Revised Common Lectionary (Semicontinuous)

Dee 21 Psalm

To dän haupt Musikaunt, en Psalm fonn Doft.

¹ Dee Kjeenijch freit sikj enn diene Macht, O Herr Gott; un woo seeha deit hee sikj freihe enn diene Radunk.

² Du hast am sien Hoat Janke jejäft, un hast daut Jebäd fonn siene Leppe nijch wajch jehoole. Selah.

³ Dan du woascht fer am feropp gone met Saeajens fonn Goots. Du hast ne Kroon fonn ajchtet Golt opp sien Kopp jesat.

⁴ Hee fruach die no Läwe: du jeefst am dee Lengd fonn Doag fa emma en emma.

⁵ Siene Harlijchkjeit es groot enn diene Radunk; du hast Ea un Madastijchkjeit opp am jelajcht.

⁶ Dan du hast am fa Säajens jesat fa emma; du hast am Freid jejäft enn dee Freid fonn dien Jesejcht.

⁷ Dan dee Kjeenijch deit enn däm Herr Gott fetruehe, un enn däm Aulahejchsta sien Erboarme; hee woat nijch wajch jeriemt woare.

⁸ Diene Haunt woat aul diene Fiend utfinje; diene rajchte Haunt woat dän utfinje dee die hause.

⁹ Du woascht dän soo aus en fiarija Owe sate enn dee Tiet fonn dien Doasenne; dee Herr Gott woat dän oppschlucke enn sien Rach, un daut Fia woat dän fenijchte.

¹⁰ Du woascht dän äa Frucht fonne Ead fenijchte, un äare Nokome fonn mank dee Mensche Saens.

¹¹ Dan dee plonde Beeset jäajen die, see dochte aun en Beeset Dinkj; dee kjenne oba nijch jewenne,

¹² dan du woascht dän moake trigjaun gone; du woascht diene Fiele reed moake opp dän Baunt jäajen äare Jesejchte.

¹³ O Herr Gott, sie je-eat enn diene Macht; soo woa wie sinje, un Psalme fonn diene Krauft sinje.

¹⁶ Ekj saj wada: Lot kjeena denkje daut ekj en Noa sie; wan aundasch, dan naemt wie waenst aun aus en Noa, daut ekj en baet puche kaun.

¹⁷ Waut ekj raed, raed ekj nich soo aus de Herr, oba soo aus eena dee en Noa es, enn daut Toofetruehe fom puche.

¹⁸ Sentamol doa fael sent dee nom Fleesch puche, wel ekj uk puche.

¹⁹ Jie fedroage Noare met Freid wiel jie soo kluak sent.

²⁰ Jie fedroage daut wan junt waea fesklowe deit, wan waea junt oppfrat, wan waea junt oppnemt, wan waea sikj selfst oppdrenkjt, wan waea junt em Jesecht schleit.

²¹ To Schaund saj ekj dit, soo aus wan wie Schwak sent; oba waemma waut woagt, -ekj raed enn Noarheit - woag ekj uk.

²² Sent see Hebraea? ekj sie uk. Sent see Iesraliete? ekj sie uk. Sent see Obraum siene Nokome? ekj sie uk.

²³ Sent see Christus siene Denna? ekj raed soo aus en Noa, ekj sie fael meeha; enn fael meeha Schwearichkjeite, fael meeha enn Jefenknesse, fael dolla jepriejelt worde, foaken enn Doodesjefoa.

²⁴ Fonn dee Jude ha ekj fief mol naeajenendartich Heiw jekraeaje,

²⁵ dree mol wort mie met Stange feheift, eemol wort mie jesteenicht, dree mol em Scheppbruch,

²⁶ eene Nacht en Dach wea ekj em deepet Maea, ha fael jereist, enn Jefoa em Fluss, enn Jefoa fonn Reiba, enn Jefoa mank miene eajne, enn Jefoa bie de Heide, enn Jefoa enne Staut, enn Jefoa enne Wiltnes, enn Jefoa em See, enn Jefoa mank Faulsche Breeda,

²⁷ enn Laust en Schwearichkjeit, foaken enn Woake, enn Hunga en Darscht, foaken met Fauste, enn Kolld oone Kjleeda.

²⁸ Apoat fonn daut waut fonn bute es, woat jieda Dach jaeajen mie jeoabeit, en dan aule Dach dee sorj fa dee Jemeente.

²⁹ Waea es Schwak, en ekj sie nich Schwak, waea deit Oajaness liede, en ekj brenn nich?

³⁰ Wan ekj puche mott, dan woa ekj puche fonn daut waut miene Schwakheite aunbelangt.

³¹ Onns Her Jesus Christus sien Gott en Foda, dee enn Eewichkjeit jeloft woat, weet daut ekj nich leaj.

³² Enn Damaskus deed daem Kjeenich Areetus sien Kommendaunt dee Staut bewoare, wiel hee mie faust naeme wull;

³³ oba mie wort enn en Korf derch en Fensta enne Waunt rauf jelote, enn ekj kjeem fonn siene Henj wajch.