Revised Common Lectionary (Semicontinuous)
14 Chashna cajpica, ¿ima nishuntaj? ¿Taita Dios chashna rurashpaca, mana rurana cashcatachu rurashca? ¡Ama chashnaca yuyashunchijchu! 15 Diosca Moisestaca:
«Maijanta ñuca llaquisha nishcatami llaquisha.
Maijanta ñuca c'uyasha nishcatami c'uyasha» nishcami.
16 Chashna cajpica, pita cashpapish mana quiquin munashcamanta, mana cashpaca ima allita rurashcamanta agllanchu. Ashtahuanpish Taita Diosca, llaquishcallamantami agllan. 17 Chaimantami Dios Quillcachishcapica, Faraontaca cashna nin: «Ñucaca tucuita rurai tucuj cashcata canpi ricuchingapajpish, ñuca shutita tucui cai pachapi rijsichingapajpishmi, cantaca jatun mandaj cachun churarcani» ninmi. 18 Shinashpaca Diosca, Pai llaquisha nishcatami llaquin, maijanpaj shunguta sinchiyachisha nishpapish, sinchiyachinllami.
19 Caita uyashpaca: «Shinashpaca, ¿ima nishpataj Diosca ñucanchijta juchachin? Pai imata rurasha nishcataca, ¿pitaj jarcai tucungari?» ninguichari. 20 Canca, ¿ima cashpataj Taita Diostaca chashna rimanguiari? Allpa platoca, paita rurajtaca: «¿Ima nishpataj ñucataca, “Chashna rurarcangui” ni tucunchari?» 21 Allpamanta imatapish rurajca, ¿manachu chai allpallamantataj shuj platotaca ima allipajlla, shujtaca ima imapajpish rurai tucun?
22 Cutin Taita Dios, Pai tucuita rurai tucuj cashcata ricuchingapaj, p'iñarishpa chingachinalla, runacuna cajpipish, mana imata rurashpa shuyacushcallataca, ¿imatataj ningui? 23 Shinallataj Diosca, Pai sumaj jatun cashcatami, Pai llaquishcacunamanca ricuchirca. Chashna rurashpa sumajyachingapajmi, paicunataca Paillataj ñaupaman allichishca. 24 Pai chashna llaquishcacunatami, ñucanchij israelcunapuramantapish, mana israelcunapuramantapish cayashca. Ñucanchijmari chaicuna canchij. 25 Chashna ruranatamari, Oseas libropica, cashna nishca:
«Mana ñucapaj cajcunatami, ‘Ñucapajmi canguichij’ nisha.
Manapish ñuca c'uyashcatami, ñuca c'uyashcacuna» nisha.
26 «Cashnapishmi tucunga:
Maipimi, ‘Mana ñucapajchu canguichij’ nircani, chaillapitajmi:
‘Causaj Taita Diospaj huahuacunami’ nishca cangacuna» nishcami.
27 Shinallataj Isaiaspish, israelcunamanta huillashpaca:
«Israelcunaca, mama cucha uri t'iyu allpa shina cashpapish,
huaquincunallami quishpiringacuna.
28 Mandaj Diosca, cai pachapi imata rurana tucushcataca,
tucui imalla rurasha nishcatami,
mana unaiyashpa pajtachinga» nishcami.
29 Isaiasllatajmi ñaupaman cashnapish nishca:
«Tucuita Mandaj Dios,
huaquin huahuacunallatapish mana saquishca cajpica,
Sodoma shinami tucunchijman carca,
Gomorramanmi rijchanchijman carca» nishcami.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.