Revised Common Lectionary (Semicontinuous)
1 आवा हम यहोवा क गुण गाई।
आवा हम पचे उ चट्टान क जय जयकार करी जउन हमार रच्छा करत ह।
2 आवा हम यहोवा क धन्यवाद बरे गीत गाई।
आवा हम ओकर बड़कई क गीत आनन्द क संग गाई।
3 काहेकि यहोवा महान परमेस्सर अहइ।
उ महान राजा सबहिं दूसर “देवतन” पइ सासन करत ह।
4 गहिर सबइ गुफा अउ ऊँच पहाड़ यहोवा क अहइँ।
5 सागर ओकर बा, उ ओका बनाएस ह।
परमेस्सर खुद आपन हाथन स झुरान धरती क बनाएस ह।
6 आवा, हम ओका पइलगी करी अउर ओकर उपासना करी।
आवा हम परमेस्सर क गुण गाई जउन हमका बनाएस ह।
7 उ हमार परमेस्सर
अउर हम पचन ओकर बगल मँ भेड़ अही।
कम स कम जदि तू आजु ओकर आवाज़ क पालन करब्या।
8 यहोवा कहत ह, “तू मोका सुनई स वइसा इनकार जिन करा जइसा मरीबा मँ तोहार पुरखन किहे रहेन,
अउ वइसा जिन करा जइसा उ पचे मस्सा मँ रहइ क दिन मँ किहे रहेन।
9 तोहार पुरखन मोका परखे रहेन।
उ पचे मोका परखेन, पर तब उ पचे लखेन कि मइँ का कइ सकत हउँ।
10 मइँ ओन लोगन क चालीस बरिस तलक सहन किहे रहेउँ।
मइँ इ अच्छी तरह जानत रहेउँ कि उ पीढ़ी इमान्दार नाहीं अहइ।
ओन लोगन मोर सिच्छा क नाही सीखेन।
11 तउ मइँ कोहाइ गएउँ अउर मइँ प्रण किहेउँ कि
उ पचे मोर भुइँया मँ आइववाले समई मँ प्रवेस नाहीं कइ पइहीं।”
8 मोर पतन भवा ह।
मुला हे मोरे दुस्मन, मोर हँसी जिन उड़ावा।
मइँ फुन स खड़ा होइ जाबउँ।
यदपि आजु मइँ अँधियारा मँ बइठा हउँ यहोवा मोरे बरे प्रकास होइ।
यहोवा छिमा करत ह
9 यहोवा क खिलाफ मइँ पाप किहे रहेउँ।
एँह बरे उ मोह पइ कोहान रहा।
मुला अदालत मँ उ मोरे अभियोग क वकालत करी।
उ, इ सबइ ही काम करी जउन मोरे बरे उचित अहइ।
फुन उ मोका बाहेर प्रकास मँ लइ आइ
अउर मइँ ओकरे छुटकारा का लखब।
10 फुन मोर बैरिन इ लखी अउर लजाइ जाइ।
मोर बैरिन इ मोसे कहे रही,
“तोहार परमेस्सर यहोवा कहाँ बा?”
उ समइ, मइँ ओह पइ हँसब।
लोग ओका अइसे कुचरि डइहीं
जइसे गलियन मँ कीचं कुचरि डाइ जात हीं।
यहूदी लउटइ क अहइँ
11 उ समइ आइ, जब तोहरे देवारन क फुन निर्माण होइ।
एक दिना तोहार देवार बहोत दूर तलक बढ़िहीं।
12 तोहार लोग तोहरी धरती पइ लउटि अइहीं।
उ सबइ लोग अस्सूर स अइहीं
अउर उ सबइ लोग मिस्र क सहरन स अइहीं।
तोहार लोग मिस्र स अउर परात नदी क दूसरी छोर स अइहीं।
उ सबइ पच्छिम क समुद्दर स
अउर पूरब क पहाड़ी स अइहीं।
13 धरती ओन लोगन क कारण जउन एकर बसइयन रहेन बर्बाद भइ रही,
ओन करमन क कारण जेनका उ पचे करत रहेन।
14 आपन लोगन ऊपर आपन साही राजदण्ड स हुकूमत करा।
आपन लोगन क रेवड़ पई हुकूमत करा।
लोगन क उ रेवड़ जंगलन मँ
अउर कर्मेल क पहाड़े पइ अकेल्ले रहत ह।
उ रेवड़ बासान मँ रहत ह
अउर गिलाद मँ बसत ह जइसे उ पहिले रहा करत रहा।
इस्राएल आपन दुस्मनन क हराइ
15 जब मइँ तू पचन्क मिस्र स निकारिके लइ आए रहेउँ, तउ मइँ बहोत स चमत्कार किहे रहेउँ।
वइसेन ही अउर चमत्कार मइँ तू पचन्क देखाँउब।
16 उ सबइ चमत्कारन क सबइ जाति लखिहीं
अउर लजाइ जइहीं
उ सबइ जातियन लखिहीं
कि ओनकर “सक्ति” मोरे समन्वा कछू नाहीं अहइ।
उ सबइ चकित रहि जइहीं
अउर उ सबइ आपन मुँहे पइ हाथ रखिहीं।
उ पचे कान क ढाँपि लेइहीं
अउर कछू नाहीं अनकिहीं।
17 उ पचे धूरि चाटत साँपन क नाईं
अउर रेंगत भए जीव क नाईं धरती पइ रहइँ।
उ पचे अइसे किरवन नाईं रेगंत रहइँ आपन बिलन स निकरत हीं।
उ पचे डेरात-काँपत भए
हमरे परमेस्सर यहोवा क लगे जइहीं।
परमेस्सर, उ पचे तोहरे समन्वा डेरइहीं।
यहोवा क स्तुति
18 तोहरी नाई कउनो परमेस्सर नाहीं अहइ।
तू पापी लोगन्क छिमा कइ देत अहा।
तू आपन बचे भए लोगन क पापन क छिमा करत अहा।
यहोवा सदा कोहान नाहीं रही,
काहेकि ओका तउ दयालु ही रहब भावत ह।
19 ओका हम पचन पई फुन दया करि द्या।
ओका हमरे पापन स छुटकारा पावइ द्या।
उ हमरे पापन क दूर गहिर सागरे मँ लोकाइ देब्या।
20 याकूब बरे तू फुरइ रहब्या।
इब्राहीम बरे तू दयालु रहब्या।
तू अइसी ही प्रतिग्या बहोत पहिले हमरे पुरखन क संग किहे रह्या।
26 तबहिं उ सब एक स्तुति गाना गाइके जैतून क पर्वत प गएन।
ईसू क सब चेलन ओका तजि देइहीं
(मत्ती 26:31-35; लूका 22:31-34; यूहन्ना 13:36-38)
27 ईसू ओनसे कहेस, “तोहार पचे क बिसवास खोइ जाइ। काहेकि लिखा बाटई:
‘मई गड़रियवा क मारब
अउ भेड़न छिटकाइ जइहीं।’ (A)
28 मुला फिन स जी उठे क पाछे मइँ तोसे पहिले ही गलील चला जाब।”
29 जब पतरस बोलि उठा, “चाहे सब मिला आपन बिसवास खोइ दें, मुला मइँ न खोउब।”
30 एह पइ ईसू ओसे कहेस, “मइँ तोसे सच कहत हउँ। आजु, इहइ राते मँ मुर्गा क दुइ बार बाँग देइ स पहिले तू तीन दाई मोका नकार चुका होब्या।”
31 एह पइ पतरस अउर जोर देत भवा कहेस, “जदि मोका तोर संग मरइ पड़इ तबहुँ मइँ तोहका कबहुँ न नकारब!” तबहिं अउ बाकी चेलन भी अइसा ही कहेन।
Awadhi Bible: Easy-to-Read Version. Copyright © 2005 Bible League International.