miene Onnjerajchtijchkjeite utlasche.

¹⁰ Erschauf enn mie en reinet Hoat, O Gott; un doo en staunthauftja Jeist enn mie nie moake.

¹¹ Doo mie nijch fonn dien Doasenne wajch schmiete, un nem dien Heilje Jeist nijch fonn mie.

¹² Jeff mie wada dee Freid fonn diene Radunk, un hool mie opprajcht met dien welja Jeist.

4 Ekj sie daem Herr sien Jefangne, doaromm pracha ekj junt dringent daut jie so laewe dautet stemt met dee Beroopinj met dee jie beroope sent,

² met folle Deemut en Saunftmoot, met Jedult, en fedroacht eena daem aundra enn Leew,

³ en bemeacht junt dee Eenichkjet em Jeist to hoole daut enne Fraed toop jebunge es. Doa es een Lief en een Jeist,

⁴ soo aus jie uk beroope weare enn eene Hopninj enn dee jie beroope sent;

⁵ een Herr, een Gloowe, eene Taufe;

⁶ een Gott en Foda aewa aules, dee aewa aules, en derch aules, en enn aules es.

⁷ Oba to en jieda eenem es Jnod jejaeft no dee Mot enn dee Gow Christus.

⁸ Doaromm sajcht hee: "Enn daem daut hee enopp jefoare es no daut Hechste, haft hee dee Jefangne jefange wajch jeleit, en haft dee Mensche Gow jejaeft".

⁹ Nu daut Wuat: "Enopp jefoare", waut meent daut sest aus daut hee eascht erauf jefoare es enn dee laeachste staede fonne Ead?

¹⁰ Dee erauf jefoare es, es dee naemlija aus dee, dee enopp jefoare es wiet aewa aule Himelswelte, daut hee aules fele mucht.

¹¹ En hee jeef walkje Apostel, en walkje Profeete, en walkje Evanjeliste, en walkje aus Hoad en Leara,

¹² soo daut hee dee Heilje kunn follkome moake fa dee Oabeit em Deenst, daut Christus sien Lief (dee Jemeent) kunn oppjebut woare,

¹³ bott wie aule to ne Eenichkjet em Gloowe kome, en ne folle Erkjantnes fonn Gott sien Saen, to en follstendje Maun, bott dee Mot fonn de Follkomenheit enn Christus,

¹⁴ soo daut wie nich lenje kjleene Kjinja sent, dee han en haea jeblost woare fonn dee Wint fonn Irlea, en wajch jeleit fonn daen, dee enn aeare Kluakheit enn Irlea enenn leide.

¹⁵ Enn Leew mott wie de Woarheit raede daut wie enn aule hensechte enn am enenn wause, dee daut Haupt es, Christus,

¹⁶ fonn waem daut gaunse Lief toop jepausst es, en toop jebrocht woat derch en jiedet Jelenk; en doaderch waust dee Kjarpa daut dee sikj selfst oppbut.

²⁴ aus de Lied utfunge daut Jesus en siene Jinja nich doa weare, steaje see en dee Lomme enenn en fuare no Kapernaum doa Jesus to seakje.

²⁵ Aus see am aune aundre sied funge, saede see to am: "Meista, waneeha best du haea jekome?"

²⁶ Jesus auntwuad an en saed: "Enn Woarheit, enn Woarheit saj ekj ju: jie seakje mie nich wiel jie Wunndateakjens sage, oba wiel jie fonn daut Brot aute en saut worde.

²⁷ Oabeit nich fa daut Aeta waut fejenklich es, oba fa daut waut bott daut eewje Laewe blift daut de Mensche Saen ju jaewe woat; wiels daem haft Gott de Foda bestaedicht."

²⁸ Donn saede see to am: "Waut sael wie doone omm Gott siene Woakje to wirkje?"

²⁹ Jesus auntwuad en saed to an: "Dit es Gott sien Woakj daut jie aun daem jleewe daem hee jeschekjt haft."

³⁰ Donn saede see to am: "Waut fonn Wunndateakjen deist du wiese daut wie kjenne seene en die jleewe? Waut deist du follbrinje?

³¹ Onnse Fodasch aute enne Wiltnes daut Mana, soo aus jeschraewe steit: 'Hee jeef an Broot fomm Himel to aeta'".

³² Donn saed Jesus to an: "Enn Woarheit, enn Woarheit saj ekj ju: Mooses jeef ju nich daut Broot fom Himel, oba mien Foda jeft ju daut woare Broot fom Himel.

³³ Dan daut Brot fonn Gott es dee waut fom Himel erauf kjemt, en de Welt daut Laewe jeft."

³⁴ Donn saede see to am: "Herr, jef ons emma dit Brot."

³⁵ En Jesus saed to an: "Ekj sie daut Laewesbrot. Waea no mie kjemt, daem woat niemols meeha hungre; en waea aun mie jleeft woat niemols meeha darschte.