Revised Common Lectionary (Semicontinuous)
135 परमेश्वराची स्तुती करा.
परमेश्वराच्या नावाची स्तुती करा.
परमेश्वराच्या सेवकांनो, त्याची स्तुती करा.
2 त्याचे गुणवर्णन करा.
परमेश्वराच्या मंदिरात उभे राहाणाऱ्या लोकांनो,
आमच्या देवाच्या मंदिराच्या अंगणात उभे राहाणाऱ्यांनो, त्याची स्तुती करा.
3 परमेश्वर चांगला आहे म्हणून त्याची स्तुती करा.
त्याच्या नावाचे गुणगान करा.
कारण तो चांगला आहे.
4 परमेश्वराने याकोबाला निवडले.
इस्राएल देवाचा आहे.
5 परमेश्वरा महान आहे हे मला माहीत आहे.
आमचा प्रभु सगळ्या देवांपेक्षा महान आहे.
6 परमेश्वर त्याला हवे ते पृथ्वीवर आणि स्वर्गात समुद्रात
आणि खोल महासागरात करत असतो.
7 देव सर्व पृथ्वीभर ढग तयार करतो.
विजा आणि पाऊस तयार करतो आणि वाराही तयार करतो.
8 देवाने मिसर मधले सगळे पहिल्यांदा
जन्माला आलेले पुरुष आणि प्राणी मारुन टाकले.
9 देवाने मिसरमध्ये अनेक अद्भूत आणि चमत्कारिक गोष्टी केल्या.
देवाने फारो आणि त्याच्या अधिकाऱ्यांच्या बाबतीत या गोष्टी केल्या.
10 देवाने पुष्कळ राष्ट्रांचा पराभव केला.
देवाने शक्तिशाली राजांना मारले.
11 देवाने अमोऱ्याच्या सिहोन राजाचा पराभव केला.
देवाने बाशानच्या ओग राजाचा पराभव केला.
देवाने कनानमधल्या सर्व राष्ट्रांचा पराभव केला.
12 आणि देवाने त्यांची जमीन इस्राएलला दिली.
देवाने ती जमीन त्याच्या लोकांना दिली.
13 परमेश्वरा, तुझे नाव सदैव प्रसिध्द राहील.
परमेश्वरा, लोकांना तुझी नेहमी आठवण येईल.
14 परमेश्वराने राष्ट्रांना शिक्षा केली.
पण परमेश्वर त्याच्या सेवकांबरोबर दयाळू होता.
15 दुसऱ्या लोकांचे देव केवळ सोन्याचांदीचे पुतळे होते.
त्यांचे देव म्हणजे लोकांनी केलेले पुतळे होते.
16 त्या पुतळ्यांना तोंड होते पण ते बोलू शकत नव्हते.
त्या पुतळ्यांना डोळे होते पण ते पाहू शकत नव्हते.
17 पुतळ्यांना कान होते पण ते ऐकू शकत नव्हते.
त्या पुतळ्यांना नाक होते पण ते वास घेऊ शकत नव्हते.
18 आणि ज्या लोकांनी हे पुतळे केले तेही या पुतळ्यांसारखेच होतील.
का? कारण त्यांनी त्या पुतळ्यांवर मदतीसाठी विश्वास टाकला होता.
19 इस्राएलाच्या कुटुंबांनो, परमेश्वराचे स्तोत्र गा.
अहरोनाच्या कुटुंबांनो, परमेश्वराचे स्तोत्र गा.
20 लेवीच्या कुटुंबांनो, परमेश्वराचे स्तोत्र गा.
परमेश्वराच्या भक्तांनो, परमेश्वराचे स्तोत्र गा.
21 परमेश्वराला सियोनहून त्याचे घर असलेल्या
यरुशलेममधून धन्यवाद मिळोत.
परमेश्वराची स्तुती करा.
देवाचे स्तवनगीत
26 त्या वेळेस, यहुदात, लोक पुढील गाणे म्हणतील
परमेश्वराने आम्हाला तारण दिले आहे.
भक्कम तटबंदी व पुरेशी संरक्षणव्यवस्था असलेले आमचे शहर अभेद्य आहे.
2 वेशी उघडा म्हणजे देवाची चांगली शिकवण
मानणारे सज्जन लोक आत प्रवेश करतील.
3 परमेश्वरा, तुझ्यावर विसंबून असणाऱ्यांना
आणि तुझ्यावर श्रध्दा ठेवणाऱ्यांना,
तू खरी शांती देतोस.
4 म्हणून नेहमी परमेश्वरावर विश्वास ठेवा,
कारण परमेश्वर हा तुमच्यासाठी निरंतर सुरक्षित आसरा आहे.
5 पण परमेश्वर उद्दाम शहराचा नाश करील,
आणि तेथील लोकांना शिक्षा करील.
परमेश्वर ते मोठे शहर धुळीला मिळवील.
6 नंतर दीनदुबळे त्याचे भग्नावशेष पायाखाली तुडवतील.
7 प्रामाणिकपणा हे सज्जनांचे ब्रीद असते.
सज्जन सत्याच्या सरळ मार्गाने जातात,
आणि देवा तू तो मार्ग सुकर
व सुलभ करतोस.
8 पण परमेश्वरा, तू न्याय कसा करतोस ते बघण्यास आम्ही उत्सुक आहोत.
आमचे आत्मे तुला व तुझ्या नांवाला कायम स्मरणात ठेवू इच्छितात.
9 प्रत्येक रात्रीबरोबर तुझ्याशी एकरूप होण्याची आमची इच्छा आहे,
आणि प्रत्येक पहाटेबरोबर माझ्यातील आत्मा तुझ्याशी समरस होऊ इच्छितो.
जेव्हा तू न्याय देशील तेव्हा
लोकांना जगण्याचा योग्य मार्ग सापडेल.
10 पापी माणसावर तू फक्त दयाच करीत राहिलास
तर तो कधीच सत्कृत्य करायला शिकणार नाही.
वाईट माणूस चांगल्या लोकांत राहिला तरी वाईट गोष्टीच करील:
दुष्टाला परमेश्वराची महानता कदाचित कधीच कळणार नाही.
11 पण परमेश्वरा, तू त्यांना शिक्षा करण्यास तयार हो.
नक्कीच ते हे पाहातील नाही का?
परमेश्वरा, तुझ्या लोकांबद्दल असलेले
तुझे भक्कम प्रेम तू पाप्यांना दाखव.
मग ते नक्कीच खजील होतील.
तुझे शत्रू नक्कीच त्यांच्याच
आगीत भस्मसात होतील.
12 परमेश्वरा, आम्ही तडीस नेलेल्या सर्व गोष्टी
तूच आमच्यासाठी केल्या आहेस तेव्हा आम्हाला शांती दे.
देव त्यांच्या लोकांना नवजीवन देईल
13 परमेश्वरा, तू आमचा देव आहेस.
पूर्वी आम्ही इतर भोंदू देवांना
अनुसरलो आम्ही त्यांना जवळ केले.
पण आता लोकांनी फक्त तुझेच नाव घ्यावे असे आम्हाला वाटते.
14 ते मृत देव जीवंत होणार नाहीत.
त्यांची भुते आता उठणार नाहीत.
तू त्यांचा नाश करायचे ठरविलेस
आणि त्यांची आठवण देणाऱ्या सर्व खाणाखुणा तू नष्ट केल्यास.
15 तुझ्या आवडत्या राष्ट्राला
तू मदत केलीस.
इतर लोकांना त्या राष्ट्राचा
पराभव करण्यापासून थांबविलेस.
काही सदूकी येशूला फसविण्याचा प्रयत्न करतात(A)
18 नंतर काही सदूकी त्याच्याकडे आले, (सदूकी पुनरूत्थान नाही असे समजतात) त्यांनी त्याला विचारले, 19 “गुरुजी. मोशाने आमच्यासाठी असे लिहिले आहे की, जर कोणा मनुष्याचा भाऊ मेला व पत्नी राहिली, परंतु मूलबाळ नसले तर वंश पुढे चालावा म्हणून त्या मनुष्याने तिच्याबरोबर लग्न करावे आणि मेलेल्या भावाचा वंश वाढवावा. 20 असे कोणी सात भाऊ होते. पहिल्याने पत्नी केली व तो मूलबाळ व होता मेला. 21 दुसऱ्याने तिच्याबरोबर लग्न केले, तोही मूलबाळ न होता मेला. 22 तिसऱ्याने तसेच केले. त्या सात भावांपैकी एकालाही त्या स्त्रीपासून, मूलबाळ झाले नाही. शेवटी ती स्त्रीही मेली. 23 सातही भावांनी तिच्याबरोबर लग्न केले तर पुनरूत्थानाच्या वेळी जेव्हा लोक मेलेल्यातून उठतील तेव्हा ती कोणाची पत्नी असेल? कारण सातही जणांनी तिच्याबरोबर लग्न केले होते.”
24 येशू त्यांना म्हणाला, “खात्रीने, पवित्र शास्त्र आणि देवाचे सामर्थ तुम्हांला माहीत नाही म्हणून तुम्ही अशी चूक करीत आहात. 25 कारण जेव्हा लोक मेलेल्यातून उठतील तेव्हा ते लग्न करणार नाहीत व करून देणार नाहीत. त्याऐवजी ते स्वर्गातील देवदूताप्रमाणे असतील. 26 परंतु मेलेल्यांचा पुन्हा उठण्याविषयी तुम्ही मोशाच्या पुस्तकातील जळत्या झुडपाविषयी वाचले नाही काय? तेथे देव मोशाला म्हणाला, ‘मी अब्राहामाचा, इसहाकाचा आणि याकोबाचा देव आहे.’ [a] 27 तो मेलेल्यांचा देव नव्हे तर जिवंत लेकांचा देव आहे. तुम्ही फार चुकत आहा.”
2006 by World Bible Translation Center