Revised Common Lectionary (Semicontinuous)

⁴ त्यांतले काही वाळवंटात फिरले.
    ते राहण्यासाठी जागा शोधत होते पण त्यांना शहर सापडले नाही.
⁵ ते खूप भुकेले आणि तान्हेले होते
    आणि अशक्त होत होते.
⁶ नंतर त्यांनी परमेश्वराला मदतीसाठी हाक मारली
    आणि त्याने त्यांना त्यांच्या संकटातून वाचवले.
⁷ देव त्यांना सरळ जेथे त्यांना राहायचे होते त्या शहरात घेऊन गेला.
⁸ परमेश्वराला त्याच्या प्रेमाबद्दल आणि
    तो ज्या अद्भुत गोष्टी लोकांसाठी करतो त्याबद्दल धन्यवाद द्या.
⁹ देव तान्हेल्या आत्म्याचे समाधान करतो.
    देव भुकेल्या आत्म्याला चांगल्या वस्तूंनी भरतो.

¹⁰ देवाची काही माणसे कैदी होती
    आणि काळ्याकुटृ तुरुंगात गजांच्या आडबंद होती.
¹¹ का? कारण ते देवाने सांगितलेल्या गोष्टीं विरुध्द भांडले.
    त्यांनी परात्पर देवाचा उपदेश ऐकायला नकार दिला.
¹² त्या लोकांनी केलेल्या गोष्टींबद्दल देवाने त्यांचे आयुष्य कठीण केले.
    ते अडखळले आणि पडले.
    त्यांना मदत करायला तेथे कुणीही नव्हते.
¹³ ते लोक संकटात होते म्हणून त्यांनी परमेश्वराला मदतीसाठी हाक मारली
    आणि त्याने त्यांना त्यांच्या संकटापासून वाचवले.
¹⁴ देवाने त्यांना त्यांच्या अंधार कोठडीतूनबाहेर काढले,
    ज्या दोराने त्यांना बांधले होते तो दोर देवाने तोडला.
¹⁵ त्याच्या प्रेमाबद्दल आणि तो लोकांसाठी
    ज्याअद्भुत गोष्टी करतो त्याबद्दल परमेश्वराला धन्यवाद द्या.
¹⁶ देव आपल्याला आपल्या शत्रूंचा पराभव करायला मदत करतो.
    देव त्यांचे तांब्याचे दरवाजे मोडू शकतो.
    देव त्यांच्या दरवाज्यावरचे लोखंडीगज तोडू शकतो.

¹⁷ “आता तुझ्याजवळ तांबे आहे,
    मी तुला सोने आणीन.
आता तुझ्याजवळ लोखंड आहे,
    मी तुला चांदी आणून देईन.
मी तुझ्याजवळील लाकडाचे तांबे करीन.
    तुझ्या खडकांचे लोखंड करीन.
मी तुझ्या शिक्षेचे रूपांतर शांतीत करीन.
    आता लोक तुला दुखावतात,
पण तेच तुझ्यासाठी
    चांगल्या गोष्टी करतील.
¹⁸ तुझ्या देशात पुन्हा कधीही हिंसेची वार्ता ऐकू येणार नाही.
    लोक तुझ्या देशावर पुन्हा कधीही चढाई करणार नाहीत.
आणि तुला लुटणार नाहीत.
    तू तुझ्या वेशीला ‘तारण’ आणि तुझ्या दरवाजांना ‘स्तुती’ अशी नावे देशील.

¹⁹ “या पुढे तुला रात्रंदिवस चंद्र सूर्य नव्हे
    तर परमेश्वर प्रकाश देईल.
परमेश्वर तुझा चिरकालाचा प्रकाश होईल.
    तुझा देवच तुझे वैभव असेल.
²⁰ तुझा ‘सूर्य’ कधी मावळणार नाही
    आणि ‘चंद्राचा’ क्षय होणार नाही.
कारण परमेश्वर तुझा अक्षय प्रकाश असेल.
    तुझा दु:खाचा काळ संपेल.

²¹ “तुझे सर्व लोक सज्जन असतील.
    त्यांना कायमची भूमी मिळेल.
मी त्या लोकांना निर्माण केले.
    मी माझ्या स्वतःच्या हातांनी
    तयार केलेली ती सुंदर रोपटी आहेत.
²² सर्वात लहान कुटुंबाचा मोठा समूह होईल.
    सर्वांत लहान कुटुंबाचे मोठे बलवान राष्ट्र होईल.
योग्य वेळी मी, परमेश्वर, त्वरेने येईन.
    मी ह्या गोष्टी घडवून आणीन.”