Revised Common Lectionary (Semicontinuous)

⁶⁷ Rumacˈariˈ ri Zacarías, ri rutataˈ ri acˈal, tek nojnek ránima riqˈui ri Lokˈolaj Espíritu, riyaˈ xukˈalajsaj cˈa y xubij:
⁶⁸     Sibilaj ta xtinimirisex rubiˈ ri Ajaf Dios kiche (kixin) riyoj ri yoj aj Israel,
    ruma yojrunataj pe riyoj ri yoj rutinamit, y yojrucol.
⁶⁹     Ri Dios nuyaˈ jun kanimalaj Colonel.
    Y ri Kacolonel riˈ, jun chique ri ye riy rumam ca ri David ri jun ka‑rey y rusamajel ri Dios ri xcˈojeˈ ojer ca.
⁷⁰     Ri Dios xbin chique ri lokˈolaj tak profetas ri xekˈalajsan ri ruchˈabel Riyaˈ ojer ca, chi xquibij chi xtuyaˈ jun Kacolonel.
⁷¹     Can rubin wi pe chi xkojrucol chiquiwech ri yeˈetzelan kiche (kixin), y xkojrucol pa quikˈaˈ ri ma yojcajoˈ ta,
⁷²     y chukaˈ rubin ca chi nujoyowaj quiwech ri katiˈt kamamaˈ ri xecˈojeˈ ojer ca,
    y chukaˈ ma numestaj ta ri lokˈolaj trato ri xuben riqˈui ri Abraham.
⁷³     Can xubij wi chare ri ojer kamamaˈ Abraham ri cˈo chi nuben chake,
⁷⁴     chi can yojrucol pa quikˈaˈ ri yeˈetzelan kiche (kixin),
    riche (rixin) chi queriˈ ma nikaxibij ta kiˈ chi nikaben ri rusamaj,
⁷⁵     y riqˈui jun chojmilaj y chˈajchˈojlaj cˈaslen chuwech Riyaˈ, nikaben ri rusamaj ronojel kˈij ri yojcˈaseˈ el chuwech re ruwachˈulef.
⁷⁶     Y riyit ti nucˈajol, xchaˈ ri Zacarías, xtibix chawe chi can yit jun profeta ri kˈalajsey ruchˈabel ri nimalaj Dios.
    Ruma yit cˈa riyit ri xcanabeyej chuwech ri Ajaf riche (rixin) chi xtachojmirisaj apo ri rubey,
⁷⁷     y yit cˈa riyit ri xcakˈalajsan chi ri Dios nucuy quimac ri can ye rutinamit, riche (rixin) chi yecolotej.
⁷⁸     Y riˈ, xaxu (xaxe) wi ruma chi ri ka‑Dios nujoyowaj kawech riqˈui ronojel ajowabel.
    Rumariˈ tek cˈa chilaˈ chicaj nutek wi pe Jun ri nosakirisan kiche (kixin), ri can achiˈel tek ntel pe ri kˈij.
⁷⁹     Ri Jun cˈa ri nosakirisan, xquerusakirisaj ri yecˈo pa kˈekuˈm y ri yecˈo pa rumujal ri camic,
    y xkojrucˈuaj cˈa chupan ri bey riche (rixin) uxlanibel cˈuˈx.