Revised Common Lectionary (Semicontinuous)

Tesalonicapi Pablo imallata rurashcami

2 Can crijcunata ñucanchij ricugrishcaca, manatajmari yangachu cashca. Chaitaca cancunallataj yachanguichijmi. ² Saruncuna Filipospi ñucanchij c'amishca, macashca purishcataca yachanguichijllatajmi. Chashna achca llaquita apacujpipish, p'iñacujpipish, Taita Dios cushca alli huillaitaca, mana manchashpami huillarcanchij. Pai ñucanchij Diosllatajmari chashna huillachirca. ³ Mana ima pandata, mana ima mapa yuyaihuan, mana umangaraicu huillarcanchijchu. ⁴ Ashtahuanpish Taita Diosmari ñucanchijtaca alli nishpa, alli huillaita huillachun ñucanchijman curca. Pai cushcataca, ima shina cashcatatajmi huillacunchij. Mana pipaj ñaupajpi alli ricurishun ninchijchu. Ashtahuanpish ñucanchij shunguta rijsij Taita Diosta cushichingapajmari huillacunchij. ⁵ Cancuna yachashca shinallataj, ñucanchijca mana cullquiyuj tucungaraicullachu, mishqui shimi tucushpa huillarcanchij. Chaitaca Taita Diospish yachanmi. ⁶ Cancuna, mana cashpaca shujtajcuna ñucanchijta alli nichunca manataj munanchijchu. ⁷ ‘Huillagrichun Cristo mingashcacunatajmari canchij’ nishpaca, imatapish mañashpa p'iñachi tucurcanchijmi. Shina cashpapish, mana chashna rurarcanchijchu. Chaipaj randica, uchilla huahuacunata mama c'uyashpa yachachij shinami charircanchij. ⁸ Cancunata achcata c'uyashcamantaca, Taita Dios cushca alli huillaillataca mana huillashun nircanchijchu. Ashtahuanpish cancunamantaca, ñucanchij quiquin causaitapish cunchijmanllami carca. Ñucanchijpajca, yallitaj c'uyashcacunamari canguichij.

‘Mandashcacunaca, ¿maijantaj tucuita yalli?’ nishpami tapushcacuna

³⁴ Saduceocunata Jesús pingachishcata uyashpami, fariseocunaca paicunapura tandanacurcacuna. ³⁵ Paicunapuramanta shujca, Mandashcacuna ima shinalla cajta yachajmi carca. Paimi Jesusta pandachisha nishpa, cashna tapurca:

³⁶ –Yachachij, Mandashcapica, ¿maijan mandashcataj tucuita yallica?– nishpa tapurca.

³⁷ Chashna tapujpi, Jesusca cashnami nirca:

–“Canta Mandaj Diosta cambaj tucui shunguhuan, tucui almahuan, tucui yuyaihuan c'uyangui” ninmi. ³⁸ Cai mandashcami, tucui mandashcacunamanta yalli. ³⁹ Cai mandashcapaj cati caj mandashcapish, caiman rijchajllatajmi. Chaipish: “Can quiquinta c'uyarij shinallataj shujtajcunatapish c'uyangui” ninmi. ⁴⁰ Cai ishqui mandashcacunatami Mandashcapish, Dios ima nishcata huillajcuna huillashcapish catin– nircami.

¿Cristotaca pipaj Churi cashcatataj yuyanguichij?

⁴¹ Fariseocuna chaipi tandanacushca cajpirajmi, Jesusca paicunataca cashna tapurca:

⁴² –Cristomantaca, ¿imatataj yuyanguichij? ¿Pipaj Churi cashcatataj yuyanguichij?– nijpi paicunaca:

–Davidpaj Churimi– nircacuna.

⁴³ Shina nijpimi Jesusca, cashna nirca:

–Shinashpaca, ¿ima nishpataj Davidca, Diospaj Espíritu yuyaita cujpi Cristotaca: “Ñucata Mandaj” nircari? Davidllatajmi cashnapish nirca:

⁴⁶ Jesús chashna nijpica, pipish imata mana ni tucurcachu. Chai punllamantami, cutinca ña mana imata tapurcacuna.