Revised Common Lectionary (Semicontinuous)
1 यहोवा, हमका कउनो गैारव ग्रहण नाहीं करइ चाही।
गौरव तउ तोहार अहइ।
तोहार पिरेम अउ निस्ठा क कारण गौरव तोहार अहइ।
2 रास्ट्रन काहे कहिइ,
“ओकर परमेस्सर कहाँ अहइ?”
3 मोर परमेस्सर सरगे मँ अहइ।
उ उहइ करत ह जउन कछू उ चाहत ह।
4 ओन जातियन क “देवता” बस सिरिफ पुतला अहइँ जउन सोना चाँदी क बना अहइँ।
उ सबइ बस सिरिफ पुतलन अहइँ जेनका कउनो मनई बनाएस ह।
5 ओन पुतलन क मुँह अहइँ, मुला उ सबइ बोल नाहीं पउतेन।
ओनकर आँखिन अहइँ, पर उ सबइ लखि नाहीं पउतेन।
6 ओनके कान अहइँ, मुला उ सबइ सुन नाहीं सकतेन।
ओनके लगे नाक अहइँ, मुला उ सबइ सूँघ नाहीं पउतेन।
7 ओनके हाथ अहइँ, मुला उ पचे कउनो चीज क छुइ नाहीं सकतेन।
ओनके गोड़ अहइँ, मुला उ पचे चल नाहीं सकतेन।
उ पचे आपन गटइ स कउनो आवाज़ नाहीं निकारइ सकतेन।
8 जउन मनई इ सबइ पुतलन बनावत हीं, अउर ओनमाँ बिस्सास धरत हीं
बिल्कुल इ सबइ मूरतियन जइसे बन जइहीं।
9 ओ इस्राएल क लोगो, यहोवा मँ भरोसा रखा।
यहोवा इस्राएल क मदद देत ह अउर ओकर रच्छा करत ह।
10 ओ हारून क घराने, यहोवा मँ भरोसा रखा।
हारून क घराने क यहोवा सहारा देत ह, अउ ओकर रच्छा करत ह।
11 हे यहोवा क सबइ मनवइयो, ओनमाँ भरोसा रखा।
उ सहारा देत ह अउर आपन लोगन क रच्छा करत ह।
12 यहोवा हमका याद राखत ह।
यहोवा हमका वरदान देइ,
यहोवा इस्राएल क आसीसित करी।
यहोवा हारून क परिवार क आसीसित करी।
13 उ ओन लोगन क आसीसित करी जउन ओहसे डेरात ह,
छोटा स लइके बरा तलक।
14 मोका आसा अहइ यहोवा तोहार बढ़ोतरी करी अउर मोका आसा अहइ,
उ तोहार संतानन क भी जियादा स जियादा देइ।
15 यहोवा जउन सरग अउ धरती क बनाएस ह,
तोहका आसीस देइ।
16 सरग यहोवा क अहइ।
मुला उ धरती क मानव जाति क दिहेस ह।
17 मरे भए लोग यहोवा क गुण नाहीं गउतेन।
कब्र मँ पड़े भए लोग यहोवा क गुणगान नाहीं करतेन।
18 मुला हम अबहुँ यहोवा क स्तुति करति ह,
अउर हम ओकर स्तुति सदा-सदा करब!
लेवी बंस क मनइयन क समर्पण
5 यहोवा मूसा स कहेस, 6 “लेवी बंस क मनइयन क इस्राएल क दूसर मनइयन स अलग लइ जा। ओनॅ लेवी बंसी मनइयन क सुद्ध करा। 7 इ तोहका सुद्ध बनावइ बरे करइ क होइ। पापबलि स खास पानी[a] ओन प छिरका। इ पानी ओनका सुद्ध करी। तब उ पचे पूरा सरीर स बार उस्तरा स कटवइहीं अउ आपन ओढ़ना क धोइहीं। इ ओनके सरीर क सुद्ध करी।
8 “तब उ पचे एक नवा बर्धा अउ ओकरे संग प्रयोग मँ आवइवाली अन्नबलि लेइहीं। इ अन्नबलि तेले स साना भवा आटा होइ। तब दूसर बर्धा क पाप बरे भेंट क रूप मँ ल्या। 9 लेवी बंस क मनइयन क मिलापवाला तम्बू क समन्वा पहँटा मँ लिआवा। तब इस्राएल क सबहिं मनइयन क चारिहुँ कइँती स बटोरा। 10 तब तोहका लेवी बंस क मनइयन क यहोवा क समन्वा लइ आवा। अउ इस्राएल क लोग आपन हाथ ओन प धरीहीं। 11 तब हारून लेवी बंस क लोगन क यहोवा क समन्वा लाइ। उ पचे यहोवा बरे उत्तोलनबलि क रूप मँ होइहीं। इ ढंग स लेवी बंस क लोग यहोवा क विसेस काम करइ बरे तइयार होइहीं।
12 “लेवी बंस क लोगन स कहा कि उ पचे आपन हाथ बर्धा क मूँड़े प धरिहीं। एक बर्धा यहोवा क पापबलि क रूप मँ होइ। दूसर बर्धा यहोवा क होमबलि क रूप मँ काम आइ। इ भेंट लेवी-बंस क मनइयन क पाप बरे प्रायस्चित करी। 13 लवि बंस क मनइयन स कहा कि उ पचे हारून अउ ओकरे पूतन क अगवा खड़ा होइ। तब यहोवा क समन्वा लेवी बंस क मनइयन क उत्तोनबलि क रूप मँ अर्पण करा। 14 इ तरीका स लेवी बंस क लोग खास होइहीं। उ पचे इस्राएल क दूसर मनइयन स अलग होइहीं। अउर लेवी बंस क लोग हमार होइहीं।
15 “एह बरे लेवी बंस क मनइयन क सुद्ध करा। अउर ओनका यहोवा क समन्वा उत्तोलन बलि क रूप मँ हाजिर करा। जब इ पूरा हो जाइ तब उ पचे आइ सकत हीं अउर मिलापवाला तम्बू मँ आपन काम कइ सकत हीं। 16 इ सबइ लेवी बंसी इस्राएल क लोग अहीं जउन मोका दीन्ह ग अहइँ। मइँ ओनका आपन लोग क रूप मँ अंगीकार किएउँ ह। बीते भए जमाना मँ हर एक इस्राएली परिवार मँ पहिलौटी क पइदा लरिका मोका दीन्ह जात रहा मुला मइँ लेवी बंस क मनइयन क इस्राएल क दूसर परिवारन क पहिलौटी क बेटवन क जगह प अंगीकार किहेउँ ह। 17 इस्राएल क हर मनई जउन हर एक परिवार मँ पहिले पइदा भवा ह, मोर अहइ। जदि उ मनई या गोरु अहइ तउ भी मोर अहइ। मइँ मिस्र मँ सबहिं पहिला पइदा गदेलन अउ जनावर क मारि डाएउँ रहा। एह बरे मइँ पहिला पइदा पूतन क अलग किहेउँ जेहँसे उ पचे मोर होइ सकइँ। 18 अब मइँ लेवी बंस क मनइयन क लइ लिहेउँ ह। मइँ इस्राएल क दूसर लोगन क परिवारन मँ पहिला पइदा भएन गदेलन क ठउर प ऍनका अंगीकार किहेउँ ह। 19 मइँ इस्राएल क सबहिं लोगन स लेवी बंस क मनइयन क चुनेउँ ह। मइँ ओनका हारून अउ ओकरे पूतन क ऍनका उपहार क रूप मँ दिहेउँ ह। मइँ चाहत हउँ कि उ पचे मिलापवाला तम्बू मँ काम करइँ। उ पचे इस्राएल क सबहिं मनइयन बरे सेवा करिहीं। अउर उ पचे ओन बलिदानन क देइ मँ मदद करिहीं जउन इस्राएल क लोगन क पापन क प्रायस्चित करिहीं। तब कउनो बड़ा रोग या कष्ट इस्राएल क लोगन क नाहीं होइ जब उ पचे पवित्तर ठउर क लगे अइहीं।”
20 एह बरे मूसा, हारून अउ इस्राएल क सबहिं लोगन यहोवा क हुकुम मानेन। उ पचे लेवी बंस क खातिर वइसा ही किहेन, जइसा यहोवा ओनके बरे मूसा क हुकुम दिहे रहा। 21 लेवी लोग आपन क फर्छा किहेन अउ आपन ओढ़ना क धोएन। तब हारून ओनका यहोवा क समन्वा उत्तोलन बलि क रूप मँ हाजिर किहेस। हारून उ भेंटन क भी चढ़ाएस जेका ओनकर पापन क प्रायस्चित करइ बरे चढ़ावा गवा रहा जउन ओनका पवित्तर कइ दिहे रहा। 22 ओकरे पाछे लेवी बंस क लोग आपन काम करइ बरे मिलापवाला तम्बू क आएन। हारून अउ ओकर पूतन ओनकइ देखरेख किहेन। उ पचे लेवी बंस क मनइयन क काम बरे जिम्मेदार रहेन। हारून अउ ओकर पूतन ओन आदेसन क मानेन जेका यहोवा मूसा क दिहे रहेन।
1 पौलुस कइँती स जेका परमेस्सर क चुना भआ प्रेरित लोगन क ओनका बिसवास मँ सहायता देइ क बरे अउर हमरे धरम क सच्चाई क पूरा गियान क रहनुमाई क बरे भेजा गवा बा, इ सब, लोगन क परमेस्सर की सेवा क मार्ग बताइ। 2 उ मइँ अइसेन एह बरे करत हुँ कि परमेस्सर क चुने हुअन क अनन्त जीवन क आस बाँधइ। परमेस्सर, जउन कभउँ झूठ नाहीं बोलत, अनादि काल स अनन्त जीवन क बचन दिहे अहइ। 3 उचिते समइ पइ परमेस्सर अपने सुसमाचार क संसार क जानकारी बरे परगट किहेस। उहइ संदेस हमार उद्धारकर्ता परमेस्सर क आज्ञा स मोका सउँपा गवा बा।
4 हमार समान बिसवास मँ मोर सच्चा बेटवा तीतुस कः हमरे परमपिता परमेस्सर,
अउर उद्धारकर्ता मसीह ईसू कइँती स अनुग्रह अउर सान्ति मिलइ।
क्रीत मँ तीतुस क काम
5 मइँ तोहे सबन क क्रीत मँ एह बरे छोड़ रेहउँ कि उहाँ कछू अधूरा रही गवा बा, तू ओका ठीकठाक कइ द्या अउर मोरे आदेस क अनुसार हर नगर मँ बुजुर्गन क नियुक्त करा 6 बुजुर्ग क नियुक्त तबहिं कीन्ह जाइ जब उ निर्दोस होइ। एक पत्नी ब्रती होइ। ओकर बचवन बिसवासी होइँ अउर अनुसासनहीनता क दोस ओनपर न लगावा जाइ सकइ। अउर उ पचे निरकुंस भी न होइँ। 7 निरीच्छक निर्दोस अउर कउनउ खराबी स अछूता होइ चाही। काहेकि जेका परमेस्सर क काम सऊँपा गवा बा, ओका अड़ियल, चिड़चिड़ा, बहुत जियादा मदिरा पियइवाला, झगड़ालू, नीच कमाई क लोलुप न होइ चाही। 8 बल्कि ओका तउ अतिथियन क आवभगत करइवाला, नेकी क चाहइवाला, विवेक स भरा धर्मी, भगत, अउर अपने प नियन्त्रण रखइवाला होइ चाही। 9 ओका ओह बिसवास करइ जोग्ग संदेसा क मजबूती स धारण किहे रहइ चाही जेकर ओका सिच्छा दीन्ह गइ अहइ, ताकि उ लोगन क सदसिच्छा दइके ओन्हे प्रबोधित कइ सकइ। अउर जउन एनकर विरोधी होइँ, ओनकर खण्डन कइ सकइ।
Awadhi Bible: Easy-to-Read Version. Copyright © 2005 Bible League International.