Revised Common Lectionary (Semicontinuous)

¹² خۆزگە دەخوازرێ بەو نەتەوەیەی کە یەزدانی خودایانە،
    بەو گەلەی هەڵیبژاردووە بۆ میراتی خۆی.
¹³ یەزدان لە ئاسمانەوە دەڕوانێتە خوارێ،
    هەموو ئادەمیزاد دەبینێت.
¹⁴ لە نشینگەکەی خۆیەوە
    چاودێری هەموو دانیشتووانی زەوی دەکات.
¹⁵ ئەو کە شێوەی دڵی هەمووانی دروستکردووە،
    ئاگاداری هەموو کردەوەکانیانە.

¹⁶ هیچ پاشایەک بە گەورەیی سوپاکەی ڕزگاری نابێت،
    هیچ پاڵەوانێک بە هێزی بازووی دەرباز نابێت.
¹⁷ ئەسپ ئومێدێکی دۆڕاوە بۆ ڕزگار بوون،
    بە توندی هێزی ناتوانێت کەس دەرباز بکات.
¹⁸ بەڵام یەزدان چاوی لەوانەیە کە ترسی ئەویان لە دڵدایە،
    ئەوانەی هیوایان بە خۆشەویستی نەگۆڕی ئەوە.
¹⁹ بۆ ئەوەی لە مردندا فریایان بکەوێت و
    لە قاتوقڕیدا ژیانیان دابین بکات.

²⁰ ئێمە بە ئومێدی چاوەڕوانی یەزدانین،
    یەزدان یارمەتیدەر و قەڵغانمانە.
²¹ دڵمان بەو خۆشە،
    چونکە ئێمە پشت بە ناوی پیرۆزی ئەو دەبەستین.
²² ئەی یەزدان، با خۆشەویستی نەگۆڕت بەسەرمانەوە بێت،
    بەگوێرەی هیوامان بە تۆ.

⁷ «بە مەزنی و پایەبەرزیت
    بەرهەڵستەکانت پێشێل دەکەیت،
جۆشی تووڕەییت دەبارێنیت
    وەک پووش دەیانخوات.
⁸ بە بای لووتت
    ئاوەکان گرد بوونەوە،
ئاوەڕۆکان وەک گرد وەستان،
    قووڵاییەکان لەناو دەریا بەستیان.
⁹ دوژمن گوتی:
    ”دوایان دەکەوم، پێیان دەگەم،
تاڵان دابەش دەکەم،
    گیانم لێیان تێر دەبێت،
شمشێرەکەم ڕادەکێشم،
    دەستم لەناویان دەبات.“
¹⁰ بەڵام بە بای خۆت فووت کرد،
    دەریا دایپۆشین،
ڕۆچوون وەک قورقوشم،
    لە ئاوێکی مەزن.
¹¹ ئەی یەزدان، کێ لەنێو خوداوەندەکان وەک تۆیە؟
    کێ وەک تۆ
        پایەبەرزە لە پیرۆزی،
        سامناک لە شکۆمەندی،
        دروستکەری کاری سەرسوڕهێنەر؟