Revised Common Lectionary (Semicontinuous)
96 परमेश्वराने ज्या नवीन गोष्टी केल्या त्यांची स्तुती करण्यासाठी नवे गाणे गा.
सगळ्या जगाने परमेश्वराच्या स्तुतीचे गाणे गावे.
2 परमेश्वराला गाणे गा.
त्याच्या नावाचा जयजयकार करा.
चांगली बात्तमी सांगा.
तो रोज आपला उध्दार करतो ते सांगा.
3 लोकांना सांगा की देव खरोखरच अद्भुत आहे.
देव सगळीकडे ज्या विस्मयजनक गोष्टीकरतो त्याबद्दल सांगा.
4 परमेश्वर महान आहे आणि स्तुतीला योग्य आहे.
तो इतर “देवांपेक्षा” भयंकर आहे.
5 इतर देशांतले “देव” केवळ पुतळे आहेत.
पण परमेश्वराने मात्र स्वर्ग निर्माण केला.
6 त्याच्या समोर सुंदर तेजोवलय असते.
देवाच्या पवित्र मंदिरात शक्ती आणि सौंदर्य असते.
7 कुटुंबानो आणि राष्ट्रांनो,
परमेश्वरासाठी स्तुतीपर आणि गौरवपर गीते गा.
8 परमेश्वराच्या नावाचा जयजयकार करा.
तुमची अर्पणे घेऊन मंदिरात जा.
9 परमेश्वराची त्याच्या सुंदर मंदिरात उपासना करा.
पृथ्वीवरचा प्रत्येक माणूस परमेश्वराची उपासना करो.
10 सगळ्या राष्ट्रांना सांगा की परमेश्वर राजा आहे म्हणून जगाचा नाश होणार नाही.
परमेश्वर लोकांवर न्यायाने राज्य करेल.
11 स्वर्गांनो, सुखी राहा!
पृथ्वीमाते आनंदोत्सव कर.
समुद्र आणि त्यातील प्राण्यांनो आनंदोत्सव करा.
12 शेते आणि त्यात उगवणारे सर्व सुखी व्हा.
जंगलातल्या वृक्षांनो गा आणि सुखी व्हा.
13 परमेश्वर येत आहे म्हणून आनंदी व्हा.
परमेश्वर जगावर राज्य करायला येत आहे.
तो जगावर न्यायाने आणि सत्याने राज्य करेल.
वेळ आहे
3 सगळ्या गोष्टी करण्यासाठी योग्य वेळ असते. आणि पृथ्वीवरील सर्व गोष्टी योग्य वेळेलाच होतील.
2 जन्माला येण्याची
आणि मरण्याचीही वेळ असते.
रोप लावण्याची आणि
ते उपटून टाकण्याचीही वेळ असते.
3 ठार मारण्याची आणि
बरे करण्याची पण वेळ असते.
सगळ्याचा नाश करण्याची
आणि पुन्हा परत सर्व उभारायचीही वेळ असते.
4 रडण्याची आणि
हसण्याचीही वेळ असते.
दु:खी होण्याची आणि
आनंदाने नाचायचीही वेळ असते.
5 हातातली शस्त्रे खाली टाकण्याची वेळ असते
आणि ती पुन्हा उचलण्याची ही वेळ असते. [a]
कुणाला तरी मिठी मारण्याचीही वेळ असते
आणि ती मिठी सैल करण्याचीही योग्य वेळ असते.
6 काहीतरी शोधण्याचीही वेळ यावी लागते
आणि ते हरवले आहे हे जाणण्याचीही वेळ असते.
गोष्टींचा संग्रह करण्याची वेळ असते
आणि त्या फेकून देण्याचीही वेळ असते.
7 वस्त्र फाडण्याचीही वेळ असते.
आणि ते शिवण्याचीही वेळ असते.
गप्प बसण्याचीही वेळ असते
आणि बोलण्याचीही वेळ असते.
8 प्रेम करण्याचीही वेळ असते
आणि द्वेष करण्याचीही वेळ असते.
युध्द् करण्याची वेळ असते
आणि शांतीचीही वेळ असते.
17 प्रत्येक उत्तम व परिपूर्ण देणगी वरून येते. स्वर्गीय प्रकाश ज्याने निर्माण केला त्या पित्यापासून ती येते. आणि ज्याच्यावर तारांगणाच्या हालचालीचा काहीही परिणाम होत नाही, अशा पित्यापासून ती देणगी येते. 18 सत्याच्या संदेशाद्वारे आपण त्याची मुले व्हावे ही त्याची इच्छा पूर्ण होण्यासाठी आपली निवड केली आहे. पित्याने निर्माण केलेल्या सर्व गोष्टींमध्ये आपण “प्रथम फळ” व्हावे यासाठी त्याने असे केले.
2006 by World Bible Translation Center