Revised Common Lectionary (Semicontinuous)

⁴⁰ Jesús huillashca shimicunata uyashpami, chai tucuicunamanta maijancunaca: «Caitajca, Dios ima nishcata huillajtajmari» nircacunami. ⁴¹ Shujtajcunaca: «Caica Cristomari» nircacunami.

Ashtahuanpish maijancunaca, cashnami nircacuna: «¿Maitataj Cristoca, Galileamanta shamungari? ⁴² ¿Illu Dios Quillcachishcapica: “Cristoca Davidmanta miraimi canga, David causashca Belén shuti aillu llajtamantami shamunga” nintaj shiná?» nircacunami. ⁴³ Jesusmanta chashna shujta shujta yuyashpami chaupirinacurca. ⁴⁴ Paicunapurallamantataj Jesusta japishun nicujcunapish, pi mana japircacunachu.

Jesús alli yachachijpipish fariseocunaca manataj crishcacunachu

⁴⁵ Jesusta japichun cachashcacuna tigramujpica, pushaj curacunapish, fariseocunapish:

–¿Ima nishpataj mana japimunguichigari?– nishpami tapurcacuna.

⁴⁶ Shina nijpimi, paicuna cachashca runacunaca:

–¡Chai runa shinatajca, pi manataj rimashcachu!– nishpa cutichircacuna.

⁴⁷ Chashna nijpi fariseocunaca, cashnami tapurcacuna:

–¿Cancunatapishchu crichin? ⁴⁸ ¿Mandajcuna, fariseocunaca maijanllapish Paita crishcata uyashcanguichijchu? ⁴⁹ ¡Mana! Ashtahuanpish Mandashcata mana yachaj, millashca gentecunallamari Paitaca crincuna– nircacunami.

⁵⁰ Shina nijpica Jesuspajman tuta shamuj, Nicodemo shuti fariseomi, paicunataca cashna tapurca:

⁵¹ –¿Ñucanchij Mandashcapica, shuj runata manaraj uyashpa, pai ima rurashcatapish manaraj yachashpaca juchachichunlla ninchu imatagari?– nircami.

⁵² Chashna nijpimi, caishujcunaca:

–¿Canpish Galilea runachu tucungui, imamí? Dios Quillcachishcata alli ricushpa yachanarajmi cangui. Galileamantaca, Dios ima nishcata huillajca, shujllapish manataj tiyashcachu– nircacunami.